Hatutan.com, (22 Outubru 2024), Díli—Loron rua (2) ona, hahú hosi Segunda-Tersa (21-22/10/2024), sistema trata pasaporte ladi’ak ka monu. Nune’e, sidadaun timoroan hirak ne’ebé rejista ona liuhosi ajendamentu online, labele trata sira-nia pasaporte tanba sistema trata pasaporte deskonfia fallansu iha baze dadus husi Server lokál iha Notariadu.

Lee Mós: Eletrisidade Mate-Lakan Prejudika Ajandamentu Online Bá Trata Pasaporte

Timoroan sira tuur hein iha edifisiu Diresaun-Jerál Servisu Rejistu no Notariadu, hodi trata sira-nia pasaporte maibé labele tanba sistema monu no balun hein atu simu sira-nia pasaporte ne’ebé produs ona, Tersa (22/10/2024). Foto/Leopoldina de Carvalho

Tuir observasaun Hatutan.com nian iha edifísiu Diresaun-Jerál Servisu Rejistu no Notariadu, Bebora, Díli, Tersa dadeer ne’e, hatudu katak, ema lubun tenke fila ho oin la haksolok tanba sira lori dokumentu própriu ona mai atu trata pasaporte tuir númeru ajendamentu online, maibé  labele trata sira-nia pasaporte tanba informasaun ne’ebé sira simu direta husi pesoál servisu Diresaun Nasionál Rejistu no Notariadu, katak sistema monu loron rua (2) ona, horiseik ho ohin, tanba ne’e labele trata pasaporte.

Pesoál servisu iha Diresaun-Jerál Servisu Rejistu no Notariadu sira ne’e mós la fó informasaun ho loloos kona-bá bainhira mak bele halo fali atendimentu bá trata pasaporte tanba sira hameno hela de’it, katak Kuarta aban (22/10/2024), bele hakat bá hodi halo konfirmasaun kona-bá posibilidade atu trata pasaporte.

Informasaun seluk mós katak daudaun ne’e númeru kaderneta pasaporte rihun 150 komesa menus ona, maibé posivel boot iha fulan-Dezembru, tinan ne’e, kaderneta pasaporte sei tama tan.  

Husi sorin seluk, Hatutan.com tenta halo konfirmasaun kona-bá situasaun ne’e ho Diretór-Jerál Servisu Rejistu no Notariadu (DGSRN), Agostinho Gonçalves Viera, maibé la konsege tanba parte sira iha Gabinete DGSRN informa katak ohin loron tomak Diretór Jerál Agostinho Gonçalves Viera okupadu ho enkontru sira.

Hanesan informa ona katak, Konsellu Ministrus, iha sorumutuk loron 21 fulan-Fevereiru 2024, rekomenda ba Ministru Justisa hodi halo prosedimentu aprovizionamentu ho ajuste diretu atu sosa kaderneta pasaporte rihun 150 no mákina impresaun pasaporte nian rua, ho objetivu atu garante fornesimentu ba tinan sira tuir mai. 

Governu Konstitusionál IX ne’ebé lidera husi Primeiru-Ministru (PM) Kay Rala Xanana Gusmão, asume ona kompromisu atu solusiona problema falta pasaporte.

Tuir desizaun Konsellu Ministru sira-nian ne’ebé haktuir iha pájina ofisial https://timor-leste.gov.tl/, iha loron 27 fulan-Setembru 2023, hahú ona prosesu aprovizionamentu ida atu halo adjudikasaun urjente ba kaderneta Pasaporte Eletróniku. Iha fulan-Outubru 2023, pakote dahuluk kaderneta pasaporte nian to’o ona Timor-Leste, no husi kedas ne’ebá, entrega ona kaderneta balun, nune’e hodi asegura fornesimentu ne’ebé presiza ba tinan 2024. 

Iha fali loron 18 fulan-Janeiru 2024, Ministériu Justisa, liuhusi Diresaun-Jerál Servisu Rejistu no Notariadu, lansa ona aplikasaun ida kona-bá ajendamentu ‘online’, atu hasa’e efisiénsia no efikásia servisu, iha tempu hanesan atu evita ema bou-malu iha fatin atendimentu.

Jornalista: Leopoldina de Carvalho