Hatutan.com, (05 Juñu 2026) Díli-Sekretáriu Estadu Komunikasaun Sosial (SEKOMS), Expedito Dias Ximenes, hateten Radíu Televizaun Timor-Leste, Empreza Públiku (RTTl,E.P) labele kompete iha konkursu transmisaun direita kopa mundiál tanba ne’e simu sub-transmisaun husi ETO-Telco liuhusi kontratu ho kustu $200,000.00.

Konferénsia imprensa SEKOMS, FFTL, ETO-Telco ho RTTL,E.P kona-ba transmisaun kopa mundiál 2026. Foto/Juvinal Cabral dos Santos

SEKOMS Expedito Dias Ximenes  fundamenta tan Rádiu Televizaun Timor-Leste (RTTL.EP) labele kompete transmisaun Kopa Mundiál tanba prosesu ne’e presiza rekezitu ne’ebé naruk no Federasaun Internasionál Futeból Asosiasaun (FIFA) mak bele hateten ida ne’ebé mak iha kapasidade.

“Primeiru kanál Rádiu Televizaun Timor-Leste (RTTL,E.P), kanál ofisiál Estadu nian, segundu RTTL,E.P ho ETO-Telco ne’e servisu hamutuk kleur ona, uluk kopa Euro ne’e mós RTTL,E.P servisu hamutuk tiha ona ETO-Telco no iha rezultadu ne’ebé di’ak,” SEKOMS Expedito Dias Ximenes  hateten liuhusi Konferensia Imprensa iha Hotel Timor, Sesta(05/06/2026).

SEKOMS haktuir, kompetisaun kona-bá transmisaun ne’e RTTL.EP la tuir só ETO-telco de’it mak hetan direitu transmisaun ne’e.

“Maibé, tanba ETO iha de’it nia kanál plataforma ne’ebé karik presiza iha nia kapasidade ne’ebé karik ladún nakloke ba ema barak no komunidade barak, entaun servisu hamutuk ne’e nia objetivu prinsipál ne’e atu asesu luan liubá iha públiku, ba sosiedade atu bele akompaña festa Kopa Mundiál di’ak liu,” Expedito hateten.

Nia esplika, RTTL,E.P hanesan kanál ofisiál Estadu nian, nia tenke iha kondisaun tanba ne’e mak husi rezultadu avaliasaun ne’ebé ami halo durante ne’e sira iha.

“Preparativu relatóriu ne’ebé ohin to’o husi RTTL,E.P katak sira nia preparativs to’o ona 95% hela 5% atu fó sai, no dia 11 fulan-Juñu  ne’eprontu ona atu  bele hala’o transmisaun kopa mundiál husi kanál ofisiál estadu nian,” Expedito Ximenes informa.

“Ha’u hanoin irmaun Nilton Gusmõo mak bele esplika di’ak liu tan, maibé prosesu nasaun ida-idak ne’e iha nia média ne’ebé halo kompetisaun, no RTTL,E.P momentu atu halo kompetisaun, tanba ETO manán kleur kedas ona entaun ne’e kontinuasaun, karik RTTL,E.P  iha tinan 2028 Euro Cup mai fali mak FIFA loke fali oportunidade Estadu liuhusi RTTL,E.P bele kompete fali,” SEKOMS haktuir.

Expedito Loro Dias Ximenes hatutan, Estadu tau orsamentu ba Kopa Mundiál ne’e tinan ida-ne’e tau $200,000.00 atu bele servisu hamutuk kustu ne’ebé apoiu ba ita nia servisu hamutuk ho ETO-Telco.

Iha fatin hanesan Prezidente Federasaun Futeból Timor-Leste (FFTL)  nu’udar mós  CEO empreza grupu ETO, Nilton Telmo Gusmao dos Santos haktuir, prosesu ne’e liuhusi konkursu  ne’e la’ós loke ba rai-laran sira, maibé loke ba mundu tomak.

“Timor-Leste iha tinan hirak ba kotuk ita la kompete entre ita iha ne’e, maibé ita mós kompete ho instituisaun média sira iha rai-li’ur ne’ebé hakarak mós foti direitu Timor nian depois sira fa’an fali direitu ne’e bá Timor. Antes iha 2018 prátika ne’e hanesan ne’e, maibé iha tinan 2018 ETO-Telco eziste komesa aproxima direita ba instituisaun ne’ebé trata kona-ba ba direitu broadcasting nian ami aprezenta ami nia  an, katak ami mós hakarak ba direitu ida ne’e, ita hola fali direitu husi ajénsia ruma iha Ázia nian,” Prezidente Federasaun Futeból Timor-Leste (FFTL)  Nilton Telmo Gusmao dos Santos esplika.

