Hatutan.com, (20 Fevereiru 2026),Díli—Diretór Nasionál Polísia Siéntifiku Iinvestigasaun Kriminál (PCIC-sigla portugés), Vicente Fernandes e Brito,  dezemente  no konsidera bosok kona-bá kazu membru PCIC inisiál  OdCA  ho diviza investigadór utiliza pistola halo violénsia  doméstika hasoru nia  ferik-oan ho inisiál DX.

Lee Mós: PCIC Seidauk Foti Medida Disiplinár Bá OdCA Utiliza Pistola Halo Violensia Doméstika

Diretór Nasionál PCIC, Vicente Fernandes e Brito. Foto/Dok

Diretór Nasionál PCIC Vicente Fernandes e Brito, Sesta (20/02/2026), iha ámbitu komemorasaun aniversáriu Komisaun Anti-Korrupsaun (CAC) iha edifisiu CAC, Farol, Díli, ba jornalista sira hateten, membru PCIC  ne’ebé  utiliza pistola  ameasa tiru nia  kaben DX ne’e bosok.

“Arma ne’e laiha, bosok,  ha’u bolu ona parte  hotu-hotu,  ha’u bolu, ha’u konirma hotu, auto notísia krime kona-bá violasaun  baku malu ka violénsia doméstiku bá tiha ona Ministériu Públiku, ha’u maka haruka loke  kona-bá arma ne’e, baku ne’e  nia oin sira nakles hotu ,” Diretór Nasionál PCIC  Vicente Fernandes  hateten.

Nia dehan, to’o agora nia seidauk fó sansaun disiplinár, tanba problema ne’e  problema  família la’ós uza   pistola, maibé  sei haree volume kazu  ne’ebé  halo auto  partisipasaun  iha Ministériu Públiku.

Nia afirma, ekipamemtu  hotu-hotu iha  PCIC ne’e jestaun eletróniku hotu,  membru PCIC sé de’it maka foti, iha  orsas saída de’it  tenke rejistu.

“Ami iha ne’ebá ami nia jestaun ne’e eletroniku hotu, ó foti iha sá oras,  kalan ka loron, buat  buat hotu rejistu,  ne’ebé laiha  atu dehan katak uza arma pistola,” Vicente Fernandes e Brito afirma tan.

Fó hanoin fila fali katak, informasaun ne’ebé Hatutan.com asesu katak  iha loron 02 fulan-Janeiru 2026, membru PCIC ho inisiál OdCA halo violénsia no uza  pistola amesa  nia-kaben  ho inisiál DX hanesan mós membru PCIC.

Kazu refere vitíma  nu’udár OdCA nia ferik-oan halo keixa no rezista ona iha Ministériu Publiku ho Nuk:001/26.PCIC.

Membru PCIC OdCA ho kondisaun lanu halo violénsia domestika no amesa ho pistola hasoru nia kaben DX  no oan na’in-rua la ho razaun klaru, depois vítima kontaktu bá Komisáriu PCIC hodi informa no ekipa prevensaun bá foti vítima hodi halo prosesu hasoru membru refere.

Jornalista: Marcelino Tomae