Hatutan.com,  (16 Jullu 2024), Díli- Prezidente Repúblika (PR), José Ramos-Horta, Tersa (16/07/2024), iha Palásiu Prezidensiál, Díli,  simu karta kredensial husi embaixadóra foun Estadus Unidus Amérika (UEA)  nian  mai Timor-Leste, Donna Ann Welton.

Lee Mós: Ramos-Horta Partilla ho EUA Kona-bá Konflitu iha Myanmar

PR Ramos-Horta simu karta kredensial husi Embaixadóra foun UEA mai Timor-Leste, Donna Ann Welton, iha Palásiu Prezidensiál, Díli, Tersa (16/07/2024). Foto/Elio dos Santos da Costa

Serimónia ofisiál ne’e entrega karta kredénsial husi embaixadora Donna Ann Welton nian ne’e akompaña mós husi Vise-Ministra Asuntu ASEAN, Milena Maria da Costa Rangel.

“Embaixadora Welton lori experiénsia servisu liu dékada tolu iha Servisu Estranjeiru EUA nian bá nia pozisaun foun. Nia karreira diplomátika ne’ebé luan inklui pozisaun xave sira iha Ázia, Europa, no Médiu Oriente, ho papél importante sira hanesan Adjunta Asistente Sekretária Interina, Asistente Xefe ba Misaun iha Kabul, no Adjunta Xefe ba Misaun iha Helsinki. Embaixadora Welton nia esperiénsia oioin, ne’ebé inklui perísia iha arte Japoneza no estudu estratéjiku iha Army War College, hamutuk ho nia fluênsia iha lian Japonés no profisiénsia iha lian barak inklui Indonézia, sei serve di’ak ba nia bainhira nia asume postu importante ida ne’e,” Hateten Prezidente Repúblika José Ramos-Horta hateten tuir iha  komunikadu  imprensa ne’ebé Hatutan.com sita.

Estadus Unidus sai ona parseiru ida-ne’ebé metin iha Timor-Leste nia viajen ba independénsia no kontinua hala’o papél importante iha dezenvolvimentu nasaun nian. Programa asisténsia EUA nian iha Timor-Leste inklui USAID nia asisténsia dezenvolvimentu, kooperasaun seguransa, formasaun ba aplikasaun lei, Korpu ba Pas, no projetu Millennium Challenge Corporation ne’ebé foka ba saneamentu bee no edukasaun.

Timor-Leste hein atu kontinua kooperasaun forte ho Estadus Unidus Amérika iha lideransa Embaixadora Welton nian. Prezidente Ramos-Horta fiar katak nomeasaun Embaixadora Welton sei hasa’e no hametin liután ligasaun amizade no kooperasaun entre nasaun rua ne’e.

Sesaun foto hamutuk delegasaun husi Embaixada EUA nian iha Timor-Leste ho PR Ramos-Horta. Foto/Elio dos Santos da Costa

Iha komunikadu ofisiál husi Embaixada EUA ne’ebé Hatutan.com asesu hateten Embaixadora foun EUA ba Timor-Leste, Donna Ann Welton, formalmente aprezenta ninia karta kredensial ba Prezidente Repúblika Demokrátika Timor-Leste, José Ramos-Horta, hodi ofisialmente hahú hala’o ninia misaun diplomátika.

Serimónia ne’e, hetan partisipasaun husi Governu nia ofisiál no membru korpu diplomátiku sira, subliña kona-ba importánsia husi relasaun bilaterál ne’ebé forte entre Estadus Unidus Amérika ho Timor-Leste.

Lee Mós: Pemimpin Redaksi Hatutan.com Francisco Belo Simões Raih Penghargaan Juara Anti Korupsi 2023

Prezidente Ramos-Horta ho Embaixadora Welton halo diskusaun kona-ba tópiku interese mútua nasaun rua ne’e nian, inklui seguransa rejionál, dezenvolvimentu ekonómiku, edukasaun, dezenvolvimentu agrikultura, no sustentabilidade ambientál.

“Sente onra tebes ho responsabilidade hodi formalmente reprezenta Estadus Unidus Amérika – no ninia povu, Prezidente Biden, no mós ami-nia governu – nu’udar Embaixadora Estadus Unidus ba Timor-Leste. Ha’u hakarak tebes atu hahú hala’o ona ha’u-nia servisu ho sériu enkuantu Estadus Unidus kontinua hametin ita-nia relasaun bilaterál. Estadus Unidus Amérika sente orgullu hodi fornese apoiu ba Timor-Leste liuhosi ami-nia ajénsia no programa hirak iha setór importante sira iha ne’e. Nu’udar Embaixadora, ha’u komprometidu hodi lidera Estadus Unidus nia misaun iha ne’e no kontinua hametin parseria ho Timor-Leste hodi promove ita-nia valór demokrátiku kompartilladu sira no vizaun ba Indo-Pasífiku ida ne’ebé livre no nakloke,” Embaixadora Ann Welton haktuir iha serimónia entrega kredensiál.

Tantu Embaixadora no Prezidente Ramos-Horta espresa sira-nia entuziasmu ba futuru relasaun hirak entre Estadus Unidus Amérika no Timor-Leste no sira-nia prontidaun hodi hala’o serbisu hamutuk ba objetivu komún sira.

Biografi badak Embaixadora Welton nian

Embaixadóra foun Estadus Unidus Amérika (UEA) nian mai Timor-Leste, Donna Ann Welton. Foto/Elio dos Santos da Costa

Embaixadora Welton hala’o ona karreira diplomasia ne’ebé eminente dezde tinan 1984. Ninia pozisaun iha rai-liur inklui ona Adjunta Xefe Misaun no Enkarregada Negósiu iha Helsinki, Asistente Xefe Misaun iha Kabul, Ofisiál Asuntu Kultura no Konselleiru Ministru ba Asuntu Polítiku nian iha Tókiu, Konsuladu Jerál iha Sapporo, no Ofisiál Asuntu Kulturál iha Jakarta.

Iha rai-laran (Estadus Unidus), nia serbí ona nu’udar Adjunta Asistente Sekretária Interinu ba Programa no Operasaun iha Ajénsia Asuntu Polítiku-Militáriu no nu’udar Asistente Diretór Komunikasaun iha Estadus Unidus nia Misaun ba Nasões Unidas. (USUN).

Embaixadora Welton ko’alia fluentemente lian Japonés, Koreanu, Indonézia, Alemaun, ko’alia uitoan Dari no Finlandés, no hahú hala’o estudu ba lian Tetun. 

Lee Mós: EUA Apoia Mellora Kampu Aviasaun Iha TL

Jornalista: Vito Salvadór