Hatutan.com, (14 Janeiru 2022), Díli—Ministru Koordenadór ba Asuntu Ekonómiku (MKAE), liuhosi Unidade apoiu Oragnizasaun Mundiál Komérsiu (OMK), hetan tulun  hosi Governu Nova Zelándia, ofisialmente fornese kursu kona-bá Polítika Komérsiu durante fulan tolu ba membru Grupu Traballu Adezaun Timor-Leste, ne’ebé hetan partisipasaun hosi liña ministériu no ajénsia autónoma sira.

Kursu kona-bá Polítika Komérsiu ho tipu virtuál ne’ebé fornese hosi péritu Stephanie Honey hosi Nova Zelándia. Foto/MKAE.

Iha sesaun abertura kursu loron 13 Janeiru 2022, Segundu Sekretária hosi Embaixada Nova Zelándia, Yvonne McKinnel  salienta kona-bá komitmentu Governu Nova Zelándia, hodi apoiu Governu Timor-Leste nia vontade iha prosesu ne’e.

Notisia iha Relasaun:Ministru Joaquim ho Delegasaun Dezloka ba Jenébra Partisipa Konferénsia Altu Nível OMK  

“Nova Zelándia kontente tebes atu servisu hamutuk ho Timor-Leste ba apoiu prosesu adezaun OMK no hein katak, TL bele sai membru. Sai membru OMK importante ba nasaun sira ne’ebé buka atu aumenta sira nia komérsiu liu hosi kria sistema komérsiu ida ne’ebé previzível, nakloke, promove diversifikasaun no dezenvolvimentu ekonómiku,” Hatutan.com sita deklarasaun Yvonne McKinnel, iha komunikadu.

Advertisement

Kursu ho tipu virtuál ne’e fornese hosi péritu Stephanie Honey hosi Nova Zelándia, ne’ebé iha ona esperiénsia tinan 25 iha setór públiku no privadu. 

Partispante ba kursu ne’e mai hosi dirijente hosi várias institusaun Estadu, hanesan Ministériu Finansa, Ministériu Negósiu Estranjeiru no Kooperasaun, Ministériu Transporte no Komunikasaun, Ministériu Turizmu, Komérsiu no Indústria, Ministériu Agrikultura no Peska, Autoridade Nasionál Petróleu no Minerais (ANPM), Servisu Rejistu Verifikasaun Emprezariál (SERVE), Autoridade  Investigasaun no Fiskalizasaun Atividade Ekonómika, Sanitária no Alimentár (AIFAESA), Ajénsia  Promosaun Investimentu no Esportasaun (TradeInvest), Institutu Qualidade Timor-Leste (IQTL), Autoridade Alfándega no mós ekipa téknika hosi Gabinete Ministru Koordenadór ba Asuntu Ekonómiku (MKAE).

Durante fulan tolu, partisipante sira sei hetan matéria importante balun hanesan vizaun jerál kona-bá  polítika komersiál até  prinsípiu  dezenvolvimentu, polítika kona-bá  komersial nian.

Nune’e, iha loron dahuluk, partisipante sira ho tentamente rona kona-bá  deskrisaun polítika komersiál hanesan sistema komérsiu bazeia ba regra eko-sistema sira no mós kestaun  atuais OMK nian.

Ministru Koordenadór ba Asuntu Ekonomia, Joaquim Amaral louva tebes apoiu ne’ebé oferese hosi Governu Nova Zelándia liu hosi Embaixadór Philip Hewitt.

Advertisement

Antes ne’e, Governu Nova Zelándia fornese mós asisténsia liuhosi  treinamentu lian Inglés ba ofisiais hosi grupu servisu OMK nian, liu hosi kursu ne’ebé espesializadu no komplementáriu ba Lian Inglés Polítika Komérsiu, ne’ebé fornese  hosi Lorosa’e English Language Institute (LELI).

Jornalista: Cipriano Colo