Hatutan.com, (09 Setembru 2025), Díli–Polémika  fornesimentu kombustivel no manutensaun karreta bá iha Rádiu Televizaun Timor-Leste Empreza Públiku (RTTL, E.P), Organizasaun Naun Governamentál, liu-husi Asosiasaun Hali bá Dame (HABADA) konsidera iha tendénsia  korrupsaun.

Lee Mós: LABEH Husu CAC Labele Lentu Investiga Kazu Fornesimentu Kombustivel no Manutensaun Karreta RTTL, E.P

Diretór Ezekutivu Asosiasaun Hali bá Dame (HABADA), Abel Amaral

Diretór Ezekutivu Asosiasaun Hali bá Dame (HABADA),  Abel Amaral  bá  Hatutan.com, iha nia knaar fatin  Kampu Barru, Comoro, Díli,  Tersa (09/09/2025) informa    HABADA  hanoin  no haree kazu fornsesimentu kombustivel ho manutensaun karreta iha RTTL,E.P sai tiha ona polémika, ne’ebé iha ligasaun la di’ak bá prátika  boa governasaun.

“Ezemplu hanesan  polémika iha RTTL,E.P ne’e kona-bá  fornsesimentu  kombustivel  no manutenssaun karreta, iha RTTL,E.P,  mosu famíliarizmu, poletizasaun,  tenderizasaun sira ne’e, ida ne’e ami bele  dehan katak polémika, maibé  ne’e komete ona korrupsaun,” Diretór Ezekutivu HABADA,  Abél Amarál hateten.

Abél Amarál husu  mós  bá Prezidente Rádiu Televizaun Timor-Leste Empreza Públiku( RTTL,E.P) Elizeu Isaac Fernandes,    ne’ebé lidera  instituisaun estadu, tenke garantia  Governasaun di’ak no  transparente.

Nia mós husu bá Komisaun Anti Koorupsaun (CAC-sigla Portugés), atu  halo investigasaun bá Prezidente RTTL,E.P Elizeu Isaac Fernandes  ho nia estrutura sira, atu nune’e,  la bele hamosu famíliarizmu iha prosesu instituisaun estadu nian

“Husu parte kompetente hanesan CAC tenke halo ona investigasaun   ka inspesaun ida,  bá lideransa  sira iha RTTL.E,P hodi nune’e la bele  halo tuir saída maka sira hakarak, tanba prosesu tenderizasaun ne’e tenke kumpre rekiziu ne’ebé kontempladu iha Rejime Juridiku Aprovizionamentu,” ia sujere.

“Ha’u lee  Notisia Hatutan.com  kona-bá despaisu husi Prezidente RTTL,E.P ita konsidera pulitizasaun, má-administrasaun no ikus mai mosu korrupsaun,” nia dehan.

Nia salienta, kuandu mosu ona korrupsaun, nia konsidera Prezidente RTTL E,P komete ona irregularidade, no krime korrupsaun, tanba ne’e tenke investiga didi’ak hodi hasoru prosesujJustisa ninia.

Nia mós husu bá  parte Governu  liu-liu Sekretáriadu Estadu Komunikasaun Sosiál,  atu  fó aviza  bá lideransa RTTL, E.P  ne’ebé tutela bá SEKOMS, hodi promove akontabilidade, Governasaun di’ak no transparansia, atu evita buat sira  ne’ebé maka  mosu iha  RTTL.E.P

“Ita husu mós bá estadu atu orienta nia sub-ordinariu sira, tenke fó hanoin  atu evita interese prosesu prátika  famíliarizmu, promove akonntabilidade, Governasaun di’ak,  liuliu hanesan “RTTL E,P,” nia dehan.

Fó hanoin fila katak Prezidente Konsellu Administrasaun Rádiu Televizaun Timor-Leste, Empreza Públiku (RTTL,E.P), Elizeu Isaac Fernandes, deskonfia halo abuzu podér no hamosu prejuízu ba Estadu iha foti desizaun ba projetu  servisu fornesimentu kombustivel ho servisu manutensaun karreta iha RTTL,E.P.

Prezidente Konsellu Administrasaun RTTL,E.P, Elizeu Isaac Fernandes, uza nia kompeténsia hodi hatún despaxu fó projetu servisu fornesimentu kombustivel ho servisu manutensaun karreta ba kompañia rua (2) ne’ebé la prienxe rekizitu iha selesaun dokumentu no aprezenta presu boot ka la razoavel.

Tuir dokumentu  relatóriu avaliasaun servisu fornesimentu kombustivel ho klasifikasaun importante no númeru referénsia 07/Ekipa Juri/RTTL,E.P/IV/2025 ne’ebe    Hatutan.com  asesu hatudu, katak ekipa juri ho nia kompozisaun hanesan Marcelino Osorio (prezidente juri), Lenia de Fátima Moreira (juri), ho Melchior Tino Ribeiro Rodrigues (juri) halo enkontru iha loron 25 fulan-Abríl 2025, deside  kompañia Aitula Fuel’s Unipessoal, Lda, hodi fornese kombustivel ba RTTL,E.P ho razaun presu razoavel no dokumentu ne’ebé kompañia submete kompletu tuir duni rekizitu ne’ebé RTTL,E.P mensiona.

