Hatutan.com, (23 Janeiru 2026), Díli-Polísia Nasionál Timor-Leste (PNTL) liuhusi Diresaun Servisu Investigasaun Kriminál Nasionál (DSIKN) hamutuk ho ekipa sub-seksaun Vulneravle Person Unit (VPU) Munisípiu Dili ezekuta mandadu Tribunál Judisiál Primeira Instánsia Díli (TJPID) ho NUK:0017/26.DINFT hodi kaptura no detein ona suspeitu na’in-haat ne’ebé envolve iha kazu violasaun seksuál hasoru vitíma ho insiál FCL ne’ebé viral iha mídia sosiál.

Lee Mós: Kazu Abuzu Seksuál Ne’ebé Viral, PNTL Hein Mandadu Ba Suspeitu JGPR iha Indonézia

Polísia detein suspeitu na’in-haat ba kazu violasaun seksuál ne’ebé viral iha mídia sosiál. Foto/Juvinal Cabral dos Santos

Suspeitu na’in-haat ne’ebé daudaun ne’e iha ona sela detensaun polísia nian ne’e ho insiál mak hanesan JMPA, CON, JGFPS ho GAAG.

Tuir observasaun Hatutan.com iha terenu, Sesta (23/01/2026), hatudu PNTL liuhusi Diresaun Servisu Investigasaun Kriminál Nasionál (DSIKN) hamutuk Investigasaun Kiminál Munisípiu Díli hahú ezekuta mandadu ho ekipa hale’u tuku 11:47 Otl kaptura uluk suspeitu ida iha área STM  Becora.

Iha terrenu PNTL  aprezenta uluk mandadu  husi Tribunál nian ba família no suspeitu kona-bá aktu ne’ebé nia komete hafoin tau alzema ba nia liman.

Autoridade seguransa  bolu reprezentante família tanba inan ho aman sai hela ho  ida -ne’e Polisia aprezenta mandadu Tibunál ba família no informa ba família bele ba tuir iha Komandu Polísia Munisípiu Díli.

Hale’u tuku 11:55 Otl, ekipa  Polísia  ba tan kaptura suspeitu ida iha área Becora Amular no  bainhira autoridade seguransa sira to’o iha suspeitu nia rezidénsia husu família koopera hodi hatudu suspeitu ba PNTL no aprezenta mandadu husi Tribunál ba suspeitu hafoin tau alzema ba suspeitu nia liman.

Bainhira kaptura tiha suspeitu nain rua iha Becora, PNTL kontinua kedas ba iha área Metiaut nian kaer tan  suspeitu na’in-rua seluk hale’u tuku 12:15 Otl.

“Ami ezekuta mandadu ida ne’e tanba suspeitu sira envolve iha krimi balun,” autpridade seguransa sira informa ba família suspeitu sira idaidak bianhira ba halo kaputasaun ba suspeitu sira iha idaidak nia rezidésia iha área STM Becora, Becora Amular ho Metiaut.

Hafoin asegura suspeitu na’in-haat ne’e, ekipa transporta no entrega kedas suspeitu sira ba iha VPU (Vulnerable Person Unit) tutela Servisu Investigasaun Kriminál (SIK) Munisípiu Dili hodi halo prosesu investigasaun kontinua detein iha sela durante oras 72 molok submete ba interrogatóriu dahuluk iha Tribunál.

Jornalista: Juvinal Cabral dos Santos