Hatutan.com, (10 Setembru 2025), Díli– Parlamentu Nasionál liuhosi  Komisaun B trata asuntu Negosiu Estranjeiru no Defeza Seguransa, sei aprová tán tratadu  58 relasiona ho Timor-Leste nia adezaun bá ASEAN iha loron 26 fulan-Outubru 2025.

Lee Mós: MNE Sira Membru ASEAN Fó Apoiu Tomak Adezaun Timor-Leste iha 2025

Prezidente Komisaun B-PN, Deputadu Domingos Augosto “Deker”. Foto/Zita Menezes

Prezidente Komisaun B-PN,  Deputadu Domingos Augosto “Deker”, hateten Parlamentu Nasionál sei retoma fali nia knaar iha loron 15 fulan-Setembru, nune’e iha semana oin  Komisaun B sei halo audiénsia públika ho  Vise-Ministra asuntu ASEAN Milena Rangel hodi finaliza dokumentu sira ne’ebé maka liga ho Timor-Leste nia adezaun bá iha ASEAN nian.

“Tratadu lubuk ida, fulan hirak liubá ami hetan informasaun husi Vise-Ministra asuntu ASEAN Milena Rangel, katak minimu ne’e sei iha tratadu kuazé  58 besik 60 ne’ebé iha ligasaun ho prosesu Timor-Leste nia adezaun bá ASEAN,” Deputadu Domingos Augosto “Deker” bá jornalista sira iha PN, Kuarta (10/09/2025).

Nia afirma husi dokumentu hirak ne’e komisaun B sei la muda buat ida, ko’alia kona-bá tratadu akordu sira ne’e normalmente Parlamentu Nasionál hein para halo aprovasaun de’it la muda nein virgula no pontu sira.

“Sé dehan katak tratadu 58 ne’e urjente, komisaun B sei tenta maibé, normalmente ita halo sexaun tuir ita nian tempu, ami tenta atu jere tempu ne’e, maibé ami komisaun tuir de’it proposta ne’ebé mai husi Governu,”tenik Deputadu Deker.

Membru PN ne’e afirma, komisaun B nu’udár komisaun ne’ebé responsabiliza bá area ne’e, nune’e kumpri devér tuir regimentu PN tuir lei katak komisaun B maka tenke prepara ninian audiénsia no ninian relatóriu paraser aprezenta iha plenária no halo aprovasaun.

Nia afirma iha tratadu ne’e iha pontu importante rua maka, ko’alia kona-bá Timor-Leste sei halo akordu no ko’alia ho responsavél másimu ASEAN nian iha Malázia no seluk maka ko’alia liu kona-bá adezaun ASEAN nian.

Jornalista : Zita Menezes