Hatutan.com, (29 Maiu 2024), Díli— Sentru Matan Nasionál iha Hospital Nasional Guido Valadares (HNGV) rejista pasiente ho idade menus hosi tinan lima hamutuk na’in 50-resin.

Labarik sira ne’ebé haree telephone oras barak nia laran bele provoka moras matan tanba reflexu tela telephone android ne’e fásil atu estraga matan. Foto ilustrasaun hosi Google.

Xefe Unidade Oftamolojia, Virgílio da Costa Pinto hateten, moras matan ne’ebé labarik sira sofre tanba estudu hatudu katak barak liu haree telephone, nune’e iha reflexu tela telephone android ne’e estraga matan.

Lee Mós: Pasiente Fase-Raan Tanis iha HNGV

“Labarik tinan lima mai karaik na’in 50-resin. Iha ida mak trauma. Signifika buat ruma kona nia matan no  tinan kotuk halo ona operasaun, ne’e tanba halimar mak kolega tuda nia matan. Seluk ne’e ninia kauza tanba halimra telephone bele estraga sira nia matan,” Virgilio da Costa Pinto hateten iha knaar fatin, Sentru Matan Nasionál, kuarta (29/05/2024).

Alende rejista labarik kiik, iha mós ema boot ho númeru ne’ebé boot, nune’e kauza seluk bá moras matan ne’e maka maioria tanba idade ne’ebé liu ona 40 no la’ós kauza katarak, tanba katarak mosu  tanba trauma ka buat ruma kona matan.

“Kauza bá moras matan ka katarak ne’e alende idade, kauza seluk mós mak loron manas ne’ebé afeta liu ba camada ocular iha ema nia matan bainhira la prevene ho ekipamentu ruma hanesa oklu ka xapeo,”  nia esplika.

Virgílio da Costa Pinto husu ba inan aman sira atu kuidadu-an, no mós kuidade oan sira hosi loron manas, hodi uza ekipamentu prevensaun ba matan no labele husik oan sira haree telephone iha oras barak nia laran.

Dadus hosi Sentru Matan Nasionál hatudu katak,  kada semana hahú hosi Segunda to’o kuarta, loron ida rejista pasiente matan hosi 180 to’o 200, enkuantu iha kinta ho sesta ne’e menus hosi númeru ne’e.

Kona-bá ekipamentu sira no mós ai-moruk, Virgílio haktuir katak sufisiente hela atu halo atendementu bá pasiente sira.

Totál pasiente husi fulan Janeiru to’o Maiu hamutuk 42.741. Pasiente foun 14.370 no pasiente ne’ebé mai halo kontrolu hamutuk 20.155. Hosi númeru ne’e maioria ho idade tinan 30 ba leten.

Jornalista: Leopoldina de Carvalho