Hatutan.com, (16 Jullu 2024), Díli—Deskonfia, nomeasaun ne’ebé halo husi Komisaun Funsaun Públiku (CFP, sigla portugés) ho Ministériu Saúde (MS)  bá kargu diretór sira iha Institutu Nasionál Saúde Públika Timor-Leste (INSPTL) nakonu (tendénsia) favoritizmu no grupizmu.

Lee Mós: Setór Saúde Problema Tanba Inkapasidade Governasaun Xanana iha Planeamentu no Jestaun

Komunikasuan grupu WhatsApp entre profisionál saúde sira kona-bá nomeasuan kargu diretór iha setór saúde ne’ebé esplla iha Facebook. Foto/Repro

Liuhusi konferénsia imprensa ne’ebé hala’o husi  Asosiasaun Sientista Laborátoriu Médika Timor-Leste (ACLAM-TL) iha  Ospitál Nasionál Guido Valadares (HNGV), Tersa (16/07/2024), aprezenta sira-nia rejeisaun kona-bá nomeasaun ne’e tanba tau ema la tuir nia méritu no laiha esperiénsia iha área relevante.

Portavós ACLAM-TL, Augusto Mendonça, afirma ACLAM-TL ho INSPTL  haree  nomeasaun ba Kargu Diretór sira iha Laboratóriu da Saúde iha tendénsia grupizmu no la refleta ba rekizitu selesaun pur méritu no rekizitu  profesionál ka esperiénsia iha área laboratóriu.

“Ema sira ne’e ema foun hotu. Ema ne’ebé ami la hatene  durante ne’e servisu iha ne’ebe, oinsá mak nia hatene kona-bá servisu laboratóriu nian,”Augusto Mendonça hateten.

Agostu Mendonça haktuir katak ho lideransa ne’ebe la’ós tuir nia área oinsá mak bele lidera laboratóriu.

ACLAM-TL  informa  xefe unidade  iha laboratóriu HNGV foun ema ne’ebe laiha esperiénsia laboratorium ka sientista, maibé ema ne’ebe ho esperiénsia hanesan dentista. Ho nune’e,  ACLAM-TL  haktuir sira-nia pozisaun hanesan tuir mai:

• Rejeita total lideransa foun sira ne’ebé nomeadu hodi okupa kargu iha Laboratóriu Saúde INSP-TL tanba konsidera ka iha koñesimentu ba Profisionál  Laboratóriu no sei harahun Sistema Asisténsia Laboratóriu iha Timor Leste.
• ACLAM-TL ezije áa Presidente CFP atu dada hikas nomeasaun ne’ebé rekomenda husi Ministra Saúde, ÉliaA dos Reis Amaral  ne’ebé ACLAM-TL konsidera iha tendénsia grupizmu no ffamiliarizmu.
• ACLAM-TL rekomenda ba Ministra Saúde atu propoin kandidatu ho Background Laboratóriu no iha esperiénsia ba Servisu laboratoriu hodi nune’e bele halo mellora servisu Tékniku no Jestaun Laboratóriu nian
• ACLAM-TL rejeita profisaun seluk atu mai lidera laboratóriu  saúde tanba konsidera la koloka ema ba fatin ne’ebé loloos (The Right Man on the Rong Place).

Konferénsia imprensa husi ACLAM-TL iha HNGV, Tersa (16/07/2024). Foto/Leopoldina de Carvalho

ACLAM  mós reforsa tan katak sei halo asaun bainhira parte relevante la konsidera bá sira nia preokupasaun. Tanba ne’e, ACLAM mòs husu ba kandidatu kargu diretór foun na’in-tolu (3) atu kolabora ho ACLAM, hodi rezigna an hodi labele estraga servisu saúde .

ACLAM-TL mós haktuir katak bainhira parte relevante la konsidera hodi la altera nomeasaun ne’ebé iha, maka membru Asosiasaun  iha Timor-Leste laran tomak husi nasionál to’o baze sei foti asaun atu la kolabora ho lideransa foun ne’ebé hetan pose atu lidera Laboratóriu Saúde.

Tuir informasaun katak Ministériu Saúde liuhusi Vise-Ministru ba Fortalesimentu Institusional, José dos Reis Magno sei hala’o serimónia asina termu pose ba kargu Diretór Jerál Servisu Korporativu foun, Diretór Nasional no Xefe Departamentu sira hosi Servisu Munisipál Saúde, HNGV, Servisu Sentrál no seluk-seluk tan iha Tersa loraik ne’e iha Salaun Enkontru Palácio das Cinzas.

Jornalista : Leopoldina de Carvalho