Hatutan.com (15 Janeiru 2022) Díli—Rai-nakdoko ho nia magnitude 6,7 sentradu iha Provínsia Banten tama to’o área Jakarta, Bogor, Tangerang, Bekasi iha Sesta (14/01) halo uma hamutuk 738 hetan estragus.

Iha uma hamutuk 738 mak hetan estragu hafoin Rai-nakdoko ho magnitude 6,7 iha Distritu Pandeglang provínsia Banten Indonézia. Foto/ANTARA.

Abitante balun iha Jakarta relata ba CCN Indonézia ne’ebé Hatutan.com sita katak, rai-nakdoko tama to’o área Jakarta, mak hanesan iha JL HR Rasuna Said, Kemang, Blok M, Mampang Prapatan ho nia durasaun kuaze minutu ida liu.

Notisia iha Relasaun:Rai Nakdoko ho Magnitude 7,4 iha Maluku, Tama to’o TL ho Kupan

Alende ne’e, Rai-nakdoko ne’e mós tama to’o iha Sawangan, Depok; Tangerang, Gunung Putri, Distritu Bogor; Cirendeu.

Ajénsia Meterolojia, Klimatolojia, no Jeofízika (BMKG) mós relata katak, rai-nakdoko ho nia magnitude 6,7 ne’e sentradu duni iha Posu, Banten maibé laiha poténsia ba Tasi-sa’e (Tsunami).

Uma 738 iha Pandeglang Hetan Estragu

Ajénsia Rejionál ba Jestaun Dezastre (BPBD) Distritu Pandeglang, Girgi Jantoro relata katak, totál uma ne’ebé hetan estragu iha área ne’e tanba rai-nakdoko, aumenta nafatin to’o iha Sábadu (15/01/2022) hamutuk 738.

Dadus ne’ebé Hatutan.com sita hosi CNN Indonesia katak, hosi uma 738 ne’ebé hetan estragu, iha 164 mak estragu totál, uma 170 aat natón no 413 aat kamán.

Uma 700 resin ne’ebé hetan estragu ne’e maioria hosi postu administrativu 27 no suku 113 iha distritu  Pandeglang no postu administrativu ne’ebé grave liu ba estragu mak hanesan postu administrativu Sumur, Cibaliung, Panimbang, Cimanggu no Cikeusik.

Kona-bá edifísiu públiku ne’ebé hetan estragu hosi rai-nakdoko ne’e mak hanesan eskola 14, Edifísiu Klínika hamutuk 13, eidifísiu Suku hamutuk tolu, masjid iha haat, no mós uma merkadu ida.

Parte Ajénsia Rejionál ba Jestaun Dezastre sei kontinua rekolla dadus no relata ona ba nasionál hodi fornese apoiu umanitária ba vítima.

Jornalista: Cipriano Colo