Hatutan.com, (14 janeiru 2022), Díli—Na’in ba Dealer UD Palma Motór Lesidere, Filomeno Baptista admira tanba ikus-ikus ne’e, liuliu iha loron hirak nia laran, kliente ka osan-na’in sira hadau malu loos, hodi sosa motór, to’o husu ajuda Polísia Nasionál Timor Leste (PNTL) hodi asegura no neutraliza situasaun ne’e.

Na’in ba Dealer UD Palma Motór Lesidere, Filomeno Baptista. Foto/Hatutan.com.

“Ha’u admira ho situasaun ne’e, tanba tuir esperiénsia uluk ne’e dealer mak buka kliente. Maibé, ikus-ikus ne’e kliente ataka no hadau-malu hola motór to’o empreza de’it mós laiha kapsidade atu responde tuir saida mak kliente sira hakarak. Kliente sira mai hadau-malu to’o ha’u nia sasan sira aat hotu, nune’e ha’u bolu mós Polísia atu asegura,” Filomeno Baptista, hateten iha Lesidere.

Filomeno Baptista esplika, estoke motór kiik hanesan Revo Fit no Beat iha armazén UD Palma, hotu ona tanba fabrika iha Indonézia seidauk disponível atu hatama hikas ho marka Honda mai Timor-Leste, tanba sei hasoru difikuldade ho matéria produsaun ne’ebé tenke importa hosi Japaun.

Desde Dezembru 2021 to’o Janeiru 2022, UD Palma Motor hatama motorizada hosi Indonésia hamutuk 700-resin iha primeira faze motorizada 439 no Janeiru hamutuk 271, maibé la sufsiente tanba númeru kliente barak liu kompara ho sasan ne’ebé iha.  

Motorizada sira ne’ebé empreza ne’e baibain importa ho marka Honda hanesan Beat, Beat Street, Verza, Vario, Honda Treal no Revo Fit.

“Sira barak hakarak liu mak motór kiik hanesan Beat, Revo fit no balun hakarak Verza, maibé estoke iha armazén hela de’it mak Beat sreet no Vario inklui ho Honda Treal. Ami nia estoke ba motór sira ne’ebé kliente sira hakarak kuaze la iha ona,” Filomeno Baptista, subliña.

Kliente na’in atus ida resin, forma hela atu hola motór iha edifísiu dealer UD Palma Lesidere, Sesta (14/01/2022). Foto/Hatutan.com.

Atu responde ba kliente sira nia nesesidade Empreza UD Palma Motór halo hela esforsu hodi hameno hikas ba sentru fábrika iha Indonézia atu hatama tán motór ho kuantidade 1’000, tuir pedidu hosi kliente sira.

Iha fatin hanesan, Blandina Martins Exposto, hateten durante semana rua ona mai forma iha UD Palma Motór atu sosa mototizada ba oan sira, maibé hasoru difikuldade tanba estoke iha dealer mamuk.

“Ami mai forma iha ne’e semana rua ona, ami hein hadau-malu loos, maibé motór mak laiha duni,”  Blandina Martins Exposto, hateten.

Observasaun Hatutan.com nota katak, kuaze atus ida-resin mak forma iha dealer UD Palma Motór nia oin, atu sosa motór maski odamatan loja nian taka.

Jornalista: Vito Salvador