Hatutan.com, (06 Juñu 2024), Díli-Primeiru-Ministru (PM), Kay Rala Xanana Gusmão, “hirus” violénsia ne’ebé envolve grupu rival juventude Timoroan ne’ebé hafoer Santuáriu Fátima-Portugal hodi rezulta na’in-ida mate no  seluk kanek.

Lee Mós: Timoroan Envolve Violénsia iha Fátima Tenke Responsabiliza Sira-Nia Aktu

Primeiru-Ministru Kay Rala Xanana Gusmão. Foto/Elio dos Santos da Costa

Violénsia ne’ebé akontese iha Fátima-Portugal, Domingu liubá, deskonfia envolve husi pesoál membru grupu arte-marsiál (GAM)  ho grupu arte-ritual (GAR) ne’ebé hamoe Timoroan hotu nia naran no hamonu integridade Timoroan hanesan nasaun no hanesan sarani kristaun Katóliku.  

Primeiru-Ministru Xanana Gusmão, Kinta (06/06/2024),  hasoru-malu ho Prezidente Repúblika, José Ramos-Horta, informa mós kona-bá saida mak akontese iha Fátima, Portugal. Nune’e, iha reuniaun Konsellu Ministru, Kuarta horiseik, haree ona katak, atu  oinusá hosi Ministériu Solidariedade Sosiál no Inkluzaun (MSSI), karik mat- isin ne’e atu lori mai, prontu, lori tiha mai, entrega tiha bá família.

“Mas, hodi halo apelu ida bá joven sira iha li’ur katak, iha ne’e sira mak hatudu duni katak, ita tenke taka duni. Taka duni arte-marsiál tanba iha ne’e ta’uk karik dehan polísia mós sai tiha ona hosi arte-marsiál, F-FDTL mós sai tiha ona, buat ruma ne’ebé sira kaer, bá oho malu fali iha ema nia rain. Ne’e-duni, ida-ne’e maka ami hanesan informa mós no Prezidente  Repúblika mós hatene kona-bá ida-ne’e,” Xanana Gusmão, hateten bá jornalista sira iha Palásiu Prezidensiál, Díli.

Hatán kona-bá oinsá pozisaun Governu nian no karik iha ona mós kontaktu ruma ho Governu Portugés ligadu bá violénsia  ne’ebé envolve Timoroan iha Fátima-Portugál, Xanana afirma dehan, insidente ne’e kabe bá kompeténsia Polísia Judisiáriu Portugál.

Xanana hatuir, iha Setembru 2023, Timoroan sira iha ne’e, Governu kansela tiha, labele la’o, labele halo buat ida. Neineik, neineik to’o agora, komesa redús ona violénsia entre joven tanba arte-marsiál. Ida mak Grupu Arte-Rituál Sete-Sete (77) hasoru Persaudaraan Setia Hati Terate (PSHT). Nune’e, to’o iha Dezembru, ema hotu kontente tebetebes, tanba fim do ano ne’e kalma liu, to’o ohin loron mós kalma. Laiha tán hanesan uluk semana-semana dehan oho malu.

“Mais, joven sira ne’e bá tiha Portugal ne’ebá, bá lori fali Sete-Sete. Ne’e loron ida fó hatene tiha ona bá hothotu,” Xanana tenik.

Xanana hateten, iha tempu funu, inan-aman sira, avo sira mate tanba hakarak rai ne’e ukun-aan. Ukun-aan tiha, maluk balu bá jura fali Bandeira Merah Putih.

“Bá Sete-Sete, Dua-dua (22), KORK, saida-saida, mai hanorin ita nia rai, imi mesak joven de’it, imi nia maluk sira para hurlele malu, estraga malu. Ne’ebé, ida mate, lima kanek. Iha hela Polísia Judisiária Portugal nia liman,” Xanana Gusmão informa.

Jornalista: Rogério Pereira Cárceres