Hatutan.com, (09 Jullu 2026) Díli-Polísia Nasionál Timor-Leste (PNTL) liuhusi Diresaun Servisu Investigasaun Kriminál (DSIK) desmantela atividade ilísitu scam call centre iha Metiaut, Díli, Kinta (9/7/2026).

PNTL desmantela atividade scam call centre iha rezidénsia ida iha Metiaut, Díli, Kinta (09/07/2026). Foto/Juvinal Cabral dos Santos

Husi asaun desmantela, buska no apreensaun ne’e, PNTL halo kapturasaun ba sidadaun estranjeiru ho nasionalidade Xina na’in-20 no deskonfia na’in-19 halai sai tiha bainhira haree ekipa konjunta PNTL to’o iha lokál operasaun.

Observasaun Hatutan.com iha terenu hatudu katak DSIK tama rezidensia ida Metiaut  deskobre kama ne’ebé instala iha uma andár rua nia laran hamutuk 43.  Maibé, ema ne’ebé autoridade seguransa polísia asegura na’in-24 kompostu husi mane na’in-19 no feto na’in-5.

Tuir informasaun iha terenu sidadaun estranjeiru tama no hela   iha rezidensia Metiaut ne’e iha  loron 10 fulan-Maiu 2026,  maibé parte rua nia kontratu katak ema na’in lima de’it mak atu hela iha rezidensia ne’e, kada fulan arrenda US$3,300.

Uma andár rua ne’e kama iha parte andár leten 28, no andár kraik kama 15 ne’ebé sidadaun estranjeiru uza toba hamutuk 43, inklui meza ne’ebé sira Instala ba atividade hamutuk 18.

Hafoin buska no apreensaun ne’e PNTL foti  sasán  sira hanesan evidensia mak komputadór 41, laptop, telefone, inklui aparelu starlink tolu instala iha uma leten no sasán seluk tan.

Relasiona ho  kazu ne’e, Kuarta (08/07) hale’u tuku 10:30 resin Otl, autoridade polísia sira  asegura uluk sidadaun estranjeiru na’in-17 lori  ba iha Eskuadra Polísia Kristu Rei no ohin Kinta (09/07) asegura tan na’in-hitu (7) inklui foti ho evidénsia ba iha DSIK.

Iha rezidensia Metiaut, uma na’in, Carlos dos Santos, hateten, sidadaun sira-ne’e mai halo atividade saida iha ne’e nia la hatene, tanba sira kontratu ho nia dehan atu mai hela, no sidadaun na’in-lima (5) mak ba asina kontratu atu hela iha uma ne’e. Maibé depois de PNTL sira mai halo busca foin hatene katak sira hela iha ne’e barak no halo atividade Scam Call Centre.

“Sira kontratu ho ha’u ne’e na’in-lima mak atu mai hela iha ne’e, iha kuartu sira-ne’e kama kazal ida, maibé ohin ita haree kuartu ida kama 4 no ema na’in-8 mak toba, ida-ne’e la iha kontratu ho ami no ha’u la hatene buat ida, sasán ne’ebé sira mai monta iha ne’e ha’u la hatene ida tanba bainhira sira tama mai iha ne’e ami labele mai iha ne’e ona,” Uma na’in Carlos dos Santos  hateten ba jornalista sira iha Metiaut.

PNTL halo identifikasaun ba suspeitu sira kazu scam call centre. Foto/Juvinal Cabral dos Santos

Uma na’in haktuir, sira asina kontratu loloos ne’e ba tinan rua, no sira selu kada fulan neen ho montante US$19,800 tanba kada fulan selu ho US$3,300.

Durante buska no apreensaun ida-ne’e uma na’in  koopera ho PNTL no husu atu prosesu autór sira ne’e tuir lei ne’ebé vigora tanba sira mai halo atividade ne’ebé ilegál.

Iha sorin seluk porta-vós PNTL Superintendente-Xefe Polísia João Belo dos Reis, hateten, agora dadaun operasaun la’o hela  deteta tan sidadaun estranjeiru ho nasionalidade Xina na’in-24.

“Iha Metiaut ita deteta sidadaun estranjeiru Xina na’in-24, na’in-hitu agora iha ona DSIK, na’in-17 mak agora iha Becora prosesu transporta mai iha DSIK,” Portavós PNTL ne’e informa.

Sidadaun estranjeiru Xinés sira ne’e atividade hanesan mós ida iha Manleuana halo atividade scam call centre, autoridade seguransa deteta atividade ne’e liuhusi material sira ne’ebé Xineza sira uja, fatin no modus ne’ebé mak sira uja ne’e.

“Meius primeiru ita uja mak komunika ba ita nia parseiru internasionál hanesan Austrália, Indonézia no selu-seluk tan ne’ebé mak iha esperiénsia hanesan atu bele ajuda tuir sira nia atuasaun ne’ebé mak sira halo, atu bele ajuda ita rekolla informasaun investiga kle’an liu tan ba asuntu ida-ne’e”, Portavós PNTL Superintendente-Xefe Polísia Joao Belo dos Reis esplika.

Nia hatutan, autoridade seguransa servisu makas atu deteta sira nia movimentu tanba balun halai sai ona husi fatin ne’ebá bainhira PNTL ba halo intervensaun.

Diresaun Servisu Investigasaun Kriminál ho Servisu Migrasaun iha kolaborasaun nafatin atu buka tuir bainhira sidadaun estranjeiru balun tenta halai sees husi polísia.

Jornalista: Juvinal Cabral dos Santos