Hatutan.com, (19 Novembru 2021), Dili—Durante fulan Outubru 2021, Polícia Ciêntífica Investigação Criminál (PCIC), simu kazu delegasaun kompeténsia hosi Ministériu Públiku (MP), hamutuk 31 hodi halo investigasaun.

Portavós PCIC, Octaviano da Costa hamutuk ho ekipa, hala’o hela Konferénsia Imprensa, Sesta (19/11/21). Foto/Hatutan.com.

Iha rezultadu investigasaun ba kazu krimi hirak-ne’e, PCIC foin konklui 20 no kazu 11 seluk sei iha hela prosesu nia laran.

Notísia iha Relasaun:Membru PCIC Ida Komete Krime Obstrusaun Ba Autoridade Publika

“Ita hetan delegasaun kompeténsia ba prosesu kriminál hosi MP ho totál 31. Hosi kazu sira-ne’e, ita hala’o ona no ita konklui ho relatóriu interkalár hamutuk 9. Ita termina ho nia relatóriu finál hamutuk prosesu 20, no imediatamente tenke enkamiña ba fila-fali na’in ba asaun penál,” Portavós PCIC, Octaviano da Costa, hateten ba jornalista-sira, liuhosi konferénsia imprensa iha Sala auditóriu Caicoli, Sesta (19/11/21).

PCIC mós simu mandadu judisiál hodi halo buska apreensaun no detensaun hamutuk haat (4), maibé, hosi mandadu 4 ne’e PCIC foin ezekuta tolu (3).

Aleinde ne’e, PCIC mós ezekuta ona mandadu detensaun loos de’it hosi Tribunál Distritál Dili (TDD), hamutuk hitu (7), maibé kazu lima (5) mak ezekuta ona.

Tuir dadus jerál ne’ebé rejista iha servisu laboratóriu PCIC nian, daudaun ne’e ekipa laboratorial hala’o hela ezame DNA ba prosesu lima (5), inklui mós ezame balístika ba prosesu ida (1).

“Rezultadu finál hotu ona, ita enkamiña fila-fali ba na’in asaun penál. Ita halo ezame mós ba Toxikolójia haat, iha andamentu prosesu nia laran. Ita mós ezame ba falsifikasaun dokumentus ida (1),” Portavós PCIC ne’e informa.

Totál karta keixa ne’ebé PCIC simu hosi komunidade iha servisu pikete durante oras 24 nia laran iha Outubru, ba investigasaun kriminál ninian hamutuk keixa 51.

Jornalista: Rogério Pereira Cárceres