Hatutan.com, (25 Abríl 202), Díli- Benefisiáriu sira ba programa kombustível subsídiu sei lori voucher bá enxe kombustível iha postu abastesimentu kombustível 59 ne’ebé hetan ona lisensa operasaun husi  Autoridade Nasionál Petróleu no Minerál  (ANPM).

Lee Mós: Prezidente Repúblika Promulga Dekretu-Lei Subsídiu Kombustível

ANPM halo sosializasaun bá Dekretu Lei Númeru 18/2022, kona-bá atribuisaun subsídiu kombustível. Foto/Hatutan.com

Atu implementa Dekretu Lei Númeru 18/2022, kona-bá atribuisaun subsídiu kombustível bá operador transporte rodoviário publiku, aeros, maritima  nasionál no adkirentes  konvustível ba atividade agríkola no peska, Segunda (25/04/2022), Ministériu Petróleu no Rekursu  Minerál (MPRM) liu husi Autoridade Nasionál Petróleu no Minerál (ANPM) halo sosializasaun ba operadores postu abastesimentu kombustível 59 iha territóriu nasionál ne’ebé hetan ona atribuisaun sertifikadu lisensa operasaun nian husi ANPM.

Iha loron 13 fulan-Abríl 2022, Konsellu Ministrus aprova Dekretu-Lei ne’e hodi hatán bá folin kombustível ne’ebé sa’e maka’as tanba efeitu husi funu Rúsia hasoru Ukránia. Nune’e, Prezidente Repúblika aprova iha loron 19 fulan-Abríl no dekretu ne’e estabelese subsídiu finanseiru, ho natureza esesional no tranzitória ho objetivu hamenus impaktu ekonómiku husi folin kombustível ne’ebé sa’e.

Kombustível subsídiu ne’e atribui bá operadores transportes públiku no bá adkirentes kombustível destinadu ba atividades agríkola no piskatória.

Iha postu abastenamentu konbustível hamutuk 59 iha territóriu nasionál mak hetan lisensa operasionál husi ANPM, nune’e Governu sei fó de’it lisensa bá empreza hirak ne’ebé iha lisensa no sei la autoriza atu benefisiariu sira lori voucher bá enxe kombustível iha postu abastenamentu kombustível sira ne’ebé lahetan lisensa husi Governu liu husi MPRM diresaun ANPM.

Diretur Downstream ANPM, Nelson de Jesus. Foto/Hatutan.com

Diretur Downstream ANPM, Nelson de Jesus, bá jornalista sira iha salaun Suai Room Timor Plaza, esplika, enkontru ida ohin nu’udár oportunidade atu fahe no buka informasaun hosi operador sira postu abastenamentu kombustível para oinsa ANPN bele elabora di’ak liu mekanizmu molok implementasaun bá dekretu lei ne’e.

“Sorumutuk ne’e atu ami sosializa ho operador abastesimentu kombustível sira kona-bá mekanizmu no sistema sira ne’ebé ami sei aplika uainhira dekretu lei ne’e hahu implementa,”  Nelson de Jesus hateten.

Tuir dekretu lei ne’ebé iha Governu liu husi ANPM sei foti presu mediu husi fulan-Dezembru, nune’e ANPM foti presu kombustível hahu husi loron 1-30 fulan-Dezembru, hodi halo kalkulasaun bá folin kombustível husi ida ás liu too ida kraik (Folin karun tun to’o baratu) hafoin soma hamutuk hodi hetan nia mediu (presu klaran) hodi uza no sai hanesan sasukat atu imprime voucher bá benefisiáriu sira.

“Voucher ne’ebé sentru abastenamentu sira rekolla husi benefisiariu sei lori mai iha ANPM hodi halo verifikasaun tuir dadus ne’ebé iha hafoin ida ne’e ANPM haruka bá iha ministériu sira ne’ebé emite voucher bá benefisiáriu sira hodi halo pagamentu,” nia esplika.

Diretur ANPM ne’e hatutan presu mediu (presu klaran) ne’ebé ANPM aplika bá iha postu abastesimentu kombustível sira diferente ba kada munisípiu ka rejiaun ne’ebé iha no sei estabelese tuir diploma ministerial ne’ebé durante prosesu sira ne’e lao ANPM sei halo verifikasaun no rekolla dadus lorloron husi kada postu abastenamentu kombustível atu bele asegura no labele mosu irregularidade ruma ne’ebé fó prejuizu bá Estadu.

Diretór Irmaun Timor Fuel husi RAEOA, Julio Mak. Foto/Hatutan.com

Iha fatin hanesan Diretór Irmaun Timor Fuel husi RAEOA, Julio Mak hateten problema ne’ebé mak operador abastesimentu kombustível iha Oé-Cusse enfrenta mak transportasaun mina husi Díli ba Oé-Cusse, durante ne’e empreza halo esforsu liu husi marítima, maibé ho folin mina mundial ne’ebé sa’e halo ró ne’ebé uluk sira aluga ho folin $9000.00 agora sa’e to’o $20,000.00.

“Ami hasoru difikuldade iha transporte marítima tamba ne’e Governu tenke halo esforsu hodi hakmaan mós kustu alugér bá ró ne’ebé ami sei aluga,” Julio Mak hateten.

Hatan ba preokupasaun ne’e, diretur  ANPM hateten subsidiu kombustível ne’ebé Governu atribui sei kobre mós transporte marítima nune’e garante sei iha solusaun bá kestaun ne’e.

Jornalista: Vito Salvador