Prezidente FFTL ne’e afirma, direitu ne’e sira konsidera no fó oportunidade ba Timor-Leste iha direitu broadcasting hodi fó sai Kopa Mundiál.

“Kopa Mundiál  ida agora ne’e ami konfirma kedas desde 2018 la’ós 2022, iha tinan 2018 ETO-Telco konfirmadu hanesan ne’ebé manán, ami kompete ho empreza Ázia-Pacific Broadcasting Union (ABU) ne’ebé ami manán tiha sira no ami hetan lisensa ne’e desde 2018,”  CEO empreza  grupu ETO haktuir.

Nia hatutan, prosesu mai to’o iha ne’e sira formaliza de’it nia prosesu atu bele hahú fó Broadcasting ba públiku no Timoroan hotu maibé limita iha de’it ita nia rejiaun.

“Tanba ita haree iha kanál públiku ofisiál estadu  ami hanoin dehan, enves ami halo mesak de’it pelumenus ami partilla ho RTTL,E.P, tanba RTTL,E.P mós hakarak fó servisu ida ba ita nia sosiedade no lakohi hela de’it iha kotuk”,  Nilton Gusmao salienta.

Nia esplika, tanba ne’e mak liuhusi SEKOMS komunika ho ETO, maibé la’ós foin agora maibé tinan hira ba kotuk mós halo tiha ona entaun ita partilla kustu la’ós estadu de’it mak hasai osan ba hola direitu ida ne’e.

“Direitu ne’e ami hetan ho valor $600,000.00, governu kontribui de’it $200,000.00 no ami hasai $400,000.00 para Timoroan bele asiste Kopa Mundiál. Portantu nia prosesu ida ne’e la’ós ami ba manán depois ami mai hetan fali osan husi Estadu ne’e, lae, sé ita halo kalkulu matematika ami hasai $400,000.00  ami hetan de’it $200,000.00 husi estadu signifika saida, ita hotu-hotu bele analiza ida ne’e,” Nilton Gusmão hateten.

Nia esplika, objetivu ida ne’e la’ós puramente negósiu hotu-hotu hatene ekonomia iha Timor-Leste nune’e mak iha responsabilidade hodi kontribui ba espetakulu mundiál ida ne’e ho animasaun ba sosiedade ida-ne’e mak ami halo.

“Ami sente dehan festa boot ida-ne’e, espetakulu mundiál ida-ne’e ami bele kontribui bele fó animasaun ba sosiedade ne’e mak ami halo,  ida-ne’e mak ami garante tiha ita nia direitu ba Broadcasting ne’e maibé ami partilla governu, klaru governu iha orsamentu oituan sira mós hakarak hakmaan prosesu ida-ne’e mak hakarak kontribui ho kustu ne’ebé ami konkorda sira kontribui $200,000.00”, CEO empreza ETO esplika.

Akompaña Kopa Mundiál ho Espiritu Desportivu no Kria Paz

“Ha’u hamutuk ho señór Nilton Gusmao hanesan Prezidente Federasaun Futeból Timor-Leste (FFTL) no mós CEO ba empreza Esperansa Timor Oan (ETO) atu hato’o ba kolega sira hotu kona-ba eventu boot ne’ebé sei hala’o iha 11 Juñu to’o 19 Jullu 2026, ita hotu hatene ETO Telco sai host broadcesting ba iha Kopa Mundiál,” SEKOMS Expedito Dias Ximenes hateten.

SEKOMS hatutan, tanba eventu ida  naran futeból ne’e bele dehan katak atividade ka desportu komunitariu Povu hotu-hotu, komunidade tomak sente desportu futeból ida-ne’e joven sira hadomi tebes futeból iha Timor-Leste durante fulan ida nia laran asiste  transmisaun Kopa Mundiál ka taxa Mundiál ne’e, liuhusi ETO-Telco nia kanál no husi Rádiu Televizaun Timor-Leste (RTTL.EP).

