Hatutan.com, (19 Juñu 2026), Díli– Konsellu Ministrus (KM)  liu husi reuniaun ne’ebé hala’o iha salaun Kay Rala Xanana Gusmão iha Ministériu Finansa, Díli, Sesta (19/06/2026), delibera no ratifika akordu kooperasaun iha área defeza entre Timor-Leste ho Nova Zelándia.

Reuniaun Konsellu Ministru, Sesta (19/06/2026). Foto/Juvinal Cabral dos Santos

Akordu kooperasaun TL ho Nova Zelándia ne’e asina ona iha  loron 11 fulan-Juñu  tinan 2026 ne’ebé foku ba dezenvolvimentu no formasaun ba FALINTIL-Forsa Defeza Timor-Leste (F-FDTL).

Akordu kooperasaun ne’e asina husi Ministru Defeza Timor-Leste, Donaciano Costa Gomes, no Ministru Defeza Nova Zelándia, Chris Penk.

Tuir desizaun Konsellu Ministrus nian, akordu ne’e estabelese kuadru kooperasaun bilaterál ida iha área Defeza nian. Énfaze prinsipál ba dezenvolvimentu forsas armadas, liuliu iha área formasaun, treinu no setór prioridade sira seluk ba reforsu kapasidade institusionál F-FDTL nian.

Liuhusi ratifikasaun ida-ne’e, Governu Timor-Leste espera hametin liután lasu kooperasaun entre nasaun rua iha setór Defeza.

Objetivu prinsipál husi akordu ne’e mak kria kondisaun ba dezenvolvimentu inisiativa konjunta entre instituisaun defeza nasaun rua ne’e nian, no mós hametin kapasidade nasionál iha área seguransa no defeza.

Akordu ne’e tama hanesan parte husi esforsu Governu nian atu moderniza no hasa’e kualidade rekursu umanu F-FDTL nian liuhosi kooperasaun internasionál.

Jornalista: Juvinal Cabral dos Santos