Hatutan.com, (01 Abríl 2026), Díli-Ministru Interiór (MI), Francisco da Costa Guterres,  hein lista reforma membru Polísia Nasionál Timor-Leste (PNTL) na’in-100 resin husi Komandu Jerál PNTL, maibé la inklui  ka la aplika ba Komandante Jerál PNTL Komisáriu Asistente Polísia Afonso dos Santos.

Lee Mós: Ofisiál PNTL ho Idade Reforma Labele Kompete Vaga Komisáriu Jerál

Ministru Interiór, Francisco da Costa Guterres. Foto/Juvinal Cabral dos Santos

Iha Estatutu PNTL nian kontempla membru sira PNTL ho idade tinan 65 sei ba reforma, maibé Komandante Jerál Afonso dos Santos, automatikamente la tama iha lista reforma hodi hein to’o nia kumpre nia mandate tinan-tolu (2026-2029).

“Agora tinan ida ne’e sira submete para depois tinan oin sira bá, lista ba reforma na’in -100 resin, ita boot (jornalista ) rona hodibainhira ha’u ko’alia ne’e ka lae iha artigu 47° ne’e ita-boot lee ona, ba lee didi’ak ba iha ne’ebá dehan katak kuandu iha membru ida ne’ebé pre-aprezentasaun ba reforma,” Ministru Interiór (MI) Francisco da Costa Guterres ba jornalista sira iha Palásiu Governu, Kuarta(01/04/2026).

Nia dehan, kuandu governu deside Komisáriu Asistente Polísia Afonso dos Santos ba Komandante Jerál PNTL automatikamente reforma ne’e la aplika bá nia, to’o nia kumpri nia mandatu tinan-tolu hotu tiha mak foin governu haree fali.

“Lista ne’e ha’u hein Komadante Jerál sei haruka mai iha fulan ida ka rua nia laran depois mak sira sei públika,” Ministru Interiór Francisco da Costa Guterres hateten.

Nia esplika, iha estatutu Polísia Nasionál Timor-Leste kona-bá reforma ne’e tinan rua hotu mak implementa. Ho nune’e estatutu PNTL nian ne’ebé foin aprova iha tinan 2024 no foin tinan 2025 mak ami halo servisu”, Ministru Interiór haktuir.

Jornalista: Juvinal Cabral dos Santos