Hatutan.com, (18 Juñu 2026) Díli-Ministru Interiór (MI) Francisco da Costa Guterres, informa nia parte halo fali ona  rekursu ba Tribunál Kontas kona-bá projetu konstrusaun Kuartel Jerál Polísia Nasionál Timor-Leste (KJ-PNTL), tanba faktu balun Tribunal la akomoda iha rekursu primeiru.

Lee Mós: Projetu Konstrusaun Kuartel Jerál PNTL Paradu Hela Tanba Enfrenta Forsa Mayor Rua

Kuadru avizu projetu konstrusaun Kuartel Jerál PNTL. Foto/Juvinal Cabral dos Santos

Projetu konstrusaun Kuartel Jerál Polísia Nasionál Timor-Leste ne’e ho valór  kontratu inisiál $13,228,909.78 ka kuaze  millaun $13,2 no tuir kontratu tenke finaliza iha fulan-Setembru 2027, maibé to’o agora paradu no la hatudu progresu ne’ebé di’ak iha terrenu.

“Ami foin halo fali rekursu ne’ebé ita hein to’ok ami hatudu fali faktu balun ba Tribunal, tanba faktus balun Tribunal la akomoda iha ami nia rekursu primeiru ne’e, entaun foin hatama rekursu ne’e para hatudu ba Tribunal katak iha faktu balun Tribunal la konsidera tanba ne’e mak desizaun ne’e foti oin seluk tiha,” Ministru Interiór (MI), Francisco da Costa Guterres, informa hodi responde joranlista sira iha Díli,  Kinta(18/06/2026).

Ministru Interiór rekoñese, empreza internasionál Shanghai Construction Group Co., Ltd ne’ebé ezekuta obra ne’e nia kontratu mate ona, mate kuandu extende razaun ida maka iha tinan 2018 ka 2019 bainhira kuandu ajudika ona kontratu ne’e ba kompania seidauk halo buat ida mais iha governu altura ne’ebá adianta tiha ona US$2,000,000.00 ba iha kompañia ne’e.

“Agora sé ita dehan katak kompañia ne’e nia lisensa mate ita la hili nia, osan ne’e ita labele hetan fila-fali, osan $2,000,000.00 ita fó tiha ona ne’e sé mak responsabiliza tan, kompañia sei la fó fila fali osan ne’e ona. Entaun uniku situasaun mak ita renova nia kontratu ita haruka nia hamoris nia dokumentu tomak para ita bele hetan fila-fali ita nia osan ida $2,000,000.00 ne’ebé fó tiha ona adiantamentu ba kompañia ne’e,” Ministru Interiór Francisco haktuir.

Governante ne’e dehan, bainhira la renova kompañia ne’e la halo buat ida, nia lori osan $2,000,000.00 ba tiha ona.

Nia hatutan, bainhira kompañia kumpri halo to’o 2027 maibé sira halo to’o iha ne’ebé mak sei selu tuir ida ne’e.

“Maibé agora dadaun lae, sira halo fondasi ne’e husu osan ha’u dehan katak lae deskonta kedas husi $2,000,000.00, tanba imi sei iha osan $2,000,000.00 ne’ebé governu anterior adianta tiha ba imi ona iha ona imi nia Banku ne’ebá imi tenke halo, ko’alia de’it ida ne’e sira la husu pagamentu ruma,” Ministru Francisco da Costa Guterres hateten.

Nia haktuir, servisu reativa hela hein de’it Tribunal de Contas, iha rekursu ikus ne’e mak konsege konvense Tribunal deside afavor bele hahú fila-fali servisu.

Bazeia ba dadus kontratu ICB/036/MI-2017, konstrusaun edifísiu Kuartel Jerál PNTL nian ne’e sei hala’o durante loron 730 ka tinan rua, hahú husi fulan-Outubru 2025 to’o fulan-Setembru 2027.

Jornalista: Juvinal Cabral dos Santos