Hatutan.com, (04 Novembru 2025), Díli-Vise-Ministru Saúde ba Fortalesimentu Institusional,  José Magno dos Reis, orienta ona ekipa investigasaun husi Ministériu Saúde (MS) hodi halo investigasaun kle’an ba kazu bebé ida mate hafoin simu vasina iha Sentru Saúde Munisípiu Liquiça, foin lalais ne’e.

Estajiaria  finalista UNTL fó vasina ba bebé ida iha Sentru Saúde Liquiça no ikus bebé ne’e lakon vida. Prosesu ne’e iha ona investigasaun. Foto/Repro Espesiál

Vise-Ministru José Magno dos Reis, ba jornalista iha Palasiu Governu, Tersa (04/11/2025), hateten nia fó ona orientasaun ba ekipa investigasaun husi Ministériu Saúde hodi ba halo investigasaun kona-bá bebé ida mate hafoin simu imunizasaun iha sentru saúde Munisipiu Liquiça.

“Bebé ida mate ne’e iha hela investigasaun, ha’u fó ona orientasaun  no investigasaun la’o hela, tanba ha’u fó hatene hela ba sira para tenke tun lai ba ko’alia sira hateten lai katak iha relatoriu, sira presiza hetan informasaun husi Hospital Nasional no mós husi relatóriu por eskrita husi xefe sentru saúde Liquiça ho família. Mais video ha’u seidauk hetan keta ha’u mai tiha reauniaun ne’e  mak sira haruka karik, kona-ba sansaun ne’e ita haree to’ok lai ba, se iha erru ruma”,  Vise-Ministru Saúde Jose Magno dos Reis.

Nia dehan, kuandu família ida lakon nia membru ida ema hotu la kontente no família mós la kontente mais husik ba investigasaun la’o tiha haree loos tiha hafoin fó sai, mais Ministériu Saúde mós lakohoi atu ema ida lakon vida.

“Investigasaun ami husu para tenke lalais Ekipa investigasaun la’o, depois imunizasaun ne’ebé mak ita ninian pesoal Saúde sira halo ba labarik nain sanulu resin neen (16) la’ós ida de’it, soke to’o ida ne’e mak nia depois sangra hotu tiha momentu balun nia ran sai fali husi sangra fatin ne’e, depois sira halo tiha intervensaun hotu depois fila tiha ba uma, fila fali mai halo intervensaun iha sentru saúde Liquiça hafoin sira deside mai iha Hospital Nasional Guido Voladares (HNGV), mai to’o iha ne’e mak bebe oan ne’e husik hela iis”, Vise-Ministru Saúde haktuir.

Nia hateten, investigasaun ne’e kompleta husi ekipa ne’e, orsida sira sei informa mai hafoin MS hato’o ba Públiku bele hatene.

Diretór Servisu Saúde Munisípiu Liquiça, Luis Manuel via telefone, Tersa (04/11/2025), rekoñese informasuan bebé ida lakon vida ne’e los, akontese iha Kuarta (29/10/2025), vasina husi estajiaria finalista Universidade Nasional Timor Lorosa’e (UNTL) no dadaun hato’o ba Ministériu Saúde depois ekipa halo investigasaun kauza husi bebé mate ne’e tanba saida.

“Família lori mai triajen haree tiha hotu, depois haruka  mai iha sala imunizasaun, pasiente ne’e mai konsulta ne’e  tama husi triajen para indika ba sala imunizasaun, ai-moruk oin tolu ida hemu, rua sona. Ne’ebé sona hotu sira haruka fila ba uma liu minutu 12 nia mai fali ho ran, hafoin sira halo vídeo send tun sae iha média sosiál Facebook,” Diretór Servisu Saúde Munisípiu Liquiça, Luis Manuel klarifika.

Nia hatutan agora hein hela prosesu investigasaun tanba saida mak ran sai, bebé ne’e dadaun halo ba fulan ida semana rua. Dadaun karta iha ona Ministériu Saúde hein de’it depois ekipa tun mai mak bele halo investigasaun.

Jornalista: Juvinal Cabral dos Santos