Hatutan.com (14 Fevereiru 2022), Díli—Prezidente Repúblika Francisco Guterres Lú Olo, aban, 15 Fevereiru, sei fó posse ba Brigadeiru-Jenerál Calisto dos Santos Coli “Coliati” hodi sai hanesan Vise-Xefe Estadu-Maiór-Jenerál Forsas Armadas no ba Komodoru Donaciano Costa Gomes Pedro “Klamar Fuik” hodi asumi knaar hanesan Xefe Estadu-Maiór Forsas Armadas.

Vise Xefe Estadu Maiór Forsa Armada, Brigadeiru Jenerál Calisto Santos “Coliati”, tula deviza ba membru sira iha serimónia promosaun ne’ebé hala’o iha Kuartél Jenerál, Fatuhada-Díli, Kinta (03/02/2022). Foto/Média F-FDTL.

“Iha serimonia ne’ebé sei realiza tuku 10:00 Otl, iha Palásiu Prezidénsial Nicolau Lobato ne’e, sei promove mós deviza Brigadeiru Jenerál Calisto dos Santos Coli “Coliati” ba Majór-Janerál, enkuantu  Komodoro Pedro Klamar Fuik mantein nafatin ho deviza atuál, ne’ebé permite ona nia atu asumi knaar hanesan Xefe Estadu Maior Forsas Armadas,” Hatutan.com sita komunikadu.

Tuir Lei Defeza Nasional Vise-Xefe Estadu-Maiór-Jenerál Forsas Armadas no Xefe Estadu-Maiór Forsas Armadas, nomeia hosi Prezidente Repúblika tuir proposta Governu ne’ebé antes rona uluk Konsellu Superiór Defeza Militár no Konsellu Superiór Defeza Seguransa, liu hosi membru Governu ne’ebé iha kompeténsia ba matéria defeza.

Vise-Xefe Estadu-Maiór Jenerál Forsas Armadas foun, Brigadeiru Calisto Coli “Coliati”, ne’ebé moris iha Darulete, Liquiça, tinan-62 liuba, antes ne’e asumi knaar hanesan Xefe Estadu-Maior Forsas Armadas no iha mós esperiénsia nu’udár Adidu Defeza Timor-Leste iha Austrália, hosi 2014 to’o 2018.

Enkuantu Komodoru Donaciano  Costa Gomes “Pedro Klamar Fuik”, moris iha Hatulia, Ermera tinan-53 liubá, iha tinan-10 ikus, hala’o knaar nu’udár Diretór Institutu Defeza Nasionál Timor-Leste.

Komodoru Pedro Klamar Fuik mós iha esperiénsia lidera Komponente Navál F-FDTL hosi 2008 to’o 2011.

Jornalista: Vito Salvadór