Hatutan.com, (01 Fevereiru 2022), Dili-Tuir ajenda ne’ebé distribui ona ba órgaun komunikasaun sosiál sira hotu katak, Tersa (01/02/2022), tuku 16:00 Otl, eis-Xefe Estadu Majór Jenerál FALINTIL-Forsa Defeza Timor Leste, Lere Anan Timur ho nia ekipa atu ba simu kartaun membru Komité Sentrál FRETILIN (CCF, sigla portugés) iha CCF, Comoro, Dili.  

Notísia iha Relasaun: Lere Deklara La’ós Ona Militár Maibé Kandidatu PR 2022-2027

Sede Kandidatura Prezidente Repúblika 2022-2027, Lere Anan Timur. Foto/Hatutan.com

Teki-teki de’it, ekipa kandidatu Prezidente Repúblika periodu 2022-2027, simu fali mensajen iha oras ikus katak, Tersa ne’e, dirijente tomak CCF nian labele organiza simu Lere ho nia ekipa tanba feriadu komemorasaun tinan foun Xina nian ka Imlek.  

“Ami preparadu ona ho ekipa hotu, inklui hasai ona alerta ka konvite ba media sira katak Tersa ne’e, tuku 16:00 Otl, Lere ho nia ekipa sei ba CCF hodi simu kartaun membru CCF. Infelizmente, iha oras ikus nian, ami simu mensajen katak ohin loron ne’e feriadu Implek, portantu CCF taka, la iha atividade no ema la serbisu iha CCF,” fontes besik Lere Anan Timur informa hodi responde Hatutan.com liuhusi telefónika.

Jornalista Hatutan.com hakat to’o iha rezidénsia Lere Anan Timur nian iha Pantai Kelapa, Dili, atu hetan konfirmasaun direta ho Lere Anan Timur. Infelizmente, la konsege hasoru-malu ho Lere Anan Timur tanba okupadu ho enkontru urjente ida ho ninia ekipa susesu.

“Ema sira iha CCF feriadu hela ne’e, ita atu ko’alia hanusá? Pasiénsia de’it ona. ita hein took bainrua, kinta (03/02/2022),” fontes seluk hateten ba Hatutan.com iha Lere Anan Timur nia rezidénsia.  

Sede CCF, Comoro, Dili, 01 Fevereiru 2022. Foto/Hatutan.com

Tuir observasaun Hatutan.com nian iha Lere nia rezidénsia hatudu família ho ekipa susesu kandidatura Prezidente Repúblika Lere Anan Timur nian halo hela preparasaun atu ba CCF no preparasaun seluk mak iha loron ida ka rua mai tan, Lere sei halo vizita ida ba Munisípiu Ainaro ho intensaun atu halo deklarasaun ofisial kona-ba ninia kandidatura hanesan Prezidente Repúblika periodu 2022-2027.

Informasaun seluk ne’ebé Hatutan.com konfirma ho fontes oioin no besik Lere Anan Timur katak, posivel boot  no loron ikus liu ba Lere ho nia ekipa atu ba simu kartaun membru CCF mak iha loron 03 fulan-Fevereiru ne’e.

“Aban seidauk bele tanba katuas Lere nia loron aniversáriu ba da-70 (2 Fevereiru 1952-2 Fevereiru 2022) no nia okupadu uitoan, au-mézmu tempu, ita selebra mós loron istóriku transformasaun FALINTIL ba FALINTIL-Forsa Defeza Timor Leste ba dala-11. Tanba ne’e, Katuas Lere okupadu uitoan no la bele ba CCF,” fontes ne’e haktuir tan.   

Hatutan.com mós hakat to’o iha CCF hodi bele halo konfirmasaun ho dirijente sira iha CCF, Comoro, Dili, maibé to’o iha resintu CCF nian portaun nakloke hela, maibé haree hetan de’it mak motór tolu no karreta ida, no laiha duni atividade servisu iha CCF nia laran.  

Jornalista: Rogério Cárceres