Hatutan.com (01 Fevereiru 2022) Díli—Ministériu Justisa (MJ) liu hosi Diresaun Nasionál Servisu no Rejistu Notariadu (DNRN), hahú loron 15 fulan Janeiru halo autentifikasaun ba dokumentu hosi kandidatura Prezidente Repúblika periúdu 2022 to’o 2027, hamutuk na’in 16 hodi legaliza sira nia dokumentu molok ba rejistu iha Tribunál Rekursu (TR).

Rogério Tiago Lobato. Foto Espesiál.

Kandidatura na’in 16 ne’e, kompostu hosi Anacleto Pereira, Angela Freitas, Milena Pires, Isabel Fereira, Armanda Berta, Constancio Pinto “Terus”, Antero Benedito da Silva, Lere Anan Timur, Felisberto Araújo Duarte, Virgílio Guterres, Mariano Asanami Sabino, Francisco Guterres Luo-Olo, Martinho Gusmão, Hermes da Rosa Correia Barros, José Manuel Ramos Horta no ikus liu Rogério Tiago Lobato.

Notisia iha Relasaun:Kandidatu PR Lú Olo ho Armanda Berta Rejistadu, Lamukan Presiza Kompleta Dokumentu

Hosi prosesu autentika ne’e, atu legaliza ou halo autentifikasaun ba apoiantes iha kada Munisípiu na’in hira, maibé tuir lei eleitorál Prezidente Repúblika kada kandidatura tenki iha apoiantes ema 100 iha kada Munisípiu.

Maibé, DNRN halo de’it autentifikasaun ba númeru ne’e, atu to’o ka la to’o, maibé atu deside bele kandidata ka lae, kompeténsia iha TR.

“Bazeia ba autentifikasaun ne’ebé ami halo, númeru apoiantes hosi kada kandidatura la serteza. Tanba realidade kandidatura la ba munisípiu tanba balun konsentra de’it iha Dili ka munisípiu sira seluk. Notariadu halo de’it autentifikasaun atu apoiantes to’o 100 ka la to’o, ne’e TR mak sei deside bainhira ba rejistu. Kandidatu hamutuk na’in 16 ona mak mai halo autentifikasaun iha DNRN no ikus liu maka Rogério Tiago Lobato,” Diretór Jerál Diresaun Nasionál Servisu no Rejistu Notariadu (DNRN), Crisogno da Costa Neto ba Hatutan.com via telefónika, Tersa (01/02/2022).

Autenfikasaun ba dokumentu hirak ne’e, sei termina iha loron 04 fulan Fevereiru tinan ne’e.

Daudaun ne’e, kandidatura hamutuk na’in ne’en mak rejistadu iha TR, kompostu hosi kandidatura hosi partidu CNRT, José Manuel Ramos Horta, partidu KHUNTO Armanda Berta dos Santos, Partidu FRETILIN, Francisco Guterres Lú-Olo, kandidatura independente kompostu hosi Felisberto Araújo Duarte, Milena Pires no Angela Freitas.

Jornalista: Carmelita Isaac