Hatutan.com (12 Abríl 2022) Díli—Tribunál Distritál Díli (TDD) iha Tersa 12 fulan ne’e, liu hosi juiz kolektivu Afonso Carmona, Ercilia de Jesus no Evangelino Belo kontinua halo julgamentu ho númeru criminal 0029/18 ERSIC ne’ebé deskonfia involve atuál diretór estabelesimentu prizaun Gleno Nito Maria dos Santos ba krime abuzu de konfiansa agravadu.

Involvimentu ne’e, tanba Nito Maria dos Santos la fó fila lezadu Abilio Mesquita nu’udár dadur nia sasan sira, hanesan sintu ho folin $300, Ipad ho folin $700 inklui livriñu tolu.

Iha julgamentu kontinuasaun ne’e, sasin Elio Moeses nu’udár guarda bloku, laiha koñesimentu kona-bá lezadu nia sasan hirak ne’e.

Maibé, nia esplika tuir rejimentu prizaun nian katak bainhira dadur tama tenki liu hosi banku de dadus hodi alista sasan ne’ebé proibidu ka bandu labele lori tama, maka hanesan sintu, telefone tanba ne’e bainhira identifika dadur lori maka estabelesimentu prizaun sei rai hela sasan hirak ne’e to’o dadur sai ka familia ruma hakarak foti maka foin bele fó.

Maibé bainhira família la foti maka entaun dadur ne’e kuandu sai hosi kadeia tenki fó fila no labele destroi.

Tuir sasin Agostinho de Fátima Salsinha nu’udár responsável banku de dadus esklarese ba Tribunál katak sasan ne’ebé momentu ne’eba lezadu lori no rejistu iha banku de dadus nia parte haluha ona no nia laiha kompeténsia atu simu, estraga ka rai, tanba momentu ne’ebá la’ós nia mak halo rejistu.

Hafoin rona sasin na’in-rua, Tribunál adi’a hikas julgamentu ba loron seluk hodi kontinua rona sasin sira seluk.

Antes ne’e, tuir akuzasaun hosi MP katak arguidu hanesan funsionáriu públiku no diretór estabelesimentu prizaun Gleno, maibé iha loron 23 fulan Abril tinan 2013 lezadu Abilio Mesquita nu’udár dadur ne’ebé muda hosi prizaun Becora ba fali prizaun Gleno, to’o iha prizaun Gleno tuir regulamentu prizaun katak dadur ka lezadu nia sasan hanesan sintu ho folin $300, Ipad ho folin $700, livriñu tolu tenki entrega ba autoridade guarda prizionál sira inklui dokumentu akordu dame entre dadur ne’e ho arguidu kona-bá kazu ne’ebé lori lezadu sai kondenadu.

Iha fulan Outubru tinan 2014, lezadu ne’ebé nu’udár dadur iha prizaun Gleno ejize ba arguidu atu entrega lezadu ninia sasan sira ne’e, maibé liu tiha semana ida arguidu entrega de’it lezadu nia osan $240 no sasan sira seluk la entrega ho razaun katak sasan ne’ebé bandu, no tuir regras liu ona tinan rua tenke sunu nune’e lezadu nia sasan arguidu sunu ona.

Iha loron 06 fulan Novembru tinan 2017 bainhira arguidu ho lezadu ne’ebé nu’udár dadur mesak iha sala vizita prizaun Gleno, arguidu hateten ba lezadu katak, “ita hakarak sai ka la’e, se hakarak sai keta ejize no ha’u prontu atu hatán iha Tribunál”.

Iha loron 07 fulan Novembru tinan 2017, Xefe operasionál prizaun Gleno Manuel de Deus ba loke lezadu nia odamatan hodi transfere fali lezadu hosi prizaun Gleno ba Prizaun Becora hodi hatama kedan lezadu ba sela “Bloc 4- Bloc Alto”, tanba konsidera halo krime foun iha prizaun laran.

Ho hahalok arguidu nian, MP akuza arguidu ba pratika krime abuzu konfiansa agravadu ne’ebé previstu iha artigu 257 hosi kódigu penál TL.

Audiénsia julgamentu ne’e prezide hosi Juiz kolektivu, Afonso Carmona, Ercilia de Jesus no Evangelino Belo, Ministériu Públiku reprezenta hosi Prokuradór Napoleão Soares da Silva, arguidu hetan asisténsia legál hosi defensór Públiku.

Jornalista: Carmelita Isaac