Hatutan.com, (01 Juñu 2024), Díli—Forum Diálogu Shangri-La iha Singapura, Sesta (31/05/2024), sai mementu importante no dada atensaun ema ua’in nian iha forum refere ho atitude amizade ne’ebé hatudu husi Prezidente Repúblika, José Ramos-Horta ho prezidente eleitu Repúblika Indonézia, Prabowo Subianto.

Lee Mós: Ramos-Horta Ucapkan Selamat dan Undang Prabowo Kunjungi Timor Leste

Enkontru amizade Ramos-Horta ho Prabowo iha ámbitu Forum Diálogu Shangri-La iha Singapura, Sesta (31/05/2024). Foto/Mídia GPR

Mementu interesante iha ámbitu  The International Institute for Strategic (IISS) Shangri-La Dialogue 2024 ne’ebé hala’o iha Singapura sai momentu espesiál entre Ramos-Horta ho Prabowo hasoru malu hanesan amigu boot ne’ebé iha tempu luta rezisténsia Timor-Leste nian sai hanesan inimigu boot ba malu.

Iha istória pasadu no moruk Timor-Leste ho Indonézia nian la-sees mós husi Prabowo nia maneira intervensaun ba iha operasaun sira hasoru asua’in FALINTIL sira durante invazaun Indonézia nian iha Timor-Leste.  Prabowo nu’udár elementu xave ne’ebé dezeña akontesimentu trájiku, kruél, dezumanu no krime kontra umanidade ho sistemátiku durante okupasaun Indonézia nian.

Iha dokumentu istóriku balun hatudu katak durante rejime Soeharto nia ukun, Prabowo Subianto envolve iha masakre no violasaun direitu umanu sira iha Timor-Leste, hanesan Masakre Kararas iha 1983, Masakre Santa Krus iha 1991 no formasaun grupu milisia pro-Jakarta ka pro-autonomia iha 1999.   

Sita husi publikasaun mídia KOMPAS.COM katak iha momentu interesante ne’e Xefe Estadu Timor-Leste, José Ramos-Horta kaer-liman no hako’ak Prabowo Subuanto no ko’alia halimar tuituir hodi la’o ba meja resepsaun kalan nian, Sesta (31/05/2024).

Ramos-Horta koalia ho hamnasa no hatudu amizade ho Prabowo Subianto. Foto/Mídia GPR

Prabowo, antigu komandante Forsa Armada Indonézia ka ABRI (Angkatan Bersenjata Republik Indonesia) ne’ebé konsege lidera pelotaun iha grupu I/Ekipa Nanggala iha operasaun militár nian iha Timor-Leste 1975  ne’e  hatais kazaku metan hamnasa no hakuak Ramos-Horta.

Iha sesaun pergunta no resposta, Prabowo relata kona-bá oinsá Indonézia ne’ebé tempu liubá iha konflitu ho Timor-Leste mas ohin loron iha kooperasaun bilateral ida di’ak amizade tebetebes.

Prabowo hateten Indonézia iha istória naruk ho nasaun viziñu hanesan Timor-Leste, Malázia no Singapura. Maske iha konflitu maibé kontinua esforsu atu redús tensaun ne’ebé la’o iha tempu sira liubá.

“Ami buka solusiona diferensa sira entre ami  no laiha parte seluk (esterna) mak tua tan kanuru-tohar.  Ita hakotu diferensa sira entre ita no ita hakotu konflitu ho Malázia no Singapura,” Prabowo  hateten iha deklarasaun bá imprensa Sábadu (01/06/2024).

Jornalista: Vito Salvadór