Hatutan.com, (11 Abríl 2022), Díli-Esperiénsia iha eleisaun prezidensiál primeira volta nian, 19 fulan-Marsu liubá, hatudu katak,  indivíduu no grupu balun halo tentativa hodi tama ba halo distúrbiu iha sentru votasaun. Ho nune’e, iha eleisaun segundu volta ne’e, Komandu Polísia Nasionál Timor-Leste (PNTL) deside ona atu aumenta tan númeru efetivu iha sentru votasaun sira.

Notísia iha Relasaun: Suspeitu 12 Mak Halo Krime iha Sentru Votasaun Fomentu II

Komandante PNTL Munisípiu Díli, Superintendente Xefe Polísia Henrique da Costa. Foto/Hatutan.com

Komandante PNTL Munisípiu Díli, Superintendente Xefe Polísia Henrique da Costa, informa  prosesu atu halo kolokasaun tán efetivu PNTL nian iha sentru votasaun sira ne’e, bazeia ba sentru ne’ebé nia prosesu kontajen votu dala-ruma bele to’o kalan-boot.

“Ami identifika ona fatin balun, ne’ebé mak ita presiza atu reforsa tán. Fatin sira ne’ebé maka dala-ruma kontajen bele to’o fila-fali tuku ida, tuku rua madrugada,” Henrique da Costa, informa ba jornalista sira iha kna’ar fatin, Segunda (11/04/2022).

PNTL Díli mós sei reforsa tán membru sira ba iha sentru votasaun hirak ne’ebé maka, dala-ruma mós ninia númeru eleitór barak liu, atu nune’e hodi garante seguransa ho másimu ba iha ne’e hirak ne’ebé identifikadu.

Antes ne’e, iha loron 19 fulan-Marsu liubá, bainhira realiza eleisaun prezidensiál primeira volta, to’o tuku 03:00 Otl, iha grupu organizadu ne’ebé mak oin taka-metin no deskonfia utiliza mós armas, mosu ba iha sentru votasaun EBC Fomentu II, hodi halo asaun krime hasoru militante hosi partidu balun, iha sentru votasaun laran, bainhira prosesu kontajen la’o hela ka seidauk hotu.

 Jornalista: Rogério Pereira Cárceres