Hatutan.com, (03 Abríl 2024), Díli—Iha loron  01 fulan-Abríl 2024, Sekretáriu Jerál  Partidu Demokrátiku (PD), António da Conceição “Kalohan” hasoru-malu ho Sekretáriu Jerál  partidu FRETILIN, Mari Alkatiri iha gabinete eis-titular Mari Alkatiri nian iha Faról, Díli.

Lee Mós: Prezidente Repúblika Ezonera António da Conceição hosi Kargu Embaixadór TL bá RI

António “Kalohan” hasoru maluy ho Sekjen FRETILIN, Mari Alkatiri iha Gabinete eis-titular Mari Alkatiri iha Farol, Díl, 01 fulan-Abríl 2024. Foto/Gabinete eis-PM Mari Alkatiri

Sorumutuk ne’ebé partilla iha konta Facebook Gabineten Primeiro Ministro I e VII Governo Constitucional, Dr Mari Alkatiri  ne’e hamosu espekulasaun oioin. Balun dehan, Partidu Demokrátiku (PD) liuhosi sira-nia Sekretáriu Jerál hakbesik daudaun ona bá partidu FRETILIN tanba preokupa ho isu remodelasaun ne’ebé talvés bele la di’ak bá PD nia envolvimentu iha formasaun IX Governu Konstitusionál.

Espekulasaun balun fali dehan kondenadu kazu partisipasaun ekonomia, António “Kalohan” komesa buka simpatia no hakbesik an bá Mari Alkatiri atu bele fó influensia bá Tribunál Rekursu (TR) hodi bele liberta António “Kalohan” hosi desizaun primeira instánsia nian.

Iha loron 08 fulan-Janeiru 2024, Tribunál Justisa Primeira Instánsia Díli (PJPID) aplika pena prijaun tinan-lima (5) efetivu bá António da Conceição “Kalohan” no tinan-haat (4) bá Apolinario dos Santos Asunsão tanba provadu komete krime partisipasaun ekonómiku  iha negósiu.  

Kona-bá espekulasaun sira-ne’e, Karta (03/04/2024), atuál membru PN hosi Bankada PD, António da Conceição “Kalohan” halo konferénsia imprensa hodi esplika katak nia vizita ne’e hanesan vizita pesoál hanesan alin bá kumprimenta maun Mari Alkatiri .

“Ha’u ba kumprimenta Doutór Mari Alkatiri iha loron 1 fulan-Abríl, foin lalais ne’e, ha’u simu telefone hosi Dr. Mari Alkatiri hodi hasoru malu tanba ne’e maka hato’o fali ninia sentidu solidariedade bá ha’u kona-bá situasaun ne’ebé mak ha’u hasoru hela daudauk  ne’e, nia fó mensajen, solidariedade, korajen bá ha’u kona situasaun ne’e. Ho situasaun ida ne’e mós ha’u aproveita ko’alia uitoan mós kona-bá situasaun rai-laran ne’ebé mak agora daudaun ita hotu hasoru, hanesan ita hatene ita iha governu da-9 ona  iha tempu badak tan fulan Maiu ita sei halo tan aniversáriu restaurasaun Independénsia bá dala-22,” António da Conceição “Kalohan” hateten iha sala Bankada PD iha Parlamentu Nasionál.

Nia hateten, Konstituisaun RDTL dehan kada tinan-5 akontese eleisaun dala-ida, se Timor-Leste foin  iha tinan-22 entaun bá metade foin iha Guvernu da-4. Pergunta mak ne’e tanba sá mak agora daudauk ne’e iha kedas ona Guvernu da-9  maske tinan-22 nia laran iha periodu 4 ninian, signifika katak Timor-Leste iha situasaun ida ne’ebé mak monu, hadeer hela to’o ohin loron.

“Ida-ne’e mak fahe lisuk hanoin ka partilla sentimentu ida ne’e ba Dr. Mari iha momentu vizita ne’e,” António “Kalohan” tenik.

Nia hateten, konsellu ne’ebé Mari  Alkaitir hato’o bá nia katak sira-nia  esperansa mós iha iha jerasaun foun sira tanba ne’e jerasaun foun sira otas hanesan tenke halo buat ruma ne’ebé di’ak hodi hatutan mehi ne’ebé halo tiha ona iha tempu hirak liubá.

Iha enkontru ne’e, fundadór RDTL  Mari Alkatiri  fó konsellu tan katak karik membru PN jerasaun foun sira  atu halo buat ruma iha Parlamentu Nasional presiza konsulta bá malu, ka’olia ho pasiénsia hodi haree took dalan bá oin ne’e halo nusa.

Hosi António “Kalohan”,  eis-Primeiru-Ministru Mari Alkatiri hatutan  Timoroan hotu presiza la’o hamutuk atu lori Timor bá oin bá destinu ida ne’ebé mak povu atu moris di’ak.

Mari Alkatiri rasik, tuir António “Kalohan” preokupa bá situasaun iha rai-laran dezde ukun an to’o agora, liuliu bá andamentu sira agora loos duni iha Prezidente, Parlamentu, Governu no Tribunál, maibé buat barak mak presiza atu halo tan liuliu atu oinsá harii tan instituisaun seluk iha rai laran.

La’ós ida ne’e de’it maibé iha hasoru malu ne’e mós ko’alia kona-bá lakuna  balu ne’ebé mak lei se eziste tanba sira agora tesi-lia ne’e uluk sira eskola  portugés nian no jerasaun foun sira agora eskola Bahasa Indonézia entaun diferente iha interpretasaun sira katak diferente iha ne’e halo presiza iha konsensu bá balu bainhira atu halo buat ruma bá rai ida-ne’e.

António da Conceição “Kalohan” esklarese katak  públiku tenke intende didi’ak PD nia pozisaun, tanba ne’e,  labele iha espekulasaun katak atu dada an  hosi Governu da-9 ne’e tanba  PD bá estadu, defende bá interese nasaun nian,  la’ós defende bá pozisaun.

“PD sei la dada an bainhira duni sai entaun ne’e nia sai de’it, tanba duni,” António “Kalohan” hateten hodi subliña tan katak PD nunka hola pozisaun, ida-ne’e la’ós atu aproveita de’it maibé ho responsabilidade halo buat ki’ik de’it mós ne’e kontribuisaun no tenke halo.

Jornalista Estajiáriu : Lazaro Pereira Quefi