Hatutan.com, (23 Novembru 2021), Dili—Ministru Agrikultura no Peska (MAP), Pedro dos Reis, iha ona “mehi” katak, kada tinan agrikultór sira tenke kolleta hare dala-rua tuituir-malu, tanba Governu liuhosi MAP rasik, planeia ona atu iha tinan 2022, hadi’a irrigasaun sanulu (10).

Ministru Agrikultura no Peskas, Pedro dos Reis, temi irrigasaun sanulu ne’ebé sei hadi’a mak hanesan irrigasaun ualu (8) iha Maliana II, Oebaba, Larisula, irrigasaun ki’ik-oan iha Kasa-Ainaro, Paulara, Halikou ne’ebé Governu sei halo re-apropriasaun no irrigasaun rua seluk mak Galata (Baucau Vila) ho Laivai (Lautém), mak sei halo foun, no nia prosesu tenderizasaun oras-ne’e la’o hela iha Comissão Nacional Aprovisionamento (CNA).

“Irrigasaun sanulu ne’e, re-apropria ualu, ho irigasaun foun rua. Ohin ita informa ba Prezidente Repúblika, atu ita tenke halo barrajen, nune’e tinan ida, ita bele prodús hare dala-rua,” Pedro dos Reis, hateten hafoin enkontru ho Prezidente Repúblika (PR), Francisco Gutertes Lú-Olo, iha Palásiu Prezidensiál, Ai-tarak Laran, Tersa (23/11/21).

Polítika MAP nian mak tenke hasa’e produsaun no produtividade iha rai laran, maibé iha fatór barak ne’ebé presija halo, tenke investe osan, inklui hadi’a eskema irrigasaun manuál sira.

Tuir dadus hosi MAP, daudaun ne’e Timor-Leste iha área potensiál hamutuk rihun 80-resin, maibé foin dezenvolve área rihun 30. Tanba ne’e, presija halo investimentu iha agrikultura no peska.

MAP mós durante ne’e hala’o hela atendimentu ba irrigasaun sira ne’ebé hetan sobu hosi mota iha 04 Abril, inklui irrigasaun ne’ebé aat iha Postu Administrativu Lakló, Munisipiu Manatuto ne’ebé sempre koordena ho Ministériu Obras Públika (MOP).

Ministru la temi totál orsamentu ne’ebé MAP propoin atu hadi’a irrigasaun sanulu ne’e, tanba konsidera hanesan asuntu tékniku.

SEP Prodús Ikan Barak

Pedro dos Reis mós informa katak, Sekretáriu Estadu Peska (SEP), durante ne’e hala’o hela servisu makás hodi haki’ak ikan iha munisipiu balun no MAP preokupa tanba, bainhira halo produsaun ikan barak, ema laiha atu sosa.

“Ikan iha bee midar sira iha foho ne’e ami kuaze estabelese hotu. Preokupasaun ami nian ne’e, sé ami prodús barak, se mak atu sosa. Tenke iha koneksaun di’ak,” Pedro dos Reis, hateten.

Jornalista: Rogério Pereira Cárceres