Hatutan.com, (21 Abríl 2025), Díli–Líder espirituál Igreja Katólika Romana nian, Papa Francisco mate iha Segunda-feira, 21 Abríl 2025, ho tinan 88. Nia dada iis ikus iha nia rezidénsia iha Casa Santa Marta, Vatikanu, hafoin fulan balun luta hasoru infesaun pulmaun ne’ebé prolongadu.

Lee Mós: Papa Francisco Hakotu Iis, Timor-Leste Tama Períodu Lutu Nasionál Semana Ida

Papa Francisco hasé sarani sira bainhira nia sai hosi audiénsia jerál semanál iha loron 01 fulan-Maiu 2024 iha salaun Paulo-VI iha Vatikanu. Foto/Dok.Vatikanu

Hanesan parte ida hosi tradisaun Santa Sé nian, Vatikanu agora tama iha períodu lutu nian durante loron-neen (6) ka Novemdiales. Durante períodu ida-ne’e, atividade litúrjiku no estadu nian oioin hetan suspensaun, no ema katóliku sira iha mundu tomak hetan enkorajamentu atu halo misa funeráriu sira nu’udar forma ida respeitu finál nian.

Sita hosi The Live Nagpur, públiku sei hetan oportunidade atu fó sira-nia respeitu ba Papa Francisco nia mate-isin. Maibé, la hanesan ho nia antesesór sira, nia mate-isin sei la hatudu iha palku ka iha kaixaun nakloke, maibé sei hela iha kaixaun ida tuir nia pedidu ba simplisidade.

Planu Funerál

Hein katak funeral sei hala’o iha loron haat to’o neen nia laran hafoin mate. Francisco sei hakoi iha Bazílika Santa Maria Maggiore nian, nia fatin favoritu ba orasaun privada. Nia mós husu atu hakoi iha kaixaun ai ida de’it ne’ebé taka ho zinku, la ho kamada tolu tradisionál.

Hanesan parte tradisaun nian, hena seda mutin ida sei tau iha matebian nia oin molok taka kaixaun. Rogito ida, sumáriu ida kona-ba nia moris no pontifikadu, no saku ida ho osan-besi sira hosi nia reinu sei inklui mós iha kofre.

Francisco nia saída marka rohan hosi papadu ida ne’ebé fó énfaze ba kompaixaun no igualdade. Igreja Katólika oras ne’e tama iha períodu reflesaun no tranzisaun nian, hodi hein susesór ida ne’ebé sei lori estafeta espirituál ba kapítulu tuir mai.

Fontes: metrotvnews.com