Hatutan.com, (30 Novembru 2021), Dili—Governu liuhosi Ministériu Interiór (MI), foti ona desizaun hodi loke hikas postu integradu Fronteira Terrestre entre Timor-Leste ho Repúblika Indonézia (RI), hanesan Mota-Ain Bobonaro, Salele, Covalima no Sakato Reijiaun Administrativa Espesiál Oecusse Ambeno (RAEOA), dala rua kada semana iha Kuarta no Sesta.

Fronteira Terrestre entre Timor-Leste ho Repúblika Indonézia (RI), Batugade Bobonaro. Foto/Hatutan.com.

Desizaun governu nian ne’e, bazeia ba dekretu lei númeru 26/2021 iha artigu 18 ne’ebé públika iha Jornál Repúblika iha loron 26 Novembru 2021, kona-bá funsionamentu postu fronteira terrestre Mota-Ain, Salele no Sakato.

Vise-Ministru Interiór, António Armindo hateten Governu deside loke fali fronteira terrestre tolu ne’e, maibé autoriza de’it ba semana ida dala-rua, sai iha loron Segunda no tama iha loron Kuarta.

“Sei loke de’it iha Segunda tuku 09:00 to’o tuku 15:00 bele sai hosi territóriu nasionál ba ema no sasan merkaduria. Iha Kuarta entre tuku 09:00 to’o tuku 15:00, autoriza ema no sasan merkaduria hosi nasaun seluk bele tama territóriu nasionál,” António Armindo, hateten via komunikadu ne’ebé www.hatutan.com, asesu Tersa (30/11/21).

Iha komunikadu ne’e dehan, bainhira entrada ruma hosi nasaun seluk mai Repúblika Demokratika Timor-Leste (RDTL), sei delega kompeténsia tomak ba Ministériu Interiór liu hosi Diresaun Jerál Servisu Migrasaun, hodi autoriza ema tama iha territóriu  tuir porsesu normál.

Governu deside autoriza entrada no saida ba loron rua nia laran iha kada semana, maibé kuandu iha semana rua tolu mak situasaun komesa di’ak ona, sei bele loke ona fronteira tuir prosesu normál hanesan no presija jere de’it mak tempu.

Nune’e, ho dekretu lei númeru 26/2021 iha artigu 18 ne’ebé públika iha Jornal Republika iha loron 26 novembru 2021, kona-bá funsionamentu postu fronteira terestre sira, la presija ona halo pedidu aprovasaun ba Centro Integrado Gestão Crise (CIGC) hodi tama iha pontu entrada TL tuir oráriu ne’ebé fó-sai ona, maibé tenke kumpre nafatin protokolu saúde nian.

“Uluk ema atu tama mai teritoriu nasional tenke hetan autorizasaun hosi Sentru Integradu Jestaun Krize, maibe hosi ohin ba oin ita aplika prosesu normál lei Migrasaun nian. Maibé,  nafatin loke ba loron rua  de’it kada semana. Maski ita laiha ona Estadu Emerjénsia, maibé ita nafatin haree dezenvolvimentu situasaun iha fronteira ho didi’ak tanba moras Covid-19 ne’e seidauk hotu no posibilidade bele mai ho variante foun iha kualkér tempu. Entaun, estratejia ne’ebé Ministériu Interiór haree katak, presija nafatin prevensaun iha fronteira hodi diminui risku moras Covid-19  variante foun mai TL”, subliña.

Governu  mós husu komunidade atu labele halo movimentu illegál, tanba postu fronteira tolu loke ona ba públiku.

Iha 24 Novembru 2021, Konsellu Ministru (KM), Hafoin análiza ba pontu situasaun epidemiolójika nasionál, ne’ebé aprezenta hosi koordenadór sira Sala Situasaun Sentru Integradu Jestaun Krize nian (SIJK) no haree ba promulgasaun foin lalais kona-bá alterasaun dahuluk Lei nú. 10/2004, Lei Sistema Saúde, deside la propoin renovasaun Estadu emerjénsia, ne’ebé termina iha loron 28 fulan-Novembru.

Iha Reuniaun KM ne’e mós Aprova kedan projetu Dekretu-Lei kona-bá medida esesionál no temporária vijilánsia sanitária nian ba resposta pandemia COVID-19.

Kompara ho medida vijente sira no diploma mantein parte boot hosi medida imposta no rejista alterasaun balun, hanesan bainhira tama mai territóriu nasionál la presiza hetan autorizasaun hosi Primeiru-Ministru, maibé tenke sujeita nafatin ba kontrolu sanitáriu no hatudu rezultadu negativu teste SARS-CoV-2 nian.

Lisensa, autoridade no aktu administrativu sira seluk no dokumentu sira mantein válidu to’o loron 31 fulan-Dezembru tinan 2021, bainhira prazu la fiksa tuir  akordu internasionál la tuir lei ne’ebé Parlamentu Nasionál (PN) aprova tuir rezerva kompeténsia absoluta. Nafatin halo izolamentu profilátiku obrigatóriu iha termu sira ne’ebé define antes ona.

Jornalista: Rogério Cárceres