Hatutan.com, (24 Fevereiru 2022), Díli—”Ai ba Futuru” Parseria Sustentável Agro-Floresta (PSAF), ne’ebé finansiadu hosi Uniaun Europeia (UE) ho Ministériu Federal Alemaña ba Kooperasaun Ekonomia no Dezenvolvimentu (BMZ) ne’ebé implementa hamutuk ho Ministériu Agrikultura no Peskas (MAP), organiza eventu feira agrofloresta no komérsiu ba da-ruak iha Timor-Leste.

Feira iha Timor Plaza. Foto/Média GIZ

Feira Agrofloresta no komérsiu primeiru hala’o iha fulan Novembru tinan 2020 iha Centro Convenções Dili (CCD) no realiza ho susesu bo’ot.

Edisaun daruak nian sei organiza durante loron tolu hahú hosi 24 to’o 26 Fevereiru atu atrai diversas partisipantes iha kadeia valor agrofloresta.

Aliende ne’e, iha mós 36 espozitór sira seí hatudu sira nia produtu, inklui produtór mina nu’u, prosesadores ai-fuan, instituisoens finanseira, grupu kooperativa, instituisaun governamentál no empreza transasoens digitais, iha mós 20 dedor sira sei fa’an ai-han iha prasa alimentasaun ka food court.

Koordenadór GIZ Timor-Leste, Rainer Schellhaas, hato’o agradesimentu espesiál ba parseiru politiku sira iha Timor-Leste, ne’ebé apoia ona iha aspetu hotu-hotu iha ba implementasaun no mós ba Uniaun Europeia ho Ministériu Federal Alemaña ba Kooperasaun Ekonomia no Dezenvolvimentu (BMZ) ne’ebé fornese ona fundus ba projetu.

La haluha mós ba ekipa organizasaun eventu feira ne’e no ba ema sira ne’ebé hola parte iha eventu ne’e, ba agrikultór sira, parseria sira hosi área rurais, tanba bele koopera di’ak, hodi bele fahe tempu no esperiénsia hamutuk iha eventu ne’e.

“Ha’u hato’o deseju ba ita boot sira, espera buat hotu-hotu bele la’o ho di’ak iha eventu feira agrofloresta no komérsiu ne’e,” Hatutan.com sita deklarasaun Rainer Schellhaas iha komunikadu.

Embaixadór Uniaun Europeia, Andrew Jacobs rekoñese poténsia Timor-Leste iha Agrofloresta no sustentável agrikultura.

Nia konsidera setór ida ne’e nu’udár setór fundamentál ne’ebé bele fornese empregu no rendimentu ne’ebé barak hosi timoroan sira iha área rurais no urbanas, ne ebé mak jere ho forma sustentável fornese mós serbisu ba ambiente, ho adaptasaun no mitigasaun alterasoens klimátika.

Ida-ne’e maka siklu virtuozu ne’ebé sei ajuda Timor-Leste kontribui ba dinámika globál foun ho objetivu sustentável.

“Ami konsidera agrofloresta no agrikultura sustentável hanesan prioridade ida liu hosi atuál programa Multi indikativu (MIP 2014-2020),” Andrew Jacobs hateten.

Desde 2016, 13 projetu ho valór 66.3 M€ ne’ebé apoiu ba setor ne’e no mós resentemente aprezenta ofisialmente parseria ho governu Timor-Leste, MIP 2021-2027, destina kuantia substantial rekuperasaun no dezenvolvimentu ekonómiku verde ho sustentável (25 M€) inklui agrofloresta.

Ministru Agrikultura no Peska, Pedro dos Reis kontente tebes, tanba “Ai ba Futuru” reorganiza fali eventu feira agrofloresta no komérsiu ba daruak.

Feira dahuluk halo iha Novembru 2020 iha CCD, no MAP apresia tebes ba GIZ bele organiza tan eventu ne’e ho susesu liu.

Durante loron tolu sei halibur hamutuk ho partisipante sira, espozitores no mós oradór sira sei fahe sira nia esperiénsia kona-bá kadeia valór agrofloresta liu hosi feira ne’e.

“Durante loron tolu ne’e, vizitante sira sei kontenti ho atividade oin-oin, hanesan demonstrasaun ai-han ho bumbu lokál, demonstrasaun ko’a ai ho seguru no efetivu ho ekipamentus aparu ai nian, iha mós kompetisaun joga karta, demonstrasaun produsaun jamur, transmisaun direta/live streaming video, konsertu muzika lokál no mós demonstra halo marmelada,” Pedro dos Reis haktuir.

Aliende ne’e vizitante sira mós bele aumenta sira nia esperiénsia hodi buka hatene saida maka agrofloresta liu hosi video 360° no bele aprende barak liu tan kona-bá Ai ba Futuru ka bele mós hare oinsá ekipamentu drone bele uza ba área medisaun.

Projetu Ai ba Futuru implementa iha munisipiu haat parte leste nian hanesan Baucau, Lautém, Manatuto no Viquque, ho tarjetu ba uma-ka’in hamutuk 4.000 iha suku 40 ne’ebé identifika ona.

Ida-ne’e sei habelar liu tán área 600 Ha ba atividade agrofloresta iha Timor-Leste inklui kuda ai horis hamutuk millaun tolu.

Partisipantes hosi suku tarjetu sira sei hetan benefisiu hosi Kresimentu produsaun, oportunidade ba kampu serbisu, asesu ba merkadu hodi bele hasa’e rendimentu ekonómiku.

Jornalista: Vito Salvadór