Hatutan.com, (26  Agostu 2025), Díli– Prezidente Parlamentu Nasionál (PPN), Maria Fernanda Lay, konfirma katak karreta sira ne’ebé durante ne’e deputadu sira uza kondisaun la diak hotu ona, tanba ne’e iha duni nesesidade atu sosa karreta foun.

Lee Mós: Sosa Viatura Foun Bá Membru PN iha Ona CNA

Karreta tuan ne’ebé membru PN sira utiliza durante ne’e. Foto/Zita Menezes

“Karreta sira ne’e aat hotu ona, ha’u maka hatene aat ka lae, tanba ne’e maka Konsellu Administrasaun aprová iha tinan kotuk orsamentu bá hodi sosa  karreta bá tinan ida-ne’e, ne’ebé ita tenke troka duni, se lae ita gasta osan bá manutensaun boot tebes,” Maria Fernanda Lay bá jornalista sira iha PN, Tersa (26/08/2025).

PPN  afirma  la’ós Parlamentu Nasionál de’it maka sosa karreta, sosiedade sivíl tenke kontrola mós instituisaun hotu-hotu ne’ebé hola karreta no uza la tuir dalan.

Iha fatin hanesan membru Bankada CNRT Cedelizia Faria dos Santos hateten orsamentu bá sosa karreta ne’e aprová tiha ona iha tinan 2024 iha OJE 2025 nian, nune’e agora iha prosesu hein atu sosa de’it ona.

“Hanesan komisaun C ita mós preokupa ho fundu min-arai ne’ebé maka menus bá bei-beik, maibé Parlamentu ne’e ami Deputadu  tuan sira nian karreta ida prado ne’e maka ha’u hanoin antigu demais liu. Entaun difikulta sira bá halo sira nian atividade iha munisipíu sira,”  Deputada Cedelizia Faria dos Santos hateten.

Iha sorin seluk Xefe Bankada PLP, Deputada Maria Angelina Sarmento hateten,  kona-bá asuntu sosa karreta nian ne’e kompeténsia Bankada Governu CNRT ho PD.

“Tanba  laiha fatin bá ami halo proposta alterasaun iha diskusaun debate OJE  2025. Buat hotu liu tiha ona, aprovasaun orsamentu liu ona, tinan ida-ne’e tinan ezekusaun nian, ita-boot sira haree tinan bá kotuk iha Governasaun sira anteriór kuandu ko’alia kona-bá sosa karreta iha Parlamentu Nasionál oin ne’e rai nakdoko,” Deputada Maria Angelina.

Nia afirma,  iha tinan 2024 liubá iha momentu diskusaun bá orsamentu atu sosa karreta laiha ema ida maka atu hakilar.  Bankada opozisaun halo proposta atu hasai orsamentu sosa karreta, maibé laiha dalan atu halo diskusaun no oposizaun nia proposta halo baralla tiha.

Membru PN ne’e hatutan, katak karreta sira agora daudaun membru  Deputadu sira uza ne’e balu maka kondisaun aat no balu bele uza hela, ne’ebé laiha razaun.

Governu aloká  Orsamentu Jerál Estadu (OJE) tinan fiskál 2025 bá Parlamentu Nasionál nian ho montante  $23,509,772,  fahe bá kategória Saláriu no Vensimentu $11,934,844, Béns no Servisus $6,160,019, Transferénsia Públika $985,697, Kapitál Menór $4,429.212, Kapitál Dezenvolvimentu zero ka laiha.

Jornalista : Zita Menezes