Hatutan.com, (05 Outubru 2026), Díli —Antigu Prezidente Autoridade Rejiaun Adminiastrativu Oé-Cusse Ambeno  (PA-RAEOA), Mari Alkatiri  sai suspeitu/arguidu ba krime administrasaun danosa no krime seluk tan ba prosesu sira durante nia mandatu iha RAEOA no kazu akizasaun Ró Haksolok.

Lee Mós: Kazu Ró Haksolok, Mari Alkatiri Prontu Enfrenta Desizaun Tribunál

Refere ba kazu krime sira ne’ebé rejistu  iha Ministériu Públiku ho Númeru Uniku Krime (NUC): 0017/20.PGGCC, sekretáriu jerál no prezidente interinu partidu FRETILIN Mari Alkatiri, Segunda (05/10/2026), hale’u tuku 10:30 Otl, presta deklarasaun iha Ministériu Públiku, hanesan suspeitu/arguidu.

Tuir fonte  Hatutan.com  iha Mintériu Públiku haktuir katak kazu fraude no irregularidade kona-bá akizasaun Navio Haksolok ne’e, MInistériu Públiku hanesan na’in ba asaun penal konstitui ona arguidu na’in-58.

Marti Alkatiri ne’ebé akompaña husi nia advogada privada Soraia Marques, la fó komentáriu ba nia prezensa iha Ministériu Públiku (MP), maske jornalista sira tenta soe pergunta hafoin presta deklarasun ba prokuradór titulár iha edifísiu Prokuradoria Gerál Repúblika iha Colmera, Díli.

“Imi  jornalista  bele bá uma ona. Ha’u  hakarak akompaña prosesu ne’e to’o fim (remata), ha’u laiha obrigasaun atu ko’alia ho ita-boot (jornalista sira), ha’u foin  sai husi Ministériu Públiku,” Maria Alkatiri hateten hodi hatan  jornalista sira.

Molok Mari Alkatiri presta deklarasaun, iha loron hanesan, iha oras tuku 08:00 dadeer Otl, eis-MInistru Transporte no Telekomunikasaun (MTK), Pedro Lay presta uluk deklarasaun iha Ministériu Públiku, hanesan sasin ka testemuña.

Ba akizasaun navio Haksolok ne’e iha tinan dahuluk  2014 kontratu nian ho kustu inisiál millaun €13,7, maibé to’o agora Estadu Timor-Leste liu husi RAEOA gasta ona osan hamutuk millaun US$24 to’o millaun US$28  hosi Kofre Estadu nian.

Naviu Haksolok halo tiha ona lansamentu ka inaugurasaun (ko’a fita) hodi husik tuun ba tasi laran iha estaleiru Figueira da Foz, Portugál, iha Maiu 2017, maibé  ró  refere  labele mai Timor-Leste tanba problema finanseiru internál entre empreza Atlantic Eagle Ship Building ho subkontratór sira, hamutuk ho falta kbiit infrastrutura portu nian iha Timor-Leste.

Daudaun ne’e, konstrusaun Ró Haksolok iha Portugál konfirma  besik ona atu remata (iha porsentu 80 nia laran).  (*)