Iha tabela avaliasaun dokumentu ba projetu servisu fornesimentu kombustivel ho nia kustu ka presu $40,000.00, hatudu kompañia Aitula Fuel’s Unipessoal, Lda hetan valor 130 no aprezenta montante orsamentu ki’ik $34,39. Kompara ho kompañia Mãe da Graça Unipessoal, Lda, ne’ebé prezidente  Konsellu Administrativu RTTL,E.P, Elizeu Isaac Fernandes, indika hodi manan fali servisu fornesimentu kombustivel ba RTTL,E.P ho kustu $35,78 no hetan valor iha avaliasaun dokumentu 115 de’it.

Iha dokumentu karta akompañamentu ne’ebé Diretora Nasionál Administrasaun no Finansas RTTL,E.P, Noviana de Fátima Nahak, asina iha loron 29 fulan-Abríl 2025, hato’o ba Diretór Ezekutivu RTTL,E.P, João Guterres da Silva, reiteira tan katak bazeia ba rezultadu enkontru ekipa juri iha loron 25 fulan-Abríl 2025, hodi foti desizaun ba servisu fornesimentu kombustivel deside ba Aitula Fuel’s Unipessoal, Lda mak sai nu’udár manan na’in, ho razaun presu ne’ebé razoavel no dokumentu ne’ebé kompañia submete ho kompletu.

Iha fali loron 30 fulan-Abríl 2025, Diretór Ezekutivu RTTL,E.P, João Guterres da Silva, hato’o pedidu aprovasaun relatóriu avaliasaun servisu fornesimentu kombustivel ho númeru referénsia 31/D.E/RTTL,E.P/IV/2025, ba Prezidente Konsellu Administrasaun RTTL,E.P, Elizeu Isaac Fernandes,  atu aprova pedidu relatóriu avaliasaun servisu fornesimentu kombustivel.

Iha loron 13 fulan-Maiu 2025, Prezente Konsellu Administrasaun RTTL,E.P, Elizeu Isaac Fernandes,  hatún despaxu husu favor Diresaun Nasionál Administrasaun no Finansas (DNAF) trata asuntu ne’e fó oportunidade ba kompañia Mãe da Graça Unipessoal, Lda, ho razaun iha esperiénsia servisu hamutuk ne’ebé ho kometimentu ba servisu kualkér tempu.

Iha loron hanesan Diretóra Nasionál Administrasaun no Finansas RTTL,E.P, Noviana de Fátima Nahak, hakerek no asina mós despaxu  hodi husu ba Departamentu Aprovizionamentu prosesa pedidu ida-ne’e tuir despaxu Prezidente  no regra rejime aprovizionamentu.

Iha fali dokumentu seluk kona-bá servisu fornesimentu manutensaun karreta RTTL,E.P nian ho montante orsamentu $20,000.00, ekipa juri ho nia kompozisaun  juri mak hanesan, Marcelino Osorio (prezidente juri), Lenia de Fátima Moreira (juri), ho Melchior Tino Ribeiro Rodrigues (juri) halo enkontru hodi foti desizaun ba servisu fornesimentu manutensaun ba karreta  deside ba kompañia Fe Loog Unipessoal, Lda hodi halo manutensaun ba karreta RTTL,E.P ho razaun presu razoavel no dokumentu ne’ebé kompañia submete ho kompletu tuir rekiziti ne’ebé RTTL,E.P husu.

Iha avaliasaun dokumentu ba projetu fornesimentu manutensaun ba karreta RTTL,E.P, kompañia Fe Loog Unipessoal, Lda hetan valor 130 no kompañia Fastep, Lda ne’ebé Prezidente RTTL,E.P Elizeu Isaac Fernandes, indika hetan de’it valor 110 tanba rekizitu sira hanesan TIN laiha no estatutu kompañia nian laiha.

Iha loron 29 fulan-Abríl 2025, Diretora Nasionál Administrasaun no Finansas RTTL,E.P, Noviana de Fátima Nahak submete karta akompañamentu ba Diretór Ezekutivu RTTL,E.P, João Guterres da Silva, ho númeru referénsia 98/DNAF-RTTL,EP/IV/2025, hodi solisita ba Diretór Ezekutivu RTTL,E.P, João Guterres da Silva,  atu bele hetan aprovasaun ba relatóriu ida ne’ebé ekipa juri deside kompañia Fe Loog Unipessoal, Lda maka manan hodi halo manutensaun ba karreta RTTL,E.P ho razaun presu razoavel no dokumentu ne’ebé kompañia submete kompletu.

Iha loron 13 fulan-Maiu 2025, prezidente RTTL,E.P, Elizeu Isaac Fernandes hatún despaxu husu favor ba DNAF atu trata asuntu ne’e no fó oportunidade ba kompañia Fastep, Lda tanba bazeia ba esperiénsia servisu hamutuk  ne’ebé profisionál no prontu ba RTTL (……)

Jornalista: Marcelino Tomae