Hatutan.com, (25 Agostu 2025), Díli-Diretór  Diresaun Servisu Seguransa Rodoviária Nasionál, Superintendente Asistente Polísia, Domingos Sarmento Gama, husu kompaña sira ne’ebé mak iha veíkúlu pezadu atu kumpre oráriu sirkulasaun iha  kapitál Díli hodi Evita engarafamentu.

Diretór Diresaun Servisu Seguransa Rodoviária Nasionál, Superintendente Asistente Polísia, Domingos Sarmento Gama. Foto/Juvinal Cabral dos Santos

Tuir Dekretu-Lei tinan hirak liubá  no vigora dezde  loron 01 fulan-Fevereiru 2021, bandu veíkulu pezadu sira, halo operasaun iha parte tuku 07:00 dadeer  to’o tuku 09:00 dadeer, no meudia  12:00 to’o 14:00 no tuku 17:00 to’o  tuku 21:00 Otl.

“Ita haree iha Díli laran ne’e kuaze loro-loron haree movimentu veíkulu pezadu sempre livre halo sirkulasaun, mézmu orden iha tiha ona,” Superintendente Asistente Polísia, Domingos Sarmento Gama ba jornalista sira bainhira halo auto stop ba veíkulu pezadu sira  iha Tasi-tolu, Segunda (25/08/2025).

Komadante tranzitu esplika veíkulu sira ne’ebé halo movimentu iha munisípiu Díli identifika ba sira ne’ebé mak iha autorizasaun, nune’e mós presiza identifika ho kompañia sira  ne’ebe kontratu governu kategoria emerjénsia hodi aprtezenta prova iha dokumentu komrpovativu sira.

Autoridade seguransa ne’e informa nia sei halo komfirmasaun ba komadante komandu munisipiu Díli nune’e mos xefe seksaun tranzitu Díli kona-bá  karta sirkular balun ne’ebé motorista sira aprezent,a maibé la mensiona plat veíkulu sira halo movimentu.

Informasaun ne’ebé Diresaun Servisu Seguransa Rodoviaria Nasionál asesu liuhusi diretora Diresaun Nasional Transporte Terestre (DNTT) katak hahú husi fulan-Janeiru to’o mai fulan-Juñu ne’e, motorizada ne’ebé mak tama rejistu fulan ne’en liu 20.000.

Iha fatin hanesan Kondutor kompañia Star King,  Armando de Deus Martins hateten sira halo sirkulasaun bazeia ba karta lisensa ne’ebé mak husi Polísia no mós Diresaun Nasionál Transporte Terestre (DNTT).

“Ami mós kumpri tenke halo moris dokumentu no karta kondusaun, ami halo moris hotu ami tenke lao tuir oras ne’ebé mak husi komadante sira fó, ami nia movimentu hahu dader tuku 08:00 ba leten to’o 11:40 no mós, parte loraik tuku 15:30 to’o 16:40 ida ne’e mak durante ami halo,” nia hateten.

Jornalista: Juvinal Cabral dos Santos