Hatutan.com, (30 Maiu 2024), Díli- Arsebispu Arkidioseze Metropolitana Díli,  Dom Virgílio Kardeál do Carmo da Silva, hateten iha eukaristia mak halo ema sai ida de’it ho Kristu.

Lee Mós: Kristu Moris Hias Sai Baze Fundamental Bá Katóliku Sira

Prosisaun “Corpo e Sangue de Cristo”, husi Igreja Balide ba Lecidere, Díli, Kinta (30/05/2024). Foto/Elio dos Santos da Costa

“Hale’u Eukaristia, hale’u Kristu Nia futar isin mak ita-ne’e sai ida de’it. Ho Kristu Nia halo an tun ba ita-ema nia fo’er sira, mak Nia (Kristu) bele hakuak no halibur ita hotu,” Arsebispu Arkidioseze Metropolitana Díli, Dom Virgílio Kardeál do Carmo da Silva, iha reflesaun ne’ebé halo iha monumentu Na’in Feto Maria Assunção, Lecidere, Díli, Kinta (30/05/2024).

Arsebispu ne’e hatutan forsa ida seluk ne’ebé mai husi frajilidade eukaristia mak forsa atu hadomi ida ne’ebé la’o sala. Iha han kalan ikus nian, iha  kalan traisaun ne’e mak Jesus fó paun moris nian, ne’ebé sai hanesan prémiu ida bo’ot liu ba umanidade. Maske iha eskolante ne’ebé trai ka fa’an hela Jesus, maibé Jesus kontinua ho domin hodi saran Nia moris ba umanidade.

Traisaun mak sofrimentu ne’ebé boot liu hotu, ka terus ne’ebé bo’ot liu hotu ona ba ne’ebé hadomi ema seluk. Ba Judas nia traisaun Jesus hatán ho Nia Mizerikordia, la fó kastigu maibé fó moris no ida ne’e Jesus kontinua halo ba umanidade iha eukaristia.

“Kada vez ita ba misa, ita hakbesik ba altar, dala barak ita sente la soi, Jesus hatene ita ne’e se no dala hira mak ita monu ba sala, maibé Jesus nunka denunsia ita bainhira ita hakbesik ba atu simu Nia tan ita presiza Jesus,” Nia dehan.

Prosisaun “Corpo e Sangue de Cristo”, husi Igreja Balide ba Lecidere, Díli, Kinta (30/05/2024). Foto/Elio dos Santos da Costa

Papa Francisco hateten beibeik katak eukaristia la’ós paun ba ema Santu sira nian, maibé ba ema sala-na’in sira nian, ba ema sira ne’ebé maske monu ba sala, maibé prontu hamriik no ba hasoru Kristu.

Bainhira ema simu paun moris nian, Jesus fó hikas ba ema sentidu foun iha ema nia desperasaun, frajilidade, no sentidu foun ida kona-ba moris. Ema hotu-hotu folin bo’ot tebes iha Jesus Nia matan, no Jesus nia Mizerikordia no domin mak fó forsa ba ema.

Arsebispu husu atu sarani fiar na’in ida-harohan ba Jesus atu tulun ema ida-idak hodi hatene fó folin ba eukaristia, atu ho kontaktu ne’ebé ema halo ho Jesus bele sai mos hanesan prémiu ida ba mau-alin sira seluk iha moris ne’e.

Partisipa iha prosisaun “Corpo e Sangue de Cristo” Sarani sira; foin-sa’e, ferik no katuas, grupu kategorial sira husi parókia ida-idak iha Díli laran, estudante sira husi Ensinu Baziku too Sekundária no universitáriu, padre no madre sira inklui seminarista sira hotu.

Jornalista: Vito Salvadór