Hatutan.com, (11 Abríl 2022), Díli-Polisia Nasionál Timor-Leste (PNTL) liuhosi Unidade Polïsia Tránzitu (Poltranz), prende motorizada hamutuk 48 hosi apoiante sira kandidatu Prezidente Repúblika (PR), númeru sorteiu 2, Francisco Guterres “Lú Olo”, bainhira nadodon ba partisipa iha kampaña ba eleisaun prezidensiál segunda volta, iha Tasi-tolu, Domingu (10/04/2022).

Notísia iha Relasaun: PNTL Halo Apreensaun Ba Motór Estadu Ida Tuir Kampaña Kandidatu PR Lú Olo

Motór hirak ne’ebé PNTL prende husi apoiante Kandidatu PR Lú Olo nian iha kampaña ne’ebé hala’o iha Tasi-tolu, Dili, Domingu (10/04/2022). Foto/Hatutan.com

“Komandu PNTL Munisípiu Dili parte Tránzitu apoiu hosi unidade sira hotu, halo mós apreensaun ba iha motorizada sira ne’ebé maka la kumpre regra, hanesan uza kenalpoot resin, la uza xapa matrikula, la uza espellu, depois tula ema na’in-tolu, ita halo apreensaun ba iha motorizada sira ne’e, hamutuk 44, to’o iha tuku-hitu (kalan) ninian. Mais depois kontínua tán fila-fali to’o tuku-ualu ninian, ita hetan motorizada hamutuk 48,” Komandante PNTL Munisípiu Díli, Superintendente Xefe Polísia Henrique da Costa, informa ba jornalista sira iha kna’ar fatin, Segunda (11/04/2022).

Prosesu apreensaun ne’e liuhosi atividade operasaun konjunta entre Komandu PNTL Munisipiu Dili, Tránzitu Nasionál, Unidade Espesiál  Polísia (UEP), Unidade Patrullamentu Fronteira (UPF), liuhosi Postu ne’ebé destakadu iha Aeroportu, Unidade Polísia Marítima (UPM), no Kuartél Jerál PNTL ho Servisu Informasaun ba Polísia (SIP).

Advertisement

“Motorizada sira ne’e, agora daudauk iha ne’e, ita-nia parte tránzitu Munisípiu Díli nian, sira hahú ona pasa billete ba iha infratór sira, para atu nune’e sira lori ba selu iha banku, mak bele mai foti sira nia transporte,” Henrique da Costa hateten.

Maske PNTL halo apreensaun ba motorizada lubun ida hosi apoiante sira, maibé durante atividade kampaña eleitorál hosi kandidatu PR Lú Olo nian ne’e, hahú hosi tuku 14:00 to’o iha  tuku 18:00 kalan, la’o ho di’ak no hakmatek.

Antes ne’e, iha loron 16 fulan-marsu liubá, PNTL mós halo apreensaun ba motorizada hamutuk 148, hosi apoiante sira kandidatu PR Lú Olo nian, bainhira halo komboiu hodi ba partisipa iha kampaña eleitorál ikus, eleisaun prezidensiál primeira volta, iha Tasi-tolu, Dili.

Tuir oráriu hosi Sekretariadu Tékniku ba Administrasaun Eleitorál (STAE) ho Comissão Nacional de Eleições (CNE), fó sai katak, iha Tersa, 12 fulan-Abríl 2022, aban, kandidatu PR, ho númeru sorteiu 1, José Manuel Ramos Horta, sei halo mós nia kampaña ho modelu komísiu iha área Tasi-tolu, Dili.

Komandante Henrique husu ba apoiante sira José Ramos Horta nian, no mós militante sira partidu CNRT inklui apoiante sira hosi partidu seluk tán mak fó apoiu ba kandidatu PR, José Ramos Horta, atu respeita ka kumpre nafatin lei seguransa ordináriu nian ne’ebé mak estabelese tiha ona.

Advertisement

“Ita husu ba iha militante sira, para atu nune’e, kuandu partisipa iha kampaña aban nian karik, partisipa ho seguru, no husu para atu nune’e kumpre lei ne’ebé maka vigór, no kumpre liu-liu bai ha kódigu estrada ninian. Tanba mezmu ita ba kampaña, maibé vida ema ida-idak ninia ne’e, iha ita-nia aan rasik, husu para atu nune’e tau atensaun ba iha ida ne’e,” komandante Henrique fó hanoin.

Jornalista: Rogério Pereira Cárceres

Advertisement