“RTTL.EP ho ETO-Telco halo tiha ona akordu servisu hamutuk no ohin ami buka atu esplika di’ak liután ba komunidade tomak hotu-hotu akompaña señór Primeiru Ministru (PM) maun boot Kay Rala Xanana Gusmao iha nia mensajen hato’o tiha ona bá konvida komunidade tomak liu-liu joven sira atu akompaña eventu desportivu ida ne’e,” Expedito haktuir.

Nia afirma, akompaña eventu desportivu ida ne’e hodi bele aprende fotibolista boot sira koñesidu iha mundu, sira nia esperiénsia joga bola nian ba joven Timoroan.

“Labele sai hanesan jogadór sira mais pelumenus ita aprende buat balun no ita akompaña durante fulan ida resin”, SEKOMS esplika.

SEKOMS Expedito Ximenes dehan, IX Governu konstitusionál  iha biban barak ne’ebé liu ona agradese tiha ona ba empreza ETO liuhusi servisu hamutuk  ida-ne’e ne’e ba povu tomak husi kanál RTTL.EP no mós instreaming ne’ebé sai husi ETO Telco nia plataforma.

“Husi biban ida-ne’e ha’u lori IX Governu nia naran hakarak konvida komunidade tomak liu-liu joven sira ne’ebé hadomi futeból  atu bele akompaña asiste iha uma no fatin ne’ebé karik fó sai iha transmisaun iha públiku no iha área rural sira bele uja antena li’ur bele akompaña iha fatin hotu-hotu”, SEKOMS  informa.

Iha fatin hanesan Prezidente Federasaun Futeból Timor-Leste (FFTL)   hanesna mós na’in ka CEO ba empreza grupu ETO, Nilton Telmo Gusmao dos Santos hato’o  agradese IX Governu bele apoiu atividade eventu espetakulu boot liu iha mundu atu fó sai Kopa Mundiál 2026 iha ita nia rai Timor-Leste.

“Eventu ida-ne’e eventu desportivu boot liu iha mundu ita konsidera hanesan espetakulu ida ne’ebé mundu tomak tau matan kada tinan haat ema hotu-hotu hakarak sai sasin no asiste kampiaun foun bá Kopa Mundiál”, Nilton Gusmão hateten.

Prezidente FFTL afirma, Timor-Leste iha previleziu ba ida ne’e hodi bele akompaña eventu espetakulu Kopa Mundiál ida-ne’e liuhusi kanál nakloke iha RTTL.EP atu komunidade no sosiedade sira asesu hotu.

“Direitu transmisaun ne’e ETO Telco mak hetan liuhusi prosesu ne’ebé halo iha Federasaun Internasionál Futeból Asosiasaun (FIFA) nu’udar empreza ne’ebé iha direitu ba transmisaun, hakarak patrilla ho RTTL.EP hanesan kanál públiku atu bele lori espetakulu mundiál ida-ne’e ba Timoroan iha ne’ebé de’it,” Nilton Gusmao hateten.

Tanba  ida ne’e agradese tebes ba SEKOMS ne’ebé buka aproxima bei-beik ETO Telco atu realiza parseria ida-ne’e lori espetakulu mundiál ida-ne’e bá ema hotu iha ida-idak nia uma.

“Futeból hanesan atividade ne’ebé atrai ema barak nia atensaun, ita Timoroan iha paixaun boot tebe-tebes ba futeból, ita iha Timor-Leste futeból nia dezenvolvimentu la’o neineik mesmu ida ne’e nunka hamenus ita nia paixaun . Tanba ida-ne’e lori Federasaun Futeból Timor-Leste nia naran ha’u hakarak konvida Timoroan hotu atu asiste espetakulu mundiál ida-ne’e eventu desportivu ne’ebé boot liu iha mundu ho espiritu desportivu, tur hamutuk hodi asiste kada ema ida asiste nia ekipa ka nasaun ne’ebé nia apoia ka nia hadomi  manán ka lakon ida ne’e mak rezultadu, labele hafa’e ita iha Timor-Leste”, Prezidente FFTL rekomenda.

Nia informa, fiar katak husi eventu desportivu ida ne’e sei lori euforia foun ida ba sosiadade, biban ida ne’e ba joven sira no prátikantes desportu futeból atu haree espetakulu Kopa Mundiál ida-ne’e bele aprende buat barak mak sei akontese hanesan regras balun sei iha Kopa Mundiál 2026 nian, jogu ne’e sei realiza iha nasaun tolu Estados Unidus Amérika, Canada, no mós iha Meksiko.

Jornalista: Juvinal Cabral dos Santos & Marcelino Tomae