Hatutan.com, (26 Abríl 2022), Díli—Komandu Jerál Polísia Nasionál Timor-Leste (PNTL), liuhosi Centro de Formação Policia (CFP), hamutuk ho FALINTIL Forsa Defeza Timor-Leste (F-FDTL), Centro de Formção e Treino (CFT), ensera formasaun kona-bá banda múzika ba membru PNTL na’in-34 ne’ebé mak treina hosi instrutór mai hosi F-FDTL durante fulan-ida, iha Akademia PNTL Comoro, Díli.

Segundu Komandante Jerál PNTL, Komissáriu Polísia Mateus Fernandes, entrega sertifikadu ba instrutór hosi F-FDTL ba formasaun banda múzika PNTL, iha CFP Comoro, Tersa (26/04/2022). Foto/Hatutan.

Kursu ne’e, fasilita hosi instrutór sira iha ekipa banda militár F-FDTL nian, hamutuk na’in-26 mai hosi CFT Nicolau Lobato, Metinaro.

Maski kursu ba membru PNTL ne’e konklui ona, maibé Komandante Centro Formação e Treino (CFT), Coronel Cesário Salustiano M. Ximenes “Haksolok” ne’ebé partisipa mós iha seremónia ne’e, dezafia liután membru sira PNTL nian atu kontinua buka apreende nafatin.

“Ha’u agradese tebtebes, maibé ita boot sira presiza aperfeisoa tán, fulan ida de’it, seidauk to’o. Tanba ha’u nia membru sira ne’e, dezde inísiu to’o agora, sira sei treinu nafatin. Foin daudaun, ami nia membru na’in-haat ba fali Nova Zelándia hodi tuir kursu múzika,” Haksolok, hateten iha diskursu enseramentu iha Akademia Comoro, Tersa (26/04/2022).

Advertisement

Coronel “Haksolok”, konsidera katak, Sentru Akademia PNTL ho Komponente Formasaun Treinu, iha ninia funsaun ne’ebé mak hanesan de’it.

Iha CFT, Nicolau Lobato Metinaro, prinisipalmente ho nia moto maka, forma ema atu sai ema, eduka ema sai ema ne’ebé edukadu no respeitozu.

“Komprimentu no sentru  akademia PNTL, presijamente ema ne’ebé matenek, ema ne’ebé fera ulun, tanba mezmu iha F-FDTL no PNTL, ita  nia membru sira ne’ebé foun tama mai, ne’e la’ós ema ne’ebé baibain. Tua-lanu mós iha, ema bulak mós iha, ema beik mós iha. Entaun presizamente ema ne’ebé serve duni,” komandante Haksolok hateten.

Durante ne’e, iha selebrasaun loron asionál sira, banda militár de’it mak partisipa ho númeru efetivu ne’e menus liu, inklui materiál ka instrumentu sira ne’ebé uza mós menus.

Situasaun hirak ne’e, halo ema balun krítika, liu-liu deputadu sira iha Parlamentu Nasionál katak, presiza hasa’e tán númeru efetivu nomós fasilidade sira kona-bá banda múzika nian.

Advertisement

Maibé, Komandante Haksolok sente kontente, tanba ohin loron eziste tán ona banda múzika hosi instituisaun PNTL ne’ebé bele apoia no haforsa tán banda F-FDTL, hodi partisipa di’ak liután iha eventu nasionál sira iha futuru.

“Ita boot sira bele simu sertifikadu, maibé labele kontente de’it ho ida ne’e, ita nia prátika ne’e mak hatudu. Sertifikadu ne’e, sura-tahan de’it maibé ita nia prátika, prudénsia no labele haluha katak, ha’u ema múziku ida. Entaun, buka meius oinsá atu mellora liután, ida ne’e mak ita boot sira nia talentu ona,” Coronel Haksolk fó hanoin.

Iha fatin hanesan, Komandante CFP, Superintendente Xefe Polisia, Arquimíno Ramos dehan, serimónia enseramentu ba kursu ne’e, foin realiza tanba durante semana tolu nia laran, membru sira dezloka hotu ba operasaun iha atividade kampaña eleitóiral no seguransa ba eleisaun Prezidensiál segunda volta, iha Tersa 19 Abril.

“Agradese ba komandante komponente formasaun no treinu, ne’ebé mak ho laran di’ak, nomós ba formadór sira durante ne’e apoiu ona ita nia membru PNTL sira, ne’ebé sei inkorpora iha ekipa banda PNTL ninian,” Komandante CFP, Superintendente Xefe Polisia, Arquimíno Ramos agradese.

Tuir loloos, banda múzika PNTL ne’e hahú kleur tiha ona. Maibé, komandante Jerál sesante, Komisáriu Polísia Júlio Hornai hatán katak, sei hein lai tanba formasaun ba membru sira mai hosi Polisia Repúblika Indonézia (POLRI).

Advertisement

“Depois de ita haree, ka akompaña seremónia nasionál sira, ita nia forsa armada mak toka di’ak tebebes. Entaun, ita hanoin ona, oinsá mak atu PNTL bele mós aprende ho sira. Ita ho ita hanorin malu ne’e fásil, besik hela, ne’ebé sala ruma karik, dúvidas ne’e kontaktu malu lalais. Ida dook ne’e ba ida ne’ebé mak ita labele, ne’e ita ba dook. Oras ida kursu múzika ninian ba nota sira ne’e, dala-ruma ida ne’ebé avansadu liu, tanba ita labele buka iha rai seluk. Ida ne’ebé ita bele ne’e, di’ak liu, ita hala’o iha ne’e,” nia subliña.

Ba oin, bainhira iha serimónia nasionál sira, banda rua F-FDTL ho PNTL mak sei hamutuk hodi halo animasaun.

Molok ne’e, iha abertura formasaun ba kursu banda múzika ne’e, Komandante Jerál PNTL, Komisáriu Polisia Faustino da Costa, deklara ona ofisialmente kona-bá ezisténsia banda PNTL nian.

Maibé, sei iha tán formasaun lubuk ida, iha ne’ebé parte komandu rasik mak sei buka kursu iha rai seluk iha Nova Zelándia, Malázia, liu-liu kooperasaun sira ne’ebé mak iha ona no presiza kontinua.

Jornalista: Rogéro Pereira Cárceres

Advertisement