Hatutan.com, (22 Novembru 2021), Díli- Eis-koordenadór merenda eskolár Postu Administrativu Atauru ho inisiál IS  sai arguidu iha Tribunál Distritál Díli (TDD) ba krime abuzu konfiansa agravadu no administrasaun danoza relasiona ho konstrusaun armazén foos iha tinan 2018 no motorizada inklui mobiliáriu ne’ebé Ministériu Edukasaun (ME) oferese ba arguidu.

Logotipu Tribunál Distritál

Iha audiénsia julgamentu iha TDD, Segunda (22/11/2021),  arguidu IS rekoñese iha momentu ne’ebá ME oferese motoriza ida inklui mobiliáriu hanesan meza, kadeira, printer, tinta no laptop ba arguidu hodi utiliza ba servisu nian, maibé bainhira ME hapara kontratu servisu, ekipamentu sira-ne’e rai de’it iha arguidu nia uma tanba arguidu seidauk hetan despaixu husi ME hodi entrega ekipamentu inklui motor.

Arguidu mós rekoñese, nia utiliza nia knar hanesan koordenadór merenda eskolar hodi halo proposta ba fundasaun IRCM (Rotary Club of Moruya) ho apoiu $10,241.50 ne’ebé arguidu rasik mak jere hodi halo konstrusaun armazén foos, grupu joven no ba ortikultura no total osan ba konstrusaun armazén $3,100 maske armazén ne’e seidauk finaliza.

Razaun arguidu hatama proposta ne’e, tanba momentu ne’ebá presiza dunik armazén hodi asegura foos tanba eskola ne’ebé dook presiza tempu hodi distribui. Hafoin rona arguidu, Tribunál adia hikas julgamentu ba loron seluk hodi kontinua rona sasin sira husi ME.

Tuir akuzasaun husi Ministériu Públiku (MP) katak iha tinan 2014 to’o 2018, arguidu IS selebra kontratu ho Ministériu Edukasaun (ME) númeru Ref. 248/DNRI—IfNWI/2016 ba pozisaun Koordenadór Merenda Eskolár iha Postu Administrativu Atauro ho saláriu mensal $221.00, tanba ne’e ME fornese fasilidade ba apoiu servisu hanesan motor ho marka Honda Mega Pro, matrikula 1012 GA, termu entrega kupon mina, komputadór Desktop I, UPS I, printer HP I, tinta printer unidade 4, surat tahan rim 2 kada periodu trimestral, armáriu vidru ba arkivu I, armáriu ki’ik ho gaveta l, meza servisu I, kadeira servisu l.

lha fulan-Dezembru 2018, ME hapara kontratu servisu ba funsionáriu kontratadu hamutuk 273, inklui mós arguidu liuhusi Ministerial N^O 14/GMEJD[XlV2018. Maske nune’e, hahú husi fulan-Dezembru 2018 to’o fulan-Juñu 2020, arguidu Ia entrega fila fasilidade hirak ne’e ba ME maibé arguidu rai nafatin sasán hirak ne’e iha ninia uma.

Alende ne^’e, arguidu utiliza komputadór, printer no tinta printer, meza no kadeira servisu nian hodi imprime material ba ninia privadu no família nia interese.

Iha tinan 2018, arguidu hanesan funsionáriu kontratadu ba Ajente Administrasaun Publika, halo proposta konstrusaun armazén merenda eskolár iha Postu Administrativu Atauro utiliza ME ba iha Rotary Club of Moruya (IRCM) iha Austrália ho apoiu osan dolar Austrália $14,250.00 ekivalente ho dolar amérika $10. 241.50.

Rezultadu husi proposta ne’e, arguidu mak jere rasik hodi harii konstrusaun armazén ho medida naruk 12 metru, Iu’an 6 metru no as 3 metru iha arguidu nia pai rasik kintál-laran, no total osan ne’ebé mak fundasaun IRCM transfere mai iha testemuña BH nia konta bankária iha ANZ Díli ne’ebé entrega ba arguidu ho montante $14,250.00, ekivalente ho dolar amérika $10.241.50.

Arguidu aproveita oportunidade no konfiansa ne’ebé IRCM fó tanba funsaun ne’ebé nia okupa iha momentu faktu ne’e akontese no arguidu hatene katak apoiu osan ho montante $10.241.50 ne’e la’ós pertense ba nia, maibé arguidu jere no utiliza osan ne’e tuir ninia interese hodi fó benefísiu ba nia aan.

Arguidu hatene katak fasilidade ne’ebé ME entrega ba arguidu liu husi Diresaun Nasional Lojístika ne’e, tanba funsaun ne’ebé arguidu okupa iha altura ne’ebá nu’udar koordenadór Merenda Eskolár iha Postu Administrativu Atauro.

Fasilidade hirak ne’e hetan ona apreensaun husi Komisaun Anti-Korrupsaun (CAC, sigla portugés), hafoin hetan delegasaun kompeténsia husi Ministériu Públiku hodi halo investigasaun ba arguidu no ekipamentu hirak ne^’e agora CAC entrega ona ba MP.

Ho hahalok arguidu nian ne’e,  MP akuza arguidu ba pratika krime rua abuzu konfiansa agravadu, administrasaun danoza ne^’ebé previstu iha artigu 257, 274 husi kódigu penal TL.

Audiénsia julgamentu preside husi juiz koletivu Alvaro Maria Freitas, José Gonçalves, Argentino Nunes, MP reprezenta husi Prokuradór Rogério Viegas no arguidu hetan asisténsia legal husi advogadu privadu.

Jornalista: Carmelita Isaac