Hatutan.com, (13 Fevereiru 2022), Díli-Konselleiru Másimu Partidu Kmanek Haburas Unidade Nasional Timor Oan (KHUNTO), José dos Santos “Naimori Bukar”, Domingu (13/02/2022), iha Salaun Esperansa, Elemloi, Dili,   fó pose ba estrutura Klibur Profesional Edukasaun (KPE) hodi haforsa no haklaken doutrina partidu KHUNTO nian  no buka identifika “sasadik no sasidik” sira iha setór edukasaun atu buka nia solusaun tuir KHUNTO nia programa no estratejia politika rasik.   

Tomada pose ba membru KPE-Partidu KHUNTO iha Salaun Esperansa, Dili, Domingu (13/02/2022). Foto/Hatutan.com

Tuir dadus ne’ebé iha membru KPE partidu KHUNTO mai husi profesór voluntáriu, kontratadu inklui funsionáriu públiku sira iha administrasaun públiku Ministériu Edukasaun (ME), kompostu husi nivel pre-eskolár to’o iha ensinu superiór ho total membru provizóriu na’in-540.

Prezidente KPE, Teodoro Soares iha nia diskursu afirma, KPE nudár organizasaun mahan  ida ba profesor sira no ajente administrasaun hotu iha setór edukasaun atu halibur ideia no diskute programa ne’ebé partidu nesesita bainhira kaer ukun hodi hadi’a setór edukasaun iha Timor Leste.

“Ha’u prontu servisu iha kualkér momentu ba partidu hodi hadi’a setór edukasaun tuir partidu nia orientasaun iha misaun no vizaun,” Teodoro Soares hateten.

Teodoro sei buka meius atu halibur membru hotu husi KPE atu diskute no identifika problema ne’ebé manorin nain sira enfrenta, atu nune’e, KPE bele iha dadus atu fó hanoin ba ukun nain sira hodi rezolve problema sira ne’ebé liga ho profesor voluntáriu sira nia direitu tamba realidade hatudu profesor voluntáriu sira servisu kesi kabun dadeer too loraik la hetan vensimentu husi Estadu.

“La bele husik timoroan balun serbisu kesi-kabun enkuantu sira seluk goja demaziadu,” Teodoro Soares hateten.

Vise-prezidente Partidu KHUNTO, Nicolau Lino Freitas,  iha nia diskursu hateten KPE hamriik atu sai hanesan instrumentu ida hodi apoiu polítika no ideolojia Partidu KHUNTO nian tuir doutrina rasik.

“Mudansa iha bainhira edukasaun la’o di’ak tamba setór edukasaun mak xave ba dezenvolvimentu,” Nicolau Lino Freitas, atuál Vise-Ministru Obras Publika  hateten.

Membru hotu ne’ebé halibur iha KPE tenke nafatin iha unidade hodi lori klibur ne’e la’o ba oin nudár forsa politika partidu KHUNTO nian atu atinzi objetivu iha eleisaun sira ne’ebé sei mai iha 2023.

Konselleiru Másimu partidu KHUNTO, José dos Santos “Naimori Bukar”, hateten edukasaun nudár toos ida tamba ne’e presiza investimentu iha setór edukasaun atu nasaun bele aproveita iha loron ikus.

“Atu jerasaun ne’e la’o iha prinsípiu ida loos tenke hadi’a edukasaun, investe iha edukasaun ba futuru timoroan nian,” José dos Santos “Naimori Bukar” hateten.

KHUNTO konsidera  timoroan hotu tenke kaer ba prinsípiu ukun rasik an hodi forma karater foin-sa’e sira nian  atu respeita ba sira nia an, respeita sira-nia inan-aman, respeita família no hatudu respeita iha sosiedade no nasaun.

 Jornalista: Vito Salvadór