Hatutan.com (18 Juñu 2026) Díli-Komisáriu Asistente Polísia na’in-haat ne’ebé hetan promosaun to’o agora laiha atribuisaun servisu.  

Komemorasuan aniversáriu PNTL ba dala-26 iha Palásiu Governu, Sesta (27/03/2026). Foto/Dok.Média GPM

Tuir lista ne’ebé Hatutan.com asesa katak  Komisáriu Asistente Polísia na’in-haat seidauk asume kargu  ka laiha atribuisaun servisu  iha instituisaun Polísia Nasionál Timor-Leste (PNTL) mak hanesan Arnaldo de Araújo,  Ocativio Bucar, Mateus A. Mendes ho Antoninho Mauluta.

Husi lista totál Komisáriu Asistente Polísia hamutuk na’in-17, na’in-13 mak asume ona pozisaun iha instituisaun PNTL mak hanesan;

• Komisáriu Asistente Polísia Afonso dos Santos atuál Komandante Jerál PNTL.
• Komisária Asistente Polísia Natercia Eufrasia Soares Martins-Segundu Komandante Jerál PNTL.
• Komisáriu Asistente Polísia Hermengildo Gonçalves da Cruz- Inspetór Jerál PNTL.
• Komisáriu Asistente Polísia Armando Monteiro-Komandante Komandu Operasaun PNTL.
• Komisáriu Asistente Polísia Arquimino Ramos-Komandante Komandu Administrasaun PNTL.
• Komisáriu Asistente Polísia José Soares- Komandante Komandu Pessoal no Formasaun PNTL.
• Komisáriu Assistente Polísia Orlando Gomes-Komandante PNTL Munisípiu Díli.
• Komisáriu Asistente Polísia Agostinho Gomes-Komandante Unidade Espesiál Polísia.
• Komisáriu Asistente Polísia Justinho Menezes- Apoiu servisu iha Inspetór Jerál.
• Komisariu Asistente Polisia António de Sá- Adidu seguransa iha Malasya.
• Komisáriu Asistente Polísia José Maria Neto-Mok- Adidu Seguransa iha Portugal.
• Komisáriu Asistente Polisia Carlos Jerinimo- Adidu seguransa iha Austrália.
• Komisáriu Asistente Polísia Jorge Monteiro- Diretór Jerál Migrasaun.

Ministru Interior (MI) Francisco da Costa Guterres, ne’ebé  jornalista sira konfirma iha Díli, Kinta (18/6/2026),  klarifika katak  Komisáriu Asistente Polísia sira ne’ebé hetan promosaun, maibé la hetan kargu ka laiha atribuisaun servisu iha Komnadu Jerál PNTL tanba tama ona ba idade reforma no balun iha problema saúde no balun ba kontinua hela estudu.

Ministru Interiór ne’e afirma, ba sira ne’ebé idade sei bele, maibé tanba kestaun saúde, depois sira rekupera husi tratamentu, maka Komandu Jerál PNTL sei koloka ba fatin sira ne’ebé mak sei presiza, maibé ba sira ne’ebé tama ona ba idade reforma hein tinan oin ba reforma ona.

“Sim, sira balun iha ona pozisaun reforma, entaun labele, ida fali balun ita haruka ba eskola no balun kestaun saúde, deside deskansa hela, maibé Komandu PNTL iha prinsípiu tenta atu koloka sira hotu kedas, maibé sira ida atu tama ba idade reforma ne’e sei la koloka ona,” Ministru Francisco da Costa Guterres hateten. 

Reforma  ho Dignu iha 2027

Ministru Interiór Francisco da Costa Guterres, informa katak membru PNTL kuaze na’in-200 resin sei tama ba idade reforma iha tinan 2027.

Sira-nia naran sei públika iha  fulan-Setembru to’o fulan-Novembru tinan ne’e, no Governu foka ba reforma dignu liu husi hadi’a pensaun.

“Kuaze na’in-200 resin mak tama ba reforma iha tinan 2027, tanba tuir loloos 158 ne’e sira reforma iha tinan kotuk nona, maibé tanba dehan estatutu ne’ebé mak aprova entaun sei iha tan tinan rua hodi prepara sira-nia kondisaun hotu molok re-integra ba iha komunidade.  Reforma dignu ne’e mak diskusaun sei la’o hela,” Francisco da Costa Guterres hateten.

Nia afirma Governu iha obrigasaun atu fó reforma dignu ba nia ema sira, liuliu ba membru PNTL kuandu pasa ba reforma tenke trata sira ho dignu.

“Reforma dignu ne’e haree ba hadi’a reformadu sira-nia pensaun. Ita tenke haree hodi hadi’a sira-nia pensaun para pelumenus uluk sira sei ativu hanesan polísia ne’e sira-nia saláriu hira, agora sira bá reforma ne’e sira-nia pensaun reforma hira, nune’e ita bele fó buat di’ak ba sira atu sira bele goza iha sira-nia reforma ida-ne’e,” Ministru Interiór Francisco Guterres hateten tan.

Jornalista: Juvinal Cabral dos Santos