Husi: Rosario Maia*

Hatene tiha katak Timor-Leste sai ona membru plenu ba Asosiasaun Nasaun sira Sudeste Aziátiku nian (ASEAN), adezaun ne’e hamosu ona diskusaun nasionál ne’ebé foka barak liu ba diplomasia, komérsiu no integrasaun ekonómika. Tuir ha’u nia observasaun, setór krítiku ida ne’ebé seidauk ezamina ho sufisiente mak mídia. Iha tempu ida ne’ebé konfiansa ba informasaun lolos no momos sai preukupasaun ema hotu nian tamba disrupsaun dijitál ka prezensa enorme husi média sosial ne’ebé produz ka forma tia opiniaun ka diskursu públiku sira iha Sudeste Aziátiku tomak, jornada mídia Timor-Leste nian agora hasoru momentu krítiku ida. Pergunta la’ós se adezaun ba ASEAN sei muda ambiente mídia nian, maibé mídia Timor-Leste nian prontu ka lae atu ativamente forma opiniaun ba mudansa rejiaun ne’e nian no konta ho diak liu tan nasaun ida ne’e nia istória tuir ninia narrativa rasik.

Husi Ekosistema Mídia Ki’ik ida Tama iha Espasu Rejionál Bo’ot ida

Timor-Leste nia setór mídia laos ona foun ka sei nurak, maibe relativamente ki’ik, no sei kontinua konsolida nia fundasaun profisionál hafoin tinan barak evolui hamutuk ho prosesu konstrusaun estadu. Husi pontu devista dínamika sosial, média Timor-Leste halao ona papel importante mak “fasilita” komunikasaun no informasaun husi elites sira ba povo bai-bain no husi povo bai-bain ba ema bo’ot sira hodi preserva konstituisaun ninia espéritu liberdade imprensa no espresaun, maibe média Timor-Leste kontinua funsiona ho rekursu limitadu, kapasidade téknika ne’ebé modestu, no dependénsia kontinua ba finansiamentu hosi governu no doadór sira laos husi publisidade tambá merkadu ekonómika seidauk fo biban. Jornalista sira dalabarak hetan servisu hodi halo knaar oioin, hodi husik espasu uitoan de’it ba espesializasaun, profundidade investigativa, ka kobertura rejionál ne’ebé sustentavel.

Nu’udar membru plenu foun ASEAN, Timor-Leste hakat ba ekosistema informasaun rejionál ida ne’ebé boot liu, lais liu, no kompetitivu liu. ASEAN abranje ema liu millaun 680 ho sistema mídia oioin, husi merkadu sira ne’ebé komersializadu no dijitalizadu tebes hanesan iha Indonesia, Thailandia, Singapura no Vietnam to’o ambiente sira ne’ebé reguladu liu hanesan iha Myamnar ka Kambodia. La ho preparasaun diak, iha risku reál katak Timor-Leste nia mídia sei sai destinatáriu pasivu ba narrativa rejionál sira, envezde kontribuinte ativu ne’ebé forma ema seluk iha Sudeste Aziátiku ninia hanoin, haree no kumpriensaun ba nasaun ne’e ninia istória, identidade no dezenvolvimentu.

Tanbasá Timor-Leste nia Mídia nia Lian Importante?

Resposta ba pregunta iha leten mak Timor-Leste nia mídia tenke halo buat barak liu duké halo deit reportajen ba eventu sira ne’ebé iha relasaun ho ASEAN. Kobertura média nian tenke interpreta, kontestualiza, no umaniza assuntu ASEAN ninia ligasaun ba nasaun ne’e. Laiha meus rejionál ida mak bele konta Timor-Leste nia istória ho profundidade, komprensaun kulturál, konxiénsia istórika ka Timor-Leste ninia kontribuisaun iha assuntu global hanesan ho jornalista Timor-oan sira rasik. Kestaun sira hanesan mobilidade laborál, vulnerabilidade klimátika, feto nia partisipasaun ekonómika, ka demokrasia pós-konflitu, Timor-Leste nia esperiénsia barak los atu konta husi média no jurnalista Timoroan rasik atu oferese lisaun sira ne’ebé merese hetan fatin iha narrativa koletiva ASEAN nian.

Konta istória Timor-Leste nian iha ASEAN signifika lori realidade lokál sira ba iha konversa rejionál, signifika mós atu hadi’a informasaun ne’ebé laloos hodi aprezenta Timor-Leste la’ós nu’udar membro foun pasivu, maibé nu’udar contribuinte ativu – ‘Fiar A’an Lao Ba Oin’ ho nia perspetiva no valór rasik.

Oportunidade Foun no Presaun Foun

Adezaun ba ASEAN lori oportunidade foun ba jornalista no organizasaun mídia Timoroan sira nian. Formasaun rejionál, programa interkámbiu sira no kooperasaun bele ajuda hadiak abilidade sira no padraun profisionál sira. Halo reportajen kona-ba asuntu ASEAN nian mós bele ajuda jurnalista no públiku Timoroan sira atu komprende oinsá desizaun rejionál sira afeta moris loroloron nian mak hanesan assuntu empregu ka serbisu, presu ba sasan sira, edukasaun, krime transnacional, migrasaun, no protesaun sosiál.

