Hatutan.com, (16 Dezembru 2021), Díli—Asosiasaun Tane Konsumidór Timor-Leste (ATKTL), rejista keixa tolu ne’ebé mai hosi konsumidór sira, liga ho atendimentu banku iha Timor-Leste (TL).

Prezidente ATKTL, António Ramos da Silva. Foto/Hatutan.com.

Keixa tolu ne’e rejista iha tinan kotuk, mai hosi konsumidór primeiru hosi estudante Universidade Nasionál Timor Lorosa’e (UNTL), ne’ebé la satisfás ho atendimentu Banku Nasionál Komérsiu Timor Leste (BNCTL) tanba tau balkaun ida de’it hodi difikulta prosesu rejistrasaun estudante.

Keixa daruak nian kona-bá atendimentu Western Union (WU) ne’ebé laiha espasu ba ema atu ba foti osan.

Keix adatoluk kona-bá levantamentu osan ne’ebé bo’ot, maibé banku mós ko’a bo’ot ho valór $50 ne’ebé laiha informasaun ba konsumidór molok ko’a.

Hosi keixa tolu ne’e, ATKTL konsege rezolve iha prosesu mediasaun ho BNCTL no konsumidor sira, maibé primeiru ATKTL halo uluk karta ba BNCTL, Western Union no ba Banku Sentrál, hodi regula autoridade bankária ne’ebé la’o la tuir rega no ikus-mai konsege rezolve.

“Daudaun ne’e estudante-sira bele halo ona rejistrasaun ho di’ak tanba BNCTL estabelese ona ninia balkaun, inklui sukursál ne’ebé barak inklui atendimentu hosi Western Union,” Prezidente ATKTL, António Ramos da Silva hateten ba Hatutan.com, iha knaar fatin, Vila-Verde, Kinta (16/12/2021).

Maski konsege rezolve ona keixa balun, maibé Banku sira iha Timor hanesan BNCTL, BNU, BRI no MANDIRI kontinua laiha enkuadramentu legál hodi proteje konsumidór sira.

Hosi rezultadu advokasia ne’ebé ATKTL  halo durante fulan rua, hahú hosi Outubru to’o Novembru, detekta katak, laiha enkuadramentu legál atu proteje konsumidór liu-liu iha serbisu bankária ne’ebé seidauk kompletu, laiha asesu informasaun ba konsumidór ho lian ofisiál Portugés no Tetum, tantu informasaun ba kobransa restratus bankária, tranferénsia internasionál, levatamentu no seluk-seluktán.

Bazeia ba problema hirak-ne’e, parte ATKTL sei submete pedidu karta de loby ba Banku Sentral no Parlamentu Nasionál (PN), nune’e Banku hotu-hotu bele adopta rejime legál banku nian, hodi asegura no proteje konsumidór, liu hosi estatutu kada Banku hodi tau ona títulu kona-bá protesaun ba konsumidór liu-liu iha servisu bankária.

Ejizénsia hosi ATKTL nian ba Banku sira maka, primeiru, informasaun saida de’it hosi Bsanku ba konsumidór tenki ho lian ofisiál.

Segundu, tenki iha informasaun ba konsumidór kona-bá atualizasaun folin tantu hosi depózitu, transferénsia, levantamentu liu hosi ATM.

Terseiru, Banku labele ko’a montante bo’ot bainira konsumidór nia saláriu mínimu no obrigatóriu servisu bankária tenki gratuita.

COMISSÕES BANCÁRIAS – Novembro 2021

Asosiasaun ne’ebé harii iha tinan 2018 ne’e ho nia mekanizmu servisu maka halo advokasia ba serbisu no atendimentu Banku sira iha Timor inklui simu keixa hosi konsumidór relasiona ho atendimentu ou taxa ne’ebé Banku ko’a hodi armoniza situasaun ne’e, liu hosi mediasaun no karta ba Banku Centrál ne’ebé iha responsabilidade atu implementa regra ba Banku hotu-hotu.

Jornalista: Carmelita Isaac