Hatutan.com, (03 Dezembru 2021), Dili— Ministru Transporte no Komunikasaun (MTK), José Agostinho da Silva, orienta ona Autoridade Nacional Comunicação (ANC), atu fó atensaun ba kompañia telekomunikasaun sira ne’ebé durante ne’e ativu ba fornesimentu internet iha Timor-Leste (TL), bele hadi’a rede, tanba utilizadór sira preokupa ho liña ne’ebé lenuk hosi loron ba loron.

Ministru Transporte no Komunikasaun (MTK), José Agostinho da Silva. Foto/Média MTK.

José Agostinho da Silva, ko’alia asuntu ne’e perante deputadu-sira iha Uma Fukun Parlamente Nasionál (PN), iha ámbitu diskusaun Orsamentu Jerál Estadu (OJE) 2022, loron datolu, Sesta (03/12/21).

Ministru ne’e rasik preokupa tanba nia akompaña iha média sosiál katak, durante ne’e públiku preokupa makás ho liña internete, nune’e presija duni tau atensaun ba kompañia telekomunikasaun sira atu haforsa kobertura ba populasaun hotu iha territóriu TL.

“MTK liu hosi ANC, alerta ona ba Timor Telecom, Telemor  no Telkomcel, oinsá hadi’a sira-nia kobertura ba ita nia populasaun iha territóriu nasionál, nune’e sira bele aseseu rede internet ho lais no di’ak,” José Agostinho da Silva, hateten.

Advertisement

09 Dezembru Berlin Ramelau to’o TL

José Agostinho da Silva, aproveita oportunidade ne’e mós hodi informa ba deputadu sira katak, Ró Ahi Berlin Ramelau, sei to’o iha Timor-Leste (TL), iha Kinta 09 Dezembru 2021.

Iha 17 Novembru 2021, ró ne’e hetan ona aprovasaun téknika hosi instituisaun klasifikasaun rupia nian Di-enen JVL Alemaña, no iha 24 Novembru, sai ona hosi sidade Sanhai Xina, mai TL.

“Teknikamente konstrusaun Ro Ahi Berlin Ramelau kompleta ona 100%. Tuir oráriu ne’ebé mak iha, sé buat hotu la’o di’ak, sei to’o iha ne’e iha 09 Dezembru. Ha’u ohin konfirma Notru Satelite, ro ahi ne’e oras ne’e daudaun iha ona entre tasi Taiwan no Filipina,” nia esplika.

Tuir informasaun meteorolójia ne’ebé mak iha, hatudu katak, velosidade anin iha tasi-laran, oras ne’e dadaun atinje 80 knots kada oras, ho ondas hamutuk metru-haat, no ida ne’e perigu.

Advertisement

“Entaun, ita nia roo ahi ne’e sei dezloka neneik. Bainhira to’o iha ne’e, ita iha konektividade marítima, Dili ba Atáuro, Dili ba Oecusse, aseguradu,” Ministru Agostinho, subliña.

Kona-bá, Ro Ahi Berlin Nakroman ne’ebé mak avaria desde tinan 2021, oras ne’e daudaun iha ona rezultadu konkursu ba kompañia manan na’in.

Tuir informasaun hosi tékniku sira koloka katak, tuir planu, aban sábadu (05/12/2021), Exper Parte hosi Ro Ahi ne’e sei to’o iha TL, hodi hadi’a uluk ro ne’e nia parte balun, hafoin dezloka ba halo manutensaun iha Indonézia.

Jornalista: Rogério Pereira Cárceres

Advertisement