Iha tempu hanesan, espetativa sira aas liu. Notísia sira tenke lalais liu, loos liu, no asesivel liu iha plataforma dijitál sira. Kompetisaun husi mídia rejionál no internasionál maka’as, liuliu online. Atu lao ba oin ho diak, Timor-Leste nia mídia presiza investimentu iha abilidade, teknolojia, no reajustamentu sistema editoriál ne’ebé forte.

Transformasaun Dijitál no Risku sira Informasaun nian

ASEAN mak rejiaun ida husi rejiaun seluk ne’ebé nia ligasaun dijitál lais no boot liu iha mundu, no Timor-Leste nia adezaun automaticamente sei aselera dijitalizasaun iha rai-laran. Konetividade no asesu ba plataforma ne’ebé di’ak liu bele habelar informasaun konaba progresu sira nasaun ne’e nian, fó kbiit ba mídia.

Maibé, espasu dijitál sira mós sei lori risku ba ita. Iha Sudeste Aziátiku tomak, informasaun sala no dezinformasaun la’o lalais, dala barak ultrapasa notísia sira ne’ebé verifika ona. Asédiu online, liuliu alvu ba feto jornalista no defensór sira, akontese loro-loron. Ba demokrasia ki’ik ida hanesan Timor-Leste, kresimentu dijitál ne’ebé la jere bele hafraku konfiansa no hakle’an polarizasaun bainhira la akompaña ho padraun étika ne’ebé forte, responsabilizasaun iha redasaun, no literasia mídia ba públiku.

Mídia iha Responsabilidade Atu Hasae Komprensaun Públiku Konaba ASEAN

Nu’udar membru plenu ASEAN nian, Timor-Leste sei envolve iha kompromisu rejionál sira ne’ebé forma polítika nasionál, orsamentu, no prioridade dezenvolvimentu ba tempu naruk. Mídia tenke sai hanesan ponte entre foti desizaun rejionál no sidadaun sira-nia moris loroloron. Esplika prosesu sira ASEAN nian iha linguajen ne’ebé klaru no asesivel la’ós opsionál. Ida-ne’e esensiál ba partisipasaun demokrátiku.

Jornalizmu responsabilizasaun, bazeia ba faktu sira, kontestu, no independénsia, sei garante katak integrasaun ASEAN fó benefísiu ba públiku duké sai nafatin domíniu elite sira-nian. Papél ida-ne’e presiza la’ós de’it jornalista sira ne’ebé iha kapasidade, maibé mós instituisaun sira ne’ebé transparente no iha vontade atu fornese informasaun. Nune’e, liberdade imprensa no asesu ba informasaun tenke sai sentrál ba Timor-Leste nia identidade demokrátiku.

Papel Estratéjiku Mídia Estadu nian iha Era ASEAN

Instituisaun mídia estadu nian iha knaar ida ne’ebé partikularmente importante atu hala’o. Rádio e Televisão de Timor-Leste, E.P. (RTTL, E.P) no TATOLI, I.P., iha responsabilidade no oportunidade hodi forma ema nia hanoin no haree konaba nasaun ne’e iha ita nia rai-laran no iha rejiaun. Média estatal rua ne’e tengki hametin no habo’ot sira-nia kontribuisaun ho servisu hamutuk ne’ebé fo’o biban ba malu.

TATOLI, nu’udar ajénsia notisioza nasionál, iha pozisaun di’ak atu sai hanesan janela primária ba informasaun kona-ba Timor-Leste ba ASEAN no mundu. Ho independénsia editoriál ne’ebé metin liu tan, reportajen ho lian oioin, no ligasaun ba distribuidor notisia rejionál, TATOLI bele sai nu’udar fonte konfiável ba notísia oportunu no faktuál ba mídia rejionál sira, misaun diplomátika sira, no audiénsia internasionál sira ne’ebé buka atu komprende dezenvolvimentu sira iha Timor-Leste. Iha kontestu ASEAN nian, TATOLI tenke foka ba esplika polítika nasionál sira, kompromisu rejionál sira, no realidade sósiu-ekonómiku sira iha maneira sira ne’ebé asesivel, kredivel, no konsistente hodi ajuda garante katak Timor-Leste nia narrativa haktuir ho loloos no ho dignu.

RTTL,E.P mos iha mandatu no funsaun ne’ebé vital hanesan. Nu’udar emisora ​​nasionál, iha kapasidade no esperiensia ba produsaun áudio-vizual ho kualidade a’as, RTTL tenke koloka nia-an nu’udar pontu referénsia ba istória, kultura ka identidade Timor-Leste nian. Iha ekosistema mídia ASEAN nian, iha ne’ebé diplomasia kulturál importante, RTTL iha poténsia atu hala’o knaar ida ne’ebé maka’as liu hodi promove nasaun nia patrimóniu, indústria kriativu sira, no turizmu. Programasaun ho kualidade aas no iha multi-lingua kona-ba istória, diversidade kulturál, koñesimentu tradisionál, no memória nasionál bele ajuda audiénsia Timor-oan sira no telespetadór rejionál sira komprende di’ak liután sé mak ema Timor-oan sira aleinde líder ka polítiku sira.

