Hatutan.com, (23 Novembru 2021), Díli-Governu liuhusi Ministériu Transporte no Komunikasaun (MTK) sei  reativa vó komersiál ne’ebé durante ne’e paradu tanba aplikasaun regra Estadu Emerjénsia (EE) iha situasaun pandemia COVID-19.

Aviaun Citilink “hakdasak” oras ida iha Aeroportu Internasionál Prezidente Nicolau Lobato, bainhira udan-boot iha loron 15 fulan-Novembru 2021. Foto/Hatutan.com

“Ohin, ha’u informa Primeiru-Ministru kona-ba MTK ninia planu rasik atu oinsá bele autoriza vó komersiál ba regular flight hodi asegura konetividade aero kada semana no kada semana rua, nune’e bele fasilita populasaun rai-laran no estranjeiru ne’ebé halo movimentu uja meius transporte aero,” Ministru Transporte no Komunikasaun (MTK), José Agostinho, informa ba jornalista hafoin enkontru ho Primeiru-Ministru, Taur Matan Ruak, iha Palaçio do Governo, Tersa (23/11/2021).

MTK mós iha ona liña koordenasaun ho Austrália hodi halo jestaun ba espasu aero ne’ebá bele prodús reseita ba Estadu, tanba durante ne’e espasu aero ne’ebá Timor-Leste fó ba nasaun seluk liuhusi sira-nia movimentu transporte aero ho gratuita maske ultrapasa iha aeroportu Timor nian.

Husi esforsu ida-ne’e, tuir Ministru José Agostinho, bele gaña reseita ba kofre Estadu kada tinan no tuir regra mundiál aero, aviaun hotu ho kategoria oi-oin ne’ebá ultrapasa iha RDTL nia espasu aero no tenke kumpre devér ba kofre Estadu TL.

Kona-bá sustentabilidade Aeroportu Kay Rala Xanana Gusmão,  Suai-Covalima, depende ba movimentu transporte aero durante pandemia Covid-19 ne’ebé paradu, tanba ne’e husu ba populasaun hotu atu bele iha konsiénsia hasae taxa vasinasaun nune’e bele reativa vó hodi bele kontinua prodús reseita ba Estadu.

Jornalista: Carmelita Isaac