Hatutan.com, (26 Agostu 2021), Díli-Governu liuhosi desizaun Konsellu Ministru, kuarta (25/08/2021), deside konfinamentu obrigatóriu jerál iha kapitál Díli, hahú hosi loron 27 Agostu to’o dia 02 Setembru 2021.  

Governu impoin konfinamentu obrigatóriu jerál ba area jurisdisaun Munisípiu Dili tanba situasaun pandemia COVID-19 (variante delta) nakda’et  iha Díli laran, iha loron hirak, ikus-ikus ne’e.

Iha  tersa liubá (24/08/2021), Sentru Integradu Jestaun Krize (CIGC, sigla portugés), rejista kazu óbitu (ema mate) ho COVID-19 na’in-rua (2), pozitivu 532, rekuperadu 97 no kazu ativu 3.816.

Advertisement

Konfinamentu obrigatóriu jerál ka lockdown iha lian Inglés ne’e impoin iha kapitál Díli ho intensaun atu hakotu lalais korrente propagasaun variante delta no bele salva komunidade Díli hosi peste letál ne’e.

Dokumentu ofisiál hosi Prezidénsia Konsellu Ministru, Gabinete Portavós Governu, ne’ebé Hatutan.com asesu esplika detallu kona-ba atividade sira ne’ebé maka Governu bandu ka la bele halo durante situasaun lockdown ne’e.

Atividade sira ne’ebé bandu maka hanesan;

1. Komérsiu no loja sira ne’ebé la fa’an sasán nesesidade bázika tenke taka.
2. Eskola no universidade tenke taka
3. Transporte públiku pasajeiru labele la’o
4. Labele halo atividade desportiva iha li’ur
5. Suspende serimónia relijioza koletiva
6. La bele partisipa iha serimónia funerál (lia-mate) liu ema na’in-10

Atividade sira ne’ebé bele halo no kontinua maka hanesan;  

1. Ospitál, klínika no farmásia loke nafatin
2. Supermerkadu, kioske no loja ba ai-han no sasán ka servisu esensiál, loke nafatin
3. Merkadu, tiga-roda, kioske ka ai-leba bele fa’an (ai-han, sasán ka servisu esensiál)
4. Servisu komunikasaun (telefone no internet) no eletrisidade loke nafatin
5. Servisu esensiál administrasaun públiku nian la’o nafatin
6. Banku loke nafatin
7. Atividade Tribunál la’o nafatin
8. Estasaun enxe mina no loja fa’an gas loke nafatin
9. Empreza transporte sasán bele la’o nafatin

Ba atividade restaurante  sira bele loke, maibé hahán tenke lori ka entrega iha uma de’it, otél loke nafatin, maibé regra ba sira-nia restaurante hanesan restaurante sira seluk.  (*/bit)  

Notísia iha Relasaun : Governu impoin konfinamentu domisiliáriu jerál iha Dili

Advertisement