Hatutan.com, (17 Agostu 2025), Díli—Povu no Estadu Japaun liuhosi sira-nia Ajénsia Japoneza ba Kooperasaun Internasionál (JICA) iha Timor-Leste apoiu orsamentu millaun US$20 hodi finansia konstrusaun foun edifísiu Maternidade Ospitál Nasionál Guido Valadares (HNGV).

Lee Mós: JICA Sei Oferese-tán Millaun $19,6 bá Projetu Rekualifikasaun HNGV

PM Xanana halo lansamentu ba projetu edifisiu Maternidade andár haat iha HNGV. Foto/ Juvinal Cabral dos Santos

Edifísiu  maternidade HNGV andár haat ne’e iha sala hamutuk 77 ne’ebé atu konstrui husi empreza Wakachiku Construction Co, Ltd  ho empreza konsultoria  Oriental Consultants Global Co., Ltd, ne’ebé tuir kontratu sei termina iha fulan-Abríl 2027.

Primeiru-Ministru (PM), Kay Rala Xanana Gusmão, ne’ebé ofisiálmente hatuur fatuk-inan ba projetu ne’e,   Domingu (17/08/2025), hato’o agradese ba apoiu povu Japaun nian mai povu Timor-Leste ne’ebé harii tan edifísiu maternidade ne’ebé kompleta ho fasilidade moderna sira.

Tuir Xanana, konstrusaun edifísiu maternidade HNGV ho andár haat ne’e nu’udár faze ida ba dezenvolvimentu servisu ospitál nian atu oinsá fó atendimentu saúde ne’ebé di’ak liu  ba povu.

Xanana konsidera apoia  povu Japaun nian ne’e atu reforsa kooperasaun povu Japaun nian ho Timor-Leste, liuliu iha área saúde hodi mellora servisu saúde ba povu atu hetan asisténsia saúde ne’ebé di’ak liután.

“Setór saúde nu’udár setór ne’ebé importante tebes ba ema, tanba ne’e, ho apoiu ida ne’e ba futuru bele mellora atendimentu  ba povu ho di’ak bainhira povu hakarak halo tratamentu,” Xanana Gusmão afirma.

Iha biban ne’e, Ministra Saúde Élia dos Reis Amaral, hateten  projetu konstrusaun maternidade HNGV andár haat ne’e apoia gratuitu husi povu Japaun mai povu Timor-Leste. Nune’e, lori Governu nian naran kongratula povu Japaun ba apoiu importante ida-ne’e.

“Japaun no Timor-Leste nu’udár nasaun amigu ne’ebé halo relasaun di’ak to’o ohin loron, ha’u agradesimentu sériu ba povu Japaun ne’ebé apoia tebes Timor-Leste iha área  saúde nian,” Ministru Élia Amaral hateten ba jornalista sira.

Iha fatin hanesan, Embaixadór Japaun ba Timor-Leste, Tetsuya Kimura dehan ne’e onra boot ba nia  atu bele tuir serimónia lansamentu hatuur fatuk-inan ba projetu konstrusaun maternidade andár haat HNGV nian ne’e.

Tuir nia, bainhira Timor-Leste  prepara  nia adezaun formál ba ASEAN iha fulan Outubru 2025,  presiza tebes hadi’a asesu ba kuidadu médiku ho kualidade saúde sai importante liu tan.

Nia dehan, durante tinan sanulu liubá, Japaun fó apoiu liu millaun $80 ba setór saúde Timor-Leste nian, inklui harii no hadi’a fasilidade emerjénsia obstétriku no kuidadu neonatal hamutuk 20 iha munisípiu 12, estabelese postu saúde iha área remota sira, fornese ambulánsia, no oferese formasaun médiku ho bolsa estudu ba ofisiál sira Ministériu Saúde nian.

Reprezentante JICA iha Timor-Leste, Daisuke Fukumori hateten, JICA asina akordu subsídiu nian ho Governu Timor-Leste nian iha loron 20 fulan-Agostu tinan 2024, hodi fornese ajuda subvensaun nian to’o billaun  3.093 yen (purvolta millaun US$20) ba projetu ba hadi’a HNGV.

Objetivu husi projetu ne’e,  Daisuke Fukumori  esplika, atu hametin kapasidade prestasaun servisu no hasa’e kualidade servisu médiku husi HNGV, ne’ebé sai hanesan  úniku ospitál nível terseiru iha nasaun ne’e, liuhusi konstrusaun instalasaun sira no fornesimentu ekipamentu médiku relasionadu.

Nia hatutan, projetu ne’e inklui konstrusaun edifísiu foun ho andár haat ba departamentu ambulatóriu, sala operasaun sira, Departamentu Fornesimentu Esteril Sentrál (CSSD), Departamentu Traballu kompromisu Ministériu Saúde nian.

Lansamentu projetu ospitál andár haat ne’e  akompaña husi Ministru Saúde, Élia  A.A dos Reis Amaral, Embaixadór Japaun mai Timor-Leste, Tetsuya Kimura,  reprezentante JICA iha Timor-Leste, Daisuke Fukumori ho mós konvidade onra sira seluk.

Jornalista: Juvinal Cabral dos Santos