Hametin sinerjia entre RTTL no TATOLI ne’e esensiál. Diferensiasaun papél ne’ebé klaru, fahe ba malu konteúdu sira no estratéjia sira ne’ebé koordenadu hodi kontinua respeita idak-idak ninia independénsia editoriál bele maximiza impaktu no evita duplikasaun. Hamutuk, instituisaun mídia estadu rua ne’e bele ajuda vizibilidade Timor-Leste nian iha espasu informasaun ASEAN.

Oinsá Governu nia Komunikasaun Bele Apoiu Mídia?

Ministériu governu nian sira mós iha papél importante hodi apoia ambiente mídia ne’ebé saudavel. Ministériu sira dalabarak sai hanesan fonte informasaun dahuluk kona-ba inisiativa sira, akordu sira, enkontru sira, no reforma sira ne’ebé relasiona ho ASEAN. Ministériu sira nia unidade komunikasaun nia abilidade atu fahe informasaun sira relasiona ho ASEAN sei afeta tebes oinsá públiku komprende ASEAN no oinsá jornalista sira bele fó sai kona-ba ida-ne’e.

Komunikasaun governu nian tenke oportunu, klaru, no asesivel. Ministériu sira bele ajuda jornalista Timor-oan sira ho proativu hodi fahe informasaun ne’ebé loos kona-ba inisiativa, polítika, no rezultadu sira ASEAN nian—la’ós de’it hafoin foti desizaun sira, maibé iha prosesu tomak. Informasaun regular, komunikadu imprensa ne’ebé klaru, no asesu nakloke ba ofisiál sira ajuda jornalista sira fó sai ho konfiansa no hamenus espekulasaun ka informasaun ne’ebé laloos.

Lingua mós importante. Fornese informasaun iha lian oioin; liuliu Tetum, Portugés, Inglés, no Bahasa Indonézia, bele habelar tebes komprensaun. Komunikasaun ho lian oioin permite mídia Timor-oan sira atu servi audiénsia oioin iha rai-laran no permite mídia rejionál no ASEAN nian atu halo relatóriu ho loloos kona-ba Timor-Leste. Ida-ne’e mós suporta jornalista sira ne’ebé bele serbisu iha lian oioin depende ba sira nia audiénsia no plataforma.

Ministériu sira Governu nian bele apoia liután mídia liuhosi halo materiál báziku sira hanesan fact sheet, no dadus sira kona-ba kooperasaun ASEAN nian ne’ebé disponivel ba públiku. Ida-ne’e ajuda jornalista sira atu esplika kestaun rejionál sira ne’ebé kompleksu ho termu simples no garante katak reportajen sira foka ba substánsia duké slogan sira. Importante, apoiu ida-ne’e tenke respeita independénsia mídia nian. Fó informasaun la’ós kona-ba kontrola mensajen, maibé kona-ba asegura transparénsia no diskusaun públiku ne’ebé informadu.

Bainhira komunikasaun governu nian nakloke, iha lian oi-oin no konsistente, ida-ne’e hametin konfiansa entre instituisaun sira, mídia, no sidadaun sira. Ida-ne’e mós ajuda asegura katak Timor-Leste nia envolvimentu iha ASEAN la’ós de’it kompriende hosi ema sira ne’ebé halo polítika, maibé hosi ema baibain sira ne’ebé sira-nia moris hetan impaktu hosi desizaun rejionál sira.

Tinan Foun, Esperansa Foun

Sai membro plenu ASEAN laos deit orgullu ida, maibé mós responsabilidade ida. Iha tinan foun ida ne’e, Timor-Leste nia mídia sei la fó sai de’it kona-ba integrasaun ba ASEAN, maibe sei buka oinsa atui ta nia povo kumpriende saída no sa benefísiu mak ASEAN fo’o ba ita.

Nu’udar eis-jornalista, ha’u dehan ida-ne’e ho orgullu: Jornalista no mídia Timor-oan sira iha abilidade atu hamriik hamutuk ho sira-nia maluk sira iha Sudeste Aziátiku tomak. Sira komprende sira-nia audiensia, sira-nia istória, no sira-nia devér ba públiku. Saida maka sira presiza maka oportunidade: asesu ba plataforma rejionál sira, rekursu sira ne’ebé sufisiente, no liberdade atu serbisu ho independente no étika. Ho apoiu ne’ebé loos, Timor-Leste nia jurnalista no mídia,  sei la’ós de’it adapta ba ambiente mídia ASEAN nian, maibé sei ajuda lori lian, valór demokrátiku, no perspetiva Timór nian ba iha konversa rejionál.

Ksolok Tinan Foun ba Ita hotu.

Rosario Maia, Membru RENETIL no Eis Jornalista RTTL,E.P.