Hatutan.com, (28 Novembru 2021), Dili—Assalam FC rekolla vitória dahuluk iha Liga Futeból Timor Leste (LFTL), hafoin manan adversáriu DIT FC ho skore 3:1.

Assalam FC rekolla vitória dahuluk iha Liga Futeból Timor Leste (LFTL), hafoin manan adversáriu DIT FC ho skore 3:1. Foto/LFTL.

Vitória ne’e halo Assalam FC rekolla pontu 3 dahuluk no sai hosi zona mean hodi okupa pozisaun dalima, iha tabela klasifikasaun provizóriu.

Notísia iha Relasaun:Árbitu “Kakeu”, AD SLB Laulara-Karketu Díli  Fahe Pontu iha Jornada Datoluk

Enkuantu DIT FC mantein iha zona mean ho pontus zero hosi jogu tolu ne’ebé sira enfrenta.

Ekipa DIT FC no Assalam FC  hahú jogu loraik ne’e ho ambisaun as hakarak sai hosi zona mean ho nune’e kada ekipa halo kedan esforsu máximu hodi muda pozisaun iha tabela klasifikasaun provizóriu LFTL hafoin iha jogu rua dahuluk ekipa rua sofre derrota hasoru sira nia adversáriu.

DIT FC lansa kedan ameasa dahuluk ba nia adversáriu Assalam FC bainhira jogu foin hahú minutu ida.

Kapitaun DIT FC José Almeida (7) ne’ebé hetan oportunidade ne’e la konsege ezekuta ho di’ak tanba ekipa adversáriu nia defeza konsege salva bola ho di’ak.

Assalam FC halo esforsu hodi buka oportunidade atu halo kontra atake lais liu hosi kombinasaun liña klaran no avansadu Bonarudin Amin (17) ne’ebé lais maibé DIT FC sei antesipa ho diak.

DIT FC kontinua hasae nia ritmu jogu ho tensi ne’ebé as hodi halo atake ba ekipa adversáriu no iha minutu defeza esquerda Assalam FC Adão Doutel (18) simu kartaun kinur hafoin halo falta hasoru defeza direta DIT FC Ubaldo Belo (16).

DIT FC kontinua lansa ameasa ba ekipa adversáriu liu hosi bola falta maibé Assalam FC kontinua halo esforsu hodi sai hosi presaun no halo kontra atake liu hosi avansadu Martinho Belo (22) maibé seidauk bele produs golu ba nia ekipa.

Jogadór Assalam FC Sebastião dos Santo (55) sofre aleiza iha parte ain nune’e treinadór deside hodi halo kedan substituisaun hodi hatama Derson Ulu (26) iha minutu 19.

DIT FC Koko kuaze fo presaun ba ekipa adversáriu iha kada oportunidade ne’ebé sira iha maibé sei falla iha finalizasaun tanba liña avansadu DIT FC laiha komunikasaun ida diak atu ezekuta oportunidade sira ne’e tuir tarzetu ne’ebé iha.

Assalam FC la hakmate nune’e iha kada oportunidade ne’ebé iha lansa kedan kontra atake hodi hadau oportunidade atu lidera uluk iha jogu ne’e.

Ekipa Assalam FC. Foto/LFTL.

Adeptus Assalam FC haklalak kontente bainhira avansadu Martinho Belo (22) hatama golu maibé arbitu anula desizaun ne’e tanba konsidera hand ball uluk molok golu.

Tempu normal remata no arbitu liu hosi asistente fo tan tempu adisionál minutu 2. Iha minutu rua ne’e Assalam FC konsege aproveita hodi halo golu dahuluk liu hosi Martinho Belo (22) ne’ebé simu asisténsia hosi  Helder Valente (31) hodi muda skore ba 1:0 iha minutu 45+1.

Tama ba segunda parte DIT FC halo kedan substituisaun ba Jogadór iha kada liña hodi hasai Ruben Borges (10), Ervinho Soares (20), Ubaldo Belo (16) no Joanico Guterres (31) hatama Ricardo Nunes (98), Romario Moniz (23), Feliciano Gonsalves (19), Leopoldo Guterres (18) liu hosi substituisaun ne’ebé iha seidauk lori rezultadu ba DIT FC no Assalam FC kuaze domina bola iha minutu dahuluk segunda parte nian no obriga DIT FC tenke esforsu hodi halo balansu ba Assalam FC nia jogu.

Maske Assalam FC domina jogu maibé DIT nafatin konsege halo impata liu hosi golu José Almeida (7) iha minutu 63.

Assalam FC hola inisiativa hodi halo kedan substituisaun ba nia Jogadór iha liña avansadu nune’e hasai hikas Derson Ulu (26) no hatama Augusto da Costa (29) iha minutu 67 atu bele reforsa liña oin hodi bele aumenta golu atu bele rekolla votori. Liu deit minutu balun Assalam FC kontinua halo substituisaun hodi hatama Hasan Costa no hasai.

Husen Costa (27) aumenta tan golu ida ba nia ekipa Assalam FC liu hosi bola ulun hafoin simu asistensia hosi Bonarudin Amin (17) iha minutu 72.

Hafoin golu ne’e DIT FC obrigadu tenke halo substituisaun tanba Jogadór Anito Boavida (13) sofre aleiza.

Liu hosi desizaun tékniku treinadór DIT FC deside hodi hatama Serafim Brito (17) iha minutu 74. Atu save vitória ne’ebé iha Assalam FC kontinua halo substituisaun ba nia Jogadór iha liña klaran hodi hasai Emanuel Tunu (28) no hatama Andrew Budiono (15) iha minutu 75.

Kontinua ho substituisaun ikus hodi hatama mediu defensivu Romalho Gama (14) no hasai Helder Valente (31).

Martinho Belo (22) Jogadór Assalam FC kontinua haboot nia ekipa nia vitória hafoin marka tan golu ida hodi muda skore ba 3:1 iha minutu 90+2.

Hafoin jogu treinadór DIT FC hateten DIT FC sei halo esforsu maximu atu konkista vitória iha jogu sira tuir mai tanba DIT iha ambisaun lakoi degradadu ba segunda divizaun iha epoka oin.

Enkuantu Treinadór Assalam FC Adu Marques hateten antes ne’e ekipa Assalam FC iha ona tarzetu atu sai hosi zona mean ho nnun’e halo esforsu tomsk ho maximu iha jogu datolu ne’e no ikus mai rekolla vitória no sai dunik hosi zona mean ba iha quinta klasifikasaun provizóriu.

Jornalista: Vito Salvadór