Hatutan.com, (24 Outubru 2024), Díli-Negosiante ambulante, Zeka Barreto Borges, hetan tiru ho pistola ne’ebé deskonfia hosi pesoál  membru Polísia Nasionál Timor-Leste (PNTL) ida ne’ebé fó seguransa (eskolta)  Sekretáriu Estadu bá Asuntu Toponímia no Organizasaun Urbana (SEATOU), Germano Santa Brites, iha área Kampung-Baru, Suku Comoro, Postu Administrativu Dom Aleixo, Munisípiu Díli.

Embolku pistola nian ne’ebé sai hanesna evidensia. Foto/Elio dos Santos da Costa

Insidente ne’e akontese iha Kuarta (23/10/2024), haleu tuku 18:00 Otl. Ekipa Jestaun Merkadu Autóridade Munisípiu Díli ne’ebé lidera direta hosi SEATOU Germano Santa Brites, tun iha Kampung Baru Comoro, hodi atua negosiante ambulante sira ne’ebé fa’an hela sasán iha estrada ninin sira.

Durante akontesimentu ne’e, ekipa sira jestaun Merkadu Díli nian, halo asaun ne’ebé konsidera hanesan brutál hasoru negosiante sira, tanba tebe no estraga hotu sasán ka modo sira seluk ne’ebé mak negosiante sira ne’e fa’an hela.

Sente la satisfás ho asaun brutal hirak ne’ebé ekipa sira Jestaun Merkadu Díli ho SEATOU nian halo, negosiante balu konsege kaer hasoru, to’o Membru PNTL ida ne’ebé fó eskolta bá SEATOU, halo alarma tiru bá leten, maibé bala musan ida (embolku) konsege kona iha vítima Zeka Barreto Borges nia liman karuk hodi rezulta kanek gráve.

“Ha’u fa’an modo de’it. Modo, tomate, brinjela. Sira tun mai ne’e, lansung lori ai-dona hasoru kedas. Entaun, polísia ida fali ne’e, nia tiru tiha pistola mai, entaun, ha’u monu tiha ona,” vítima haktuir ba jornalista sira, Kinta (24/10/2024).

Maske Zeka monu no tiha ona iha rai, maibé nia sei iha forsa, foti telefone hodi komunika bá família sira informa kona-bá situasaun ne’e, no husu atu família sira bá lalais haree nia kondisaun.

To’o iha ne’ebá, vítima ho nia reprezenta família balu hamutuk ho negosiante sira ne’ebé nia sasán mós hetan estragu, koalia direta ho SEATOU nia eskoltu ne’e, no hatudu mós kartus maten ne’ebé pesoál membru  PNTL tiru sai.

Pesoál membru PNTL ne’e mós rekoñese katak, nia mak tiru duni, no dezafia vítima atu lori kazu ne’e bá oin, tanba nia prontu atu hatán bá Autóridade Judisial sira iha Tribunál.

“Ha’u hatudu bala musan ne’e bá Polísia ida tiru ne’e, ha’u dehan, ohin ó tiru ne’e mak ha’u kaer hela ne’e. Ne’e mak nia dehan, ohin ne’e ha’u alarma bá leten de’it. Ha’u la’os tiru. Agora, ó hakarak lori kazu ne’e bá oin, bá mak depois ha’u tuir,” Zeka Borges haktuir.

Família Kondena

Vítima Zeka Barreto Borges hala’o hela tratamentu iha HNGV. Foto/Elio dos Santos da Costa

Reprezentante família liuhosi Portavós José Martins “Teki-Liras”, kondea tebes hahalo brutál sira ne’ebé komete hosi SEATOU ho ekipa Jestaun Merkadu ka Guarda Munisipal Dili ho Membru PNTL balu.

Reprezentante família sira mós sei aprezenta keixa bá Ministériu Públiku (MP), Policia Ciêntífica e de Investigação Criminal (PCIC), hasoru SEATOU ho ekipa sira, nune’e bele prosesa tuir dalan legál.

“Atitude ka hahalok sira ne’e hanesan krime públiku, tanba uza arma tiru sidadaun ka povu ki’ik sira ne’ebé mak buka moris. No ami sei foti prosesu bá ministériu públiku no PCIC, hodi prosesa tuir lei ne’ebé mak vigora iha nasaun RDTL,” José Martins “Teki-Liras,” José Martins “Teki-Liras” hateten liuhosi konferénsia imprénsa iha nia rezidénsia Bidau Tokoh-Baru, Díli.

“Ami mós husu responsábilidade todan bá SEATOU, tanba nia ordém maka hamosu asaun brutalizmu hosi Guarda Munisipiu Dili ho membru Polisia, maka konsege halo rahun vítima sira nian sasán, osan lakon, no tiru kanek mós vítima iha fatin,” Teki-Liras afirma.

Hosi aktu brutalizmu ne’e, rezulta vítima hetan kanek todan iha kotuk laran, oin bubu, lima no ain kanek, bubu inklui estraga mós vítima nia sasán (modo, tomate, repollu ai-manas) rahun, inklui vítima nia osan ho montante $170.00 mak lakon iha fatin akontesimentu.

Vítima oras ne’e baixa hela iha Hospitál Nacional Guido Valadáres (HNGV), Bidau-Dili, no ezultadu teste X-Ray hatudu katak, vítima nia liman tuir tohar. Tanba ne’e maka, vítima kontinua hala’o tratamentu intensivu iha HNGV, tanba membru Polísia tiru ho pistola.

To’o notísia ne’e publika, Hatutan.com, seidauk halo konfirmasaun ho Komandu PNTL kona-bá ninia membru ne’ebé deskonfia ho pistola tiru kanek negosiante Zeka Borges iha Kampung-Baru, Comoro, Díli.

Jornalista: Rogério Pereira Cárceres