Hatutan.com, (21 Dezembru 2021), Díli—Ekipa estimadu sidade Dili, Karketu Dili FC marka istória iha Futeból Timor Leste, hodi sai nu’udár ekipa kampiaun dahuluk ba Liga Futeból Timor Leste (LFTL), hafoin transforma hosi Liga Futeból Amadora (LFA) liu hosi kongresu dahuluk iha Timor Plaza 2020.

Ekipa Karketu Dili FC selebra Vitória Primeira Divizaun 2021, Tersa (21/12/2021). Foto/LFTL.

As Ponta Leste FC nia derrota ne’e mai hosi auto golu defeza Americo Martins (5) iha minutu 1, hafoin sala antesipa sutu ne’ebé lansa hosi médiu Karketu Dili FC Nataniel Reis (8).

Notisia iha Relasaun:Lalenok United FC Manan AD SLB Laulara 3:1

Ekipa rua iha animu makas atu konkista vitória iha jogu ne’e hodi hadau titulu kampiaun epoka ne’e. Karketu Dili FC domina liu jogu iha minutu dahuluk bainhira arbitu Pedro Maia Carvalho hú apitu uluk sinál jogu hahú.

Ho estratezia no tátika ne’ebé iha, ikus mai Karketu Dili FC lidera uluk liu hosi auto golu ne’ebé jogadór As Ponta Leste FC halo.

Ekipa rua nafatin hatudu jogu atrativu hodi lansa kontra atake ba malu liu hosi bola oportunidade ne’ebé iha.

Jogadór As Ponta Leste FC Silverio Garcia (27) simu kartaun kinur hafoin halo protestu makas hasoru desizaun arbitrazen iha minutu 9.

As ponta Leste FC no Karketu Dili FC kuaze sofre iha liña klaran tanba jogadór médiu hosi ekipa rua falla kontrola jogu ho nune’e la iha akurasi pasajen entre ekipa rua no ritmu jogu hahú monu hodi rezulta bola falta barak akontese tanba defeza sira tenke halo esforsu hodi hadi’a liña.

Jogadór médiu hosi As Ponta Leste FC hanesan Armindo de Almeida (15) no Mumi Mohammed (8) falla ezekuta taktika hosi treinador nune’e liña klaran la supply bola ho diak hodi fo oportunidade ba avansadu sira halo jogu.

Karketu Dili kontra AS Ponta Leste iha finál Primeira Divizaun 2021, Tersa (21/12/2021). Foto/LFTL.

Ekipa Karketu Dili FC mós falla tanba nia jogadór Biateng Appiah (7) falla asegura adversáriu nia jogu ikus mai sofre aleiza kaman, maibé sei kontinua joga ba nia ekipa. Expedito da Conceição (10) jogadór As Ponta Leste FC simu lkartaun kinur iha minutu 25.

Ekipa rua nafatin mantein jogu no hadi’a liña sira ne’ebé falla hodi halo atake ba malu. Avansadu As Ponta Leste FC Anizo Correia (14) hetan oportunidade atu halo impata maibé falla iha rzekusaun.

Tama ba minutu 36 jogadór Karketu Dili FC Gaudencio Monteiro (14) simu kartaun kinur hafoin halo falta hasoru jogadór adversáriu.

Situasaun no tensi jogu hahú sae no iha minutu 38 Armindo Almeida (15) jogadór As Ponta Leste FC obrigadu simu kartaun kinur hafoin halo falta iha liña klaran.

As ponta Leste FC hasae tensi jogu hodi halo atake, Anizo Correia (14) hetan oportunidade hodi halo kontra atake maibé jigador Karketu Dili FC Olegario Boavida (6) foti desizaun hodi halo falta iha liña klaran no hosi falta ne’e Olegariu Boavida (6) tenke simu kartaun kinur. Ekipa rua mantein jogu to’o primeira parte remata Karketu Dili FC nafatin lidera ho skore 1-0.

Hafoin deskansa no tama ba segunda parte ekipa rua lansa kedan atake ba malu liu hosi estratezia no taktika ne’ebé iha.

As Ponta Leste FC nafatin halo esforsu atu halo impata hodi fo presaun ba Karketu Dili FC maibé sei nafatin falla iha ezekusaun ba bola oportunidade sira ne’ebé iha.

Karketu Dili FC mantein nia ritmu no halo jogu ida defensivu no disipliña iha liña kotuk. As Ponta Leste FC hakroat nafatin estratezia iha liña oin ho jogu ida rapidu no ofensivu tebes maibé seidauk lori rezultadu ba ekipa.

Nataniel Reis (8) jogadór Karketu Dili FC simu kartaun kinur hafoin halo falta ba jogadór adversáriu iha minutu 63.

Liu deit minutu ida no tama ba minutu 64 Karketu Dili FC halo kedan substituisaun iha liña oin hodi hasai Gaudencio Monteiro (14) no hatama Silvestre Gama (21).

As Ponta Leste FC mós hahú halo substituisaun hodi hasai Rivelino Martins (99) no hatama Ejivanio da Costa (7) iha minutu 64.

Ho substituisaun ne’e ekipa rua ida-ida mantein nia jogu. Karketu Dili FC mantein nia jogu defensivu hodi asegura vitória ne’ebé iha no As Ponta Leste FC nafatin halo esforsu ho atake ne’ebé iha atu halo impata.

Tama ba minutu 71 Karketu Dili FC halo substituisaun ba iha liña oin hodi hatama defeza nune’e treinador deside hatama José Silva (24) no hasai avansadu ne’ebé sofre aleiza Mickael Eugene (88).

Ho substituisaun ne’e Karketu Dili FC halo jogu barak liu iha nia liña ho disipliña iha liña kotuk. As Ponta Leste FC nafatin halo subtitiisaun hodi hasai Anizo Correia (14) no hatama João Hale (17).

Jogadór Karketu Dili FC Boateng Appiah (7) simu kartaun kinur tanba komete erru. As ponta Leste FC kontinua ho substituisaun hadi hasai Armindo de Almeida (15) no hatama Amancio Araujo (18) iha minutu 80.

As Ponta Leste FC kontinua ho substituisaun hodj hasai Yohanesa Gusmão (12) no hatama Ricardo Bianco (6).

As Ponta Leste FC kontinua domina jogu maibé Karkeu Dili FC mantein disipliña iha kada liña. Jogadór Karketu Dili FC Angiso Barbosa (16) halo esforsu maximu iha liña kotuk hodi salva bola amiasa hosi adversáriu hodi asegura vitória ne’ebé iha.

AS Ponta Leste FC kontinua halo substituisaun hodi hasai defeza no hatama avansadu, José Oliveira (4) sai no hatama Marito dos Santos (9).

Esforsu ne’ebé As ponta Leste FC halola lori rezultadu no Karketu Dili FC halo subtituisain ikus iha minutu 90+3 hodi hasai Nataniel Reis (8) no hatama Antonio Provirio (23).

Hafoin jogu, sekretáriu Jerál Karketu Dili FC Elizeu Isaac hateten Karketu Dili FC mak nain ba Dili tanba ne’e so Karketu Dili FC deit mak bele kampiaun iha dili no ekipa seluk la’e.

Asistente treinadór As Ponta Leste FC Van Basten hateten, ekipa la hare Karketu hanesan ekipa ida mais forte tanba ne’e sira mós iha esforsu atu konkista vitória ne’e, maibé realidade 90 minutus hatudu buat seluk.

Liu hosi rezultadu jogu rua ohin lori ona ekipa estimadu sidade Dili ne’e ba kampiaun primeira divizaun LFTL epoka ne’e maske sei iha ekipa haat mak sei joga hodi kompleta jornada dahitu nian.

Jornalista: Vito Salvadór