Hatutan.com, (24 Janeiru 2022), Díli—Polísia Nasionál Timor-Leste (PNTL), Komandu Munisípiu Bobonaro, Eskuadra Bobonaro, iha Sábadu 22 Janeiru 2022, tuku 18:23  detein joven mane na’in-tolu, tanba hala’o transaksaun sigaru ho ilegál hosi fronteira, no hatama liuhosi Suku Gildapil, Postu-Administrativu Lolotoe.

Joven na’in-tolu ne’ebé PNTL detein tanba hala’o transaksaun illegal ba sigaru iha Fronteira, Suku Gildapil, Postu-Administrativu Lolotoe, Bobonaro, Sábadu (22/01/2022). Foto/PNTL.

Prosesu detensaun ne’e akontese, liuhosi atividade pasa revista ne’ebé hala’o hosi Ofisiál Polísia Suku (OPS), Aiasa, Kota-Boot, Molop inklui ajente sekreta hosi Unidade Patrullamentu Fronteira (UPF), iha liña fronteira no konsege hapara karreta kamioneta tolu, ne’ebé kondúz hosi joven mane na’in-tolu ne’e, tula hela sasán ho ilegál hosi Atambua, Indonézia, mai Timor-Leste (TL).

Notisia iha Relasaun:Deskobre fukun-sira fó espasu ba pasajen ilegál buras iha fronteira

Komandante PNTL Munisípiu Bobonaro, Superintendente Polísia, António “Mauluta”, hateten  sidadaun na’in-tolu ne’e membru sira PNTL nian detein, liuhosi servisu vijilánsia iha fronteira terrestre TL ho Indonézia. 

“Iha Sábadu tuku 18:23 ita nia membru PNTL hosi Esquadra PNTL Bobonaro, ho ajente sekreta UPF servisu konjunta hala’o patrullamentu iha área fronteira, hapara karreta truck tolu no konsege kaptura joven mane na’in-tolu iha Suku Gildapil tanba hala’o atividade komérsiu ilegál ba sigaru ne’ebé hatama liu dalan ilegál hosi Atambua,” Hatutan.com sita deklarasaun Komandante PNTL Munisípiu Bobonaro, Superintendente Polísia, António “Mauluta”, iha komunikadu.

Joven na’in-tolu ne’ebé PNTL detein tanba hala’o transaksaun illegal ba sigaru iha Fronteira, Suku Gildapil, Postu-Administrativu Lolotoe, Bobonaro, Sábadu (22/01/2022). Foto/PNTL.

Sidadaun na’in-tolu ne’ebé PNTL deskonfia nu’udár suspeita iha kazu ne’e, oras-ne’e daudaun UPF liuhosi Kompañia Alfa Tunubibi halo ona identifikasaun ba objetu hirak-ne’e no suspeitu sira deklara katak, objetu hirak-ne’e nia na’in maka sidadaun ida ho inisiál E, hela iha aldeia Gildapil, Suku Gildapil, Postu Administrativu Lolotoe.

Suspeitu sira na’in-tolu ne’e, ida ho naran inisiál DhB (24), hela iha Suku Gildapil, aldeia Atus, no karreta ne’ebé nia kondúz, ho xapa matrikula A.53.459 TL.

Sasán ne’ebé transporta iha karreta laran mak hanesan, sigaru ho marka Gudang Garam Surya, hamutuk kaixa 7, Tabaku marka Pohon Sagu, ho kaixa 52, ne’ebé falun hamutuk ho kafé-kulit hamutuk 36 sakas, iha karón laran.

Suspeitu ida tán ho inisiál FjC (25), hosi Suku Gildapil aldeia Gildapil, xapa matrikula karreta nian maka, A. 52.099 TL.

Sasán ne’ebé tula iha karreta laran mak hanesan, sigaru marka Gudang Garam Surya kaixa 14, Tabaku Pohon Sagu kaixa 10 falun iha karon laran hamutuk ho Kami iha saka 26.

Suspeitu ida seluk ho inisiál TdJ (30), Suku Gildapil aldeia Gildapil ho xapa karreta A.50.704 TL. Iha karreta ne’e nia laran, tula sasán sira mak hanesan, sigaru Surya iha kaixa 19, tabaku Pohon Sagu, ho kaixa 14, ne’ebé falun hamutuk iha karon, inklui produtu kami ho saka 24, hatama hotu hosi Indonézia.

Agora daudaun suspeitu na’in-tolu ne’e, hamutuk ho evidénsia sira ne’e entrega ona ba Komandu PNTL Munisípiu Bobonaro, hodi halo prosesu identifikasaun atu submete ba prosesu investigasaun.

Jornalista: Rogério Pereira